Deuteronomium 24:1-22
24 “Nsene mugara a kwara mukadi, nye mukadi ogo kapi a mu hafesa morwa ga dimburura yininke yoyidona kuhamena mukadi ogo, age ga hepa kumutjangera mbapira zelizumbo a zi mu pe noku mu ninka a tunde mo membo lyendi.
2 Konyima zapa na tunda membo, mukadi ogo kuvhura a ka kware mugara gwapeke.
3 Nye nsene mugara gwendi gwauvali a mu nyoka ntani a mu tjangere mbapira zelizumbo a zi mu pe, konyima a mu tantere a tunde mo membo lyendi ndi nsene mugara gwendi gwauvali a dogoroka,
4 mugara gwendi gokuhova ogu ga mu zumba kapi va mu pulisira a mu tengwide morwa age ga linyateka pokukwara mugara gwapeke. Jehova kwa yi nyenga. Kapisi ngomu ture nzo pokurugana yininke oyo mosirongo esi ana kumupa Karunga gweni Jehova ngoupingwa.
5 “Nsene mugara ntani ana kukwara, age kapisi nga ze koyita ndi va mu pe nkenye yirugana. Age kapisi va mu pe yirugana ure womvhura zimwe, nye ga hepa kukara membo a hafese mukadendi.
6 “Kwato ogu va pulisira kukwata emanya lyamukwawo lyokugogera mbuto nosininke sako morwa ga mu korota yuma, ndi ngano kapi nga vhura kuwapaika nondya edi na lya yipo a paruke.
7 “Nsene gumwe a vaka Muisraeli mukwawo, a mu hepeke ntani a mu randese, ano konyima va mu kwate, age va hepa kumudipaga. Mwa hepa kugusa mo yininke yoyidona mokatji keni.
8 “Nsene gumwe ana kara noyingondwe,* mwa hepa kurugana nayinye eyi ngava mu tantera vapristeli woVarevhi. Ngomu yi rugane ngwendi moomu nayi va tantera.
9 Diworokeni eyi ga rugene Karunga gweni Jehova kwaMiliyama monzira zeni zokutunda moEgipite.
10 “Nsene to korotesa mukweni yuma, kapisi o hwilire membo lyendi o ka mu hakane yininke eyi ana ku pe o kwate dogoro nga fute makongo gendi.
11 Wa hepa kusikama ponze, ano mugara ogu wa korotesa nga ku retera yuma eyi ngo kwata dogoro nga fute makongo gendi.
12 Nsene mugara ogo ruhepo, wa hepa kutengwida yininke eyi ana ku pe o kwate komeho li ka toke ezuva.
13 Wa hepa kutengwida yininke eyi ono kwata komeho li ka toke ezuva, yipo a ka rare nosikoverero sendi ntani age nga kutungika, ano Jehova nga kutara asi wa hungama.
14 “Wa ha fukira murugani goruhepo, a kare asi Muisraeli mukweni ndi munayirongo ogu ga tunga mosirongo seni, mositata seni simwe.*
15 Wa hepa kumufuta komeho li ka toke ezuva morwa ana yi hepa ntani moyimaliwa oyo yimo a parukire. Nsene kapi ono kumufuta, age na ka likwambera kwaJehova, makura ove o kare nounzoni.
16 “Vaguhya kapisi ngava va dipage morwa yirugana yovana vawo ano vanona kapisi ngava va dipage morwa yirugana yovaguhya vawo. Nkenye muntu va hepa kumudipaga morwa nzo zamwene.
17 “Mwa ha fukira nsene kuna kupangura vanayirongo ndi nonsigwe ntani mwa ha kwata sikoverero somufisayendi dogoro nga fute makongo gendi.
18 Diworokeni asi one kwa kere vapika moEgipite ano Karunga gweni Jehova yiyo ga mu zowere. Eyi yiyo nina kumutanterera mu rugane yininke eyi.
19 “Nsene tomu pongaike mbuto zeni momapya makura mu divare situngu simwe mepya, mwa ha si tengwira. Mwa hepa kusisigira vanayirongo nononsigwe ntani novafisavayavawo, yipo Karunga gweni Jehova nga mu tungike mwanayinye eyi ngomu rugana.
20 “Nsene tomu pongaike nonzwe, kapisi ngomu nyange edi ngadi hupa ko konomutayi nye mwa hepa kudisigira vanayirongo, nonsigwe ntani novafisavayavawo.
21 “Nsene tomu nyanga mandjembere gomoyikunino yeni, kapisi ngomu tengure mu ka nyange aga nga ga hupa ko. Mwa hepa kugasigira vanayirongo, nonsigwe ntani vafisavayavawo.
22 Diworokeni asi one kwa kere vapika mosirongo saEgipite. Eyi yiyo nina kumutanterera mu rugane yininke eyi.
Nonkango dokonhi
^ Nkango zoRuhebeli “yingondwe” kutanta yoyinzi ntani azo kuvhura kutamba komauvera gokulisiga-siga gokosipapa. Azo kuvhura hena kutamba kouvera wokuvhura kukagura ou au kara koyikoverero ntani momambo.
^ MoRuhebeli asi “momarungavero geni.”
