Deuteronomium 22:1-30
22 “Nsene ono mono ntwedu ndi nzwi zamukweni ezi zina zumbana, wa ha zi pitakana. Wa hepa kuzimutwarera.
2 Nye nsene kapi ga tunga pepi nove ndi kapi wa mu diva, wa hepa kutwara simuna oso kembo lyoge. Aso sa hepa kukara koge dogoro nga si papare mwene ntani nye ngo si mu tengwidira.
3 Eyi yiyo ngo rugana nsene ono gwana sindongi sendi, yikoverero yendi ntani nkenye eyi nga zumbanesa mukweni. Kapisi ngo yi pitakane.
4 “Nsene ono mono sindongi samukweni ndi ntwedu zendi zina bwakama monzira, wa ha zi pitakana. Wa hepa kuvatera mukweni a kature simuna sendi.
5 “Mukadi kapisi a dware yikoverero yovagara, ano mugara nage kapisi a dware yikoverero yovakadi. Yeeyi Karunga gweni Jehova kwa nyenga nkenye ogu a rugana yininke yangoso.
6 “Nsene o gwana sikorogo konzira sina kara yidiragona ndi mauta, yi kare asi kositji ndi pevhu, ano zinyayo kuna hingire poyidiragona ndi pomauta, kapisi o guse yidiragona oyo kumwe nazinyayo.
7 Nye ove kuvhura o guse yidiragona o sige zinyayo. Omu yi rugane eyi yipo ngayi mu tompoke ntani yipo ngomu paruke siruwo sosire.
8 “Nsene to dike nzugo, wa hepa kudika keguru lyazo ekuma lyesupi,* yipo nove nepata lyoge ngomu dire kukara nousima wedipago nsene muntu a gwa keguru lyonzugo.
9 “Wa ha kuna mosikunino soge somandjembere mbuto zapeke, nsene o yi rugana, mbuto ezi ngo zangura ntani nomandjembere aga ngo pongaika ngava yi gava konkongoronzugo.
10 “Wa ha purwisa ntwedu nosindongi eyi vana kutire kumwe.
11 “Wa ha dwara yikoverero eyi va honza kumwe nowanda ntani nekehe.
12 “Mwa hepa kuhonzera nonyerera komaruha gane goyikoverero yeni.
13 “Nsene mugara a kwara mukadi makura a ligwanekere nage panyama nye konyima a mu nyoke*
14 ntani a mu rundire asi kwa rugana yirugana yoyidona nokuswaukisa edina lyomukadi ogo pokutanta asi: ‘Ame kwa kwara mukadi ogu, nye konyima zokuligwanekera nage panyama, ame kapi na gwana umbangi ou una kulikida asi age kapi ga ligwanekera rumwe panyama nomugara.’
15 Oguhwe nozina womukadi ogo va hepa kugava umbangi komasimbi pevero lyositata sawo, ou una kulikida asi kapi ga ligwanekera rumwe panyama nomugara.
16 Oguhwe va hepa kutantera masimbi asi: ‘Ame kwa gava munange gomukadi komugara ogu a mu kware, nye age ana mu nyoka*
17 ntani kuna kumurundira asi ga rugana yininke yoyidona pokutanta asi: “Ame nina gwana umbangi mwamuneni ou una kulikida asi ga ligwanekera panyama nomugara.” Nye umbangi ou una kulikida asi munange kapi ga ligwanekera rumwe panyama nomugara wou.’ Makura vakondi vendi ngava likide masimbi gomositata ekehe olyo.
18 Masimbi gomositata ngava gusa mugara ogo va mu tengeke.
19 Age ngava mu futisa yisiliveli* 100 ntani ngava yi gava koguhwe womukadi, morwa age kwa swaukisa mukadona goMuisraeli ogu ga dira kuligwanekera rumwe panyama nomugara ntani age nga twikira kukara mukadendi. Mugara ogo kapi ngava mu pulisira a zumbe mukadi ogo dogoro konomfa dendi.
20 “Nye nsene mukadi ogo ga yi rugana sili ntani kwato umbangi ou una kulikida asi kapi ga ligwanekera panyama nomugara,
21 va hepa kumutwara pevero lyembo lyoguhwe, ano vagara womositata sawo va hepa kumudipaga nomamanya, morwa age kwa rugana sininke sosidona moIsraeli pokuhondera* apa ga tungire membo lyoguhwe. Yipo nye, mwa hepa kugusa yininke yoyidona mokatji keni.
22 “Nsene mugara va mu gwana kuna kuligwanekera panyama namukadamukwawo, navenye va hepa kuvadipaga. Mwa hepa kugusa mo yininke yoyidona moIsraeli.
23 “Nsene mukadona ogu va vandekera, ogu ga dira kuligwanekera rumwe panyama nomugara, a mu gwana mugara gwapeke mositata a ligwanekere nage panyama,
24 mwa hepa kuvatwara pevero lyositata mu ka va dipage nomamanya morwa mukadona ogo kapi ana takuma, ano mugara age ana swaukisa mukadamukwawo. Yipo nye, mwa hepa kugusa mo yininke yoyidona mokatji keni.
25 “Nye nsene mugara a gwana mukadona ogu va vandekera ponze zositata makura a mu kwatere kononkondo, mugara ogo va mu dipage gelike,
26 ano mukadona ogo kapisi mu mu rugane yuma, age kapi ana tura nzo ezi nazi mu ninkisa va mu dipage. Ngomu rugane yokulifana komugara ogu nga homokera mukwawo makura a mu dipage.
27 Yeeyi age kwa gwene mukadona ogu va vandekera ponze zositata, nye apa ga takumine kwato ogu ga mu poperere.
28 “Nsene mugara a gwana mukadona ogu ga dira kuligwanekera rumwe panyama nomugara ntani kapi va mu vandekera, makura mugara ogo a ligwanekere panyama nage ano konyima yi ya divikwe,
29 mugara ogo ga hepa kugava yisiliveli 50 koguhwe womukadona ogo, makura age nga mu kware. Mokumona asi mugara kwa swaukisa mukadona ogo, age kapi ngava mu pulisira a mu zumbe dogoro konomfa dendi.
30 “Kwato mugara ogu nga hondera nomukadi ogu va kwara oguhwe, yipo nga dire kuswaukisa oguhwe.
Nonkango dokonhi
^ Ndi “mukindiro.”
^ Ndi “a ya mu nyenge.”
^ Ndi “ana mu nyenge.”
^ MoRuhebeli asi “noshekel.” Shekel zimwe kwa hura ponograma 11,4. Tara App. B14.
^ Ndi “pokukara hondedi.”
