Deuteronomium 21:1-23
21 “Nsene ngomu gwana muntu ogu vana dipaga mosirongo esi ana kumupa Karunga gweni Jehova ntani kapi muna diva asi yilye ogu ana mu dipaga,
2 masimbi geni novapanguli ngava ze va ka tare asi yitata musinke eyi ya kara pepi noku ana fire ogo muntu.
3 Makura masimbi gomositata esi sa kara pepi noku ana fire ogo muntu, ngava guse ndema ezi va dira kuruganesa rumwe ndi ezi va dira kukutira,
4 va zi tware momuramba ogu va dira kulima ndi va kune mo mbuto, omu mwa kara mema gokupupa makura ngava tezere nsingo zondema momuramba ogo.
5 “Vapristeli woVarevhi nawo ngava kare po, morwa Karunga gweni Jehova kwa va horowora va mu ruganene ntani ngava tungike vantu medina lyaJehova. Awo ngava divisa omu nava kohonona po nkenye udigu wokuhamena muntu ogu vana homokere.
6 Makura masimbi nagenye gomositata esi sa kara pepi noku ana fire ogo muntu, ngava kuhwire mawoko gawo pondema ezi vana tezere nsingo momuramba.
7 Awo ngava tante asi: ‘Ose kapi twa dipaga* muntu ogu ntani kapi twa mona ogu ana mu dipaga.
8 Jehova wa ha pa usima Vaisraeli ava wa zowora ntani wa ha pulisira vantu woge va kare nousima wedipago.’ Makura awo ngava manguruka kousima owo wedipago.
9 Monkedi ezi yimo ngomu ninka vantu va dire kukara nousima wedipago mokatji keni pokurugana yininke youhunga kosipara saJehova.
10 “Apa ngomu za koyita mu ka rwise nonkore deni, ano Karunga gweni Jehova a ka mu vatere mu va funde ntani mu ka va guse va kare nonkwate,
11 nsene gumwe a mona mukadi gomuwa mokatji kononkwate ogu ana hara kukwara,
12 age kuvhura a mu tware kembo lyendi. Mukadi ogo ga hepa kukurura nohuki dendi ntani a tete mambwara gendi.
13 Age ga hepa kuhutura yikoverero eyi ga dwere apa va ka mu kwete nokutunga membo lyendi. Mukadi ogo nga lira oguhwe nozina kwedi nakunye, ano konyima ntani nga ligwanekera nage panyama; awo ngava likware.
14 Nye nsene mukadi ogo kapi ana kumuhafesa, ga hepa kumusiga a ze nkenye oku ana hara. Kapisi nga mu randese ndi a mu tekure monkedi zonyanya, yeeyi age kwa swaukisa mukadi ogo.
15 “Nsene mugara kwa kwara vakadi vavali ntani ga hara po gumwe kupitakana mukwawo, ano navenye kwa reta vanona wovamati, nye munendi gombeli kwa mu reta mukadi ogu ga dira kuhara,
16 mezuva eli nga gava upingwa kovana vendi, kapisi nga tekure munendi ogu ga reta mukadi ogu ga hara ngwendi yige mbeli, makura a hepekere mo mbeli zendi ogu ga reta mukadi ogu ga dira kuhara.
17 Age ga hepa kuyilikida asi muna ogu ga reta mukadi ogu ga dira kuhara yige mbeli pokumupa upingwa wounzi kupitakana vana vendi vapeke, yeeyi age munendi gokuhova.* Upingwa wombeli kwa hamena kwendi.
18 “Nsene mugara ga kara nomuna gondino ntani kapi a zuvhu, age hena kapi a limburukwa oguhwe ndi ozina ano vakondi vendi va hetekera ko kumupukurura nye age kapi a purakene,
19 oguhwe nozina ngava mu tware komasimbi pevero lyositata sawo,
20 makura ngava tantere masimbi gomositata asi: ‘Ogu munetu ndino, kapi a zuvhu ntani kapi a tu limburukwa. Age makurulya ntani nkorwe.’
21 Vagara navenye womositata va hepa kumudipaga nomamanya. Mwa hepa kugusa mo yininke yoyidona mokatji keni, ano Vaisraeli navenye ngava kara nowoma apa ngava yi zuvha.
22 “Nsene mugara ana tura nzo ezi nazi mu ninkisa va mu dipage, makura va mu dipage ntani va mu zenzerese kositji,
23 simpu sendi kapisi ngava si sige si zenzerere kositji masiku nagenye nye va hepa kusivhumbika mezuva lyoolyo, yeeyi nkenye ogu ava zenzeresa kwa mu finga Karunga. Kapisi ngomu nyateke sirongo esi ana kumupa Karunga gweni Jehova ngoupingwa.
Nonkango dokonhi
^ MoRuhebeli asi “mawoko getu kapi ga tjisanga honde zendi.”
^ Ndi “age etameko lyononkondo dendi dokureta.”
