Deuteronomium 25:1-19
25 “Nsene vantu vana kara noudigu pokatji kawo, va hepa kuza kovapanguli va ka va pangure, makura awo ngava ka divisa ogu ana kara mouhunga nogu ana kara mepuko.
2 Nsene ogu ana kara mepuko ana wapere kumusopora, mupanguli nga mu ninka a rare pevhu va mu sopore. Age ngava mu sopora kuliza nounzoni wendi.
3 Age kuvhura va mu sopore yikando yokusika 40, nye kapisi va pitakane opo. Nsene va mu sopora yikando yokupitakana opo, age kuvhura nga swauke komeho zeni.
4 “Mwa ha manga ntwedu kokana nsene tazi hwaga mbuto.
5 “Nsene vantu namumbyendi wovagara kwa likara pepi makura gumwe a dogoroke ga hana kureta muna gomugara, mukadanakufa kapisi nga kwarere mepata lyapeke. Nye swara zendi ga hepa kumukwara, yipo a sikise mo situmbukira sendi.
6 Munendi gombeli ogu ngava reta kumwe, va hepa kumuruka edina lyanakufa, yipo edina lyendi ngava dire kulidivara moIsraeli.
7 “Nsene mugara ana nyoka kukwara swara zendi, mukadanakufa ga hepa kuza komasimbi perungavero lyositata a ka tante asi: ‘Swara zange ana nyoka kukwara nge yipo edina lyanakufa ngava dire kulidivara moIsraeli. Age kapi ana hara kusikisa mo situmbukira sendi pokukwara nge.’
8 Masimbi gomositata sawo ga hepa kuzigida mugara ogo va ka mu uyungise. Nsene a twikira kutanta asi: ‘Kapi nina hara kumukwara,’
9 mukadanakufa ga hepa kumuhedera komeho zomasimbi a mu huture sicapa sendi nokumufizira kosipara makura a tante asi: ‘Eyi yiyo nga yi horokera mugara ogu nga nyoka kuretera mukurwendi ndi mumbyendi muna.’
10 Kutunda opo, ekoro lyendi nga li divikwa moIsraeli asi: ‘Epata lyomugara ogu va hutura sicapa.’
11 “Nsene vagara vavali kuna kurwana, makura mukada gwagumwe a ya popere mugara gwendi pokudera koyilyo yonomuga yogu ana kumutoona,
12 mwa hepa kuteta ewoko lyomukadi ogo. Kapisi ngomu mu fire nkenda.
13 “Mwa ha kara nomamanya gavali gokumetesa monondjato deni, limwe lyenene ano limwe lyenunu.
14 Mwa ha kara noyipako yivali yokumetesa momambo geni,* simwe sosinene ano simwe sosinunu.
15 Mwa hepa kukara noyimeteso ntani noyiviha youhunga, yipo ngomu paruke siruwo sosire mosirongo esi ana kumupa Karunga gweni Jehova.
16 Yeeyi Karunga gweni Jehova kwa nyenga muntu ogu a rugana yininke eyi yokudira kuhungama.
17 “Diworokeni eyi va mu rugene Vaamareki apa mwa tundire moEgipite,
18 awo kwa mu gwene monzira, tava homokere ava va kere konyima apa mwa rorokere unene. Awo kapi va tjilire Karunga.
19 Apa nga mu pwizumukisa Karunga gweni Jehova kononkore nadinye edi da mu kundurukida mosirongo esi ana kumupa Karunga gweni Jehova mu pinge, mwa hepa kuzonagura po Vaamareki navenye pevhu yipo ngava dire kuvadiworoka. Kapisi ngomu yi divare.
Nonkango dokonhi
^ MoRuhebeli asi “mwa ha kara nonoephah mbali momambo geni.” Tara App. B14.
