Deuteronomium 26:1-19
26 “Apa ngomu ka sika mosirongo esi ana kumupa Karunga gweni Jehova ngoupingwa, makura ngomu tunge mo,
2 mwa hepa kugusa pomuzangu* gweni gokuhova ogu ngomu zangura mosirongo esi ana kumupa Karunga gweni Jehova mu gu ture posikumba, makura ngomu ze kevango eli nga horowera Karunga gweni Jehova edina lyendi.
3 Ngomu ze komupristeli goposiruwo oso, mu ka mu tantere asi: ‘Neina ame kuna wiza kwaKarunga gwetu Jehova, ni ya tante asi ame nina ya siki mosirongo esi ga tumbwidira Jehova ozinyakurwetu asi nga si tu pa.’
4 “Mupristeli makura nga gusa sikumba esi ngomu mu twarera, a si ture komeho zosizambero saKarunga gweni Jehova.
5 Makura ngomu uyunge komeho zaKarunga gweni Jehova asi: ‘Ozinyakurwetu kwa kere Vaarameya ava ngava renda-renda. Awo kwa zire koEgipite, tava ka tunga ngovanayirongo novana vawo wovasesu. Nye oko yiko rwa ka ligwedererere ruvharo rwawo, tava kara wovanzi ntani wononkondo.
6 Ano Vaegipite kwa tu tekwire momudona ntani kwa tu hepekere, tava tu ninki tu kare vapika.
7 Makura yipo twa likwamberere kwaJehova Karunga gozinyakurwetu, ano Jehova yipo ga tu zuvhire, ta mono ruhepo rwetu noudigu wetu.
8 Konyima yipo ga tu gusire Jehova moEgipite nononkondo dendi dononene noyirugana yendi yokutukukisa noyidiviso ntani noyitetu.
9 Makura yiyo ga tu reta kevango eli, ta tu pe sirongo esi sa zura masini nousi.
10 Ngesi tuna reta muzangu gwetu gokuhova ogu twa zangura mosirongo esi ga tu pa Jehova.’
“Ngomu ture sikumba oso komeho zaJehova ntani ngomu nyongamene Karunga gweni Jehova.
11 Makura one ngomu hafera yininke yoyiwa eyi ga mu pa Jehova kumwe nomapata geni noVarevhi ntani novanayirongo ava va tunga mokatji keni.
12 “Momvhura zautatu apa ngomu pongaika yiumurongo yomuzangu gweni, mwa hepa kuyigava koVarevhi, kovanayirongo, kononsigwe ntani kovafisavayavawo. Ngomu va sige va lire moyitata yeni* dogoro va kute.
13 Makura ngomu tante komeho zaKarunga gweni Jehova asi: ‘Ame nina gusa membo lyange ruha rokupongoka ntani nina ru gava koVarevhi, kovanayirongo, kononsigwe ntani kovafisavayavawo, ngwendi moomu wa pangera nge. Ame kapi na teza po veta zoge.
14 Ame kapi na lya po apa na guvire morwa na fisa ndi ni guse po ame nina nyata ndi ni gusire po vafe. Ame kwa limburukwa eyi ga tantera nge Karunga gwange Jehova ntani na sikisa mo nayinye eyi ga pangera nge.
15 Ove wa kara meguru, mevango lyoge lyokupongoka, nyongama o tare pevhu ntani tungika vantu woge Vaisraeli nosirongo esi wa tu pa esi sa zura masini nousi, ngwendi moomu wa tumbwidilire ozinyakurwetu.’
16 “Neina Karunga gweni Jehova kuna kumupangera mu sikise mo nompangera nonoveta edi. Mwa hepa kudilimburukwa ntani mwa hepa kudisikisa mo nomutjima gweni nagunye nomwenyo* gweni nagunye.
17 Neina, Jehova kuna kumutumbwidira asi age nga kara Karunga gweni nsene mu limburukwa nompangera dendi nonoveta dendi ntani nsene mu twikira kupurakena kweyi ana kumutantera.
18 Ntani neina Jehova ana kara nehuguvaro asi one ngomu kara vantu vendi ndi emona lyendi lyokulikarera, ngwendi moomu ga mu tumbwidira ntani asi one ngomu limburukwa nompangera dendi nadinye.
19 Makura age nga mu zerura mu pitakane nomuhoko nadinye edi ga tura po, ngwendi moomu ga mu tumbwidira. Age nga ninka vantu va mu pandadeke ntani nga mu ninka mu fumane nsene mu likida kwaKarunga gweni Jehova asi one vantu wokupongoka.”
Nonkango dokonhi
^ MoRuhebeli asi “penyango.”
^ MoRuhebeli asi “momarungavero geni.”
^ Tara koMauzera.
