Deuteronomium 23:1-25
23 “Kwato mugara ogu nga lipakerera novantu vaJehova nsene asi age kwa mu tuka* pokuzonagura ugara wendi ndi kwa u ndembura.
2 “Kwato muna ogu ga reta mugara nomukadi ava va dira kulikwara paveta nga lipakerera novantu vaJehova ntani kwato gomoruvharo rwendi rokomeho, nga lipakerera novantu vaJehova.
3 “Kwato Muamoni ndi Mumowaba ogu nga lipakerera novantu vaJehova. Kwato gomoruvharo rwawo rokomeho ogu nga lipakerera novantu vaJehova,
4 morwa kapi va mu pere mema nonondya apa mwa tundire moEgipite ntani awo kwa tumine Baramu munaBeyoro gomoPetoro moMesopotamiya a ya mu finge.
5 Nye Karunga gweni Jehova kapi ga purakenene Baramu. Jehova kwa tjindjire efingo lyaBaramu li kare etungiko, morwa Karunga gweni Jehova ga mu hara.
6 Kapisi ngomu va vatere va tunge mombili ndi yi va tompoke.
7 “Kapisi ngomu nyenge Vaedomu, yeeyi awo vakuru veni.
“Kapisi ngomu nyenge Vaegipite, yeeyi one kwa kere vanayirongo mosirongo sawo.
8 Vatekuru vawo wokononkokona kuvhura ngava lipakerere novantu vaJehova.
9 “Apa ngomu dika kamba zeni pepi nononkore deni, ngomu nyokere po yininke yoyidona.*
10 Nsene mugara a nyata morwa kuna piti yuma koyilyo yendi yonomuga, age ga hepa kuza ponze zokamba ntani kapisi a ka tengure mokamba.
11 Apa nga li toka ezuva, age ga hepa kuzogana ntani nye na tengwira mokamba.
12 Mwa hepa kupapara evango lyokulikarera ponze zokamba, ano oko yiko ngomu livaterera.
13 Mwa hepa kukara nosininke sokusimisa, yipo ngomu simise ko nsene kuna kulivatera ntani mu foferese ko nze zeni.
14 Yeeyi Karunga gweni Jehova kugendagura mokamba zeni, yipo a mu popere ntani a gave nonkore deni momawoko geni. Yipo nye, kamba zeni za hepa kupongoka yipo nga dire kugwana mo yininke yokunyata makura nga mu sige.
15 “Kapisi ngomu tengwide mupika kwa hekurwendi nsene asi age kwa hena a wize kweni.
16 Age kuvhura a tunge mokatji keni mositata nkenye esi ana hara. Kapisi ngomu mu tekure momudona.
17 “Kwato muna goMuisraeli a kare asi gomukadi ndi gomugara nga kara hondedi zokontembeli.
18 Kapisi ngomu rete monzugo zaKarunga gweni Jehova yimaliwa eyi ava futu hondedi gomukadi ndi gomugara,* yipo mu sikise mo mugano gweni, yeeyi Karunga gweni Jehova kwa nyenga vantu owo.
19 “Nsene to korotesa Muisraeli mukweni yimaliwa ndi nondya ndi nkenye eyi, wa ha mu pura a fute nsonso.
20 Kuvhura mu pure munayirongo a fute nsonso nye kapisi ngomu pure Vaisraeli vakweni va fute nsonso, yipo Karunga gweni Jehova nga mu tungike mwankenye eyi ngomu rugana mosirongo esi muna kuza mu ka pinge.
21 “Nsene tomu tumbwidire Karunga gweni Jehova yuma, mwa hepa kugenderera kuyisikisa mo yeeyi Karunga gweni Jehova kuna kundindira mu yi sikise mo. Ano nsene kapi muna kuyirugana, one ngomu tura nzo.
22 Nye nsene kapi ngomu tura po mugano, kapi ngomu kara nounzoni.
23 Mwa hepa kusikisa mo eyi omu uyunga ntani neyi omu tumbwidire kwaKarunga gweni Jehova ngonzambo zemeharo lyanyamweni.
24 “Nsene tomu zi moyikunino yovakweni yomandjembere, kuvhura mu lye mandjembere dogoro mu kute nye mwa ha simba gamwe moyipako yeni.
25 “Nsene tomu zi momapya govakweni omu muna kara mbuto, kuvhura mu teze mbuto zokupya nomawoko geni nye mwa ha zi teza nombere.
