Deuteronomium 27:1-26
27 Makura Mosesa nomasimbi goVaisraeli tava tantere vantu asi: “Limburukweni nompangera edi nina kumutantera naina.
2 Apa ngomu ruta mukuro gwaJorodana mu ze mosirongo esi ana kumupa Karunga gweni Jehova, ngomu ture mamanya gomanene, mu ga kwite munoko.*
3 Makura apa ngomu ruta mukuro gwaJorodana, ngomu tjange Veta ezi pomamanya ogo yipo ngomu ze mosirongo esi ana kumupa Karunga gweni Jehova, esi sa zura masini nousi, ngwendi moomu ga yi mu tumbwidira Jehova Karunga gozinyakurweni.
4 Ano apa ngomu ruta mukuro gwaJorodana, ngomu rugane eyi nina kumupangera naina. Ngomu ture mamanya aga poNdundu zaEbali, mu ga kwite munoko.*
5 Ngomu dikire hena Karunga gweni Jehova kevango olyo sizambero somamanya. Kapisi ngomu ruganese yivera mokuteta mamanya ogo.
6 Mwa hepa kutungira Karunga gweni Jehova sizambero somamanya aga va dira kuteta ntani ngomu zambere po nonzambo deswakerero kwaKarunga gweni Jehova.
7 Ngomu zambere po nonzambo dombili, mu di lire poopo mu hafe komeho zaKarunga gweni Jehova.
8 Ntani ngomu tjange nawa Veta ezi pomamanya ogo.”
9 Makura Mosesa novapristeli woVarevhi tava tantere Vaisraeli asi: “One Vaisraeli, mweneni mu purakene. Naina one muna kara vantu vaKarunga gweni Jehova.
10 Purakeneni eyi ana kumutantera Karunga gweni Jehova nokusikisa mo nompangera nonoveta dendi edi nina kumutantera naina.”
11 Ezuva olyo Mosesa kwa pangerere vantu asi:
12 “Konyima zapa ngomu ruta mukuro gwaJorodana, marudi aga gana kukwama ko ngaga sikame poNdundu zaGelisimu ga tungike vantu: rudi rwaSimiyoni, Revhi, Juda, Isasikali, Josefa ntani naMbenyameni.
13 Ano marudi aga gana kukwama ko ngaga sikame poNdundu zaEbali ga finge vantu: rudi rwaRubena, Gada, Aseli, Seburoni, Dana ntani naNafitali.
14 Ano Varevhi ngava zigire va tantere Vaisraeli asi:
15 “‘Mugara ogu nga liruganena efano ndi sikarunga sosivera a si karere mokahore-hore ngava mu finge. Jehova kwa nyenga vantu navenye ava ava rugana yininke oyo nowawoko gawo.’ (Makura vantu navenye ngava tante asi: ‘Amen!’*)
16 “‘Nkenye ogu nga tekura ozina ndi oguhwe momudona ngava mu finge.’ (Makura vantu navenye ngava tante asi: ‘Amen!’)
17 “‘Nkenye ogu nga dirura sidiviso somururani gwamukwawo ngava mu finge.’ (Makura vantu navenye ngava tante asi: ‘Amen!’)
18 “‘Nkenye ogu nga ninkisa mutwiku a zumbane monzira ngava mu finge.’ (Makura vantu navenye ngava tante asi: ‘Amen!’)
19 “‘Nkenye ogu nga dira kutekura mouhunga vanayirongo, nonsigwe ndi vafisavayavawo ngava mu finge.’ (Makura vantu navenye ngava tante asi: ‘Amen!’)
20 “‘Nkenye ogu nga ligwanekera panyama nomukadi ogu va kwara oguhwe ngava mu finge, yeeyi age ana swaukisa oguhwe.’ (Makura vantu navenye ngava tante asi: ‘Amen!’)
21 “‘Nkenye ogu nga ligwanekera panyama nosikorama ngava mu finge.’ (Makura vantu navenye ngava tante asi: ‘Amen!’)
22 “‘Nkenye ogu nga ligwanekera panyama nampanzendi, yi kare asi guhyawo gumwe ndi zinyawo gumwe ngava mu finge.’ (Makura vantu navenye ngava tante asi: ‘Amen!’)
23 “‘Nkenye ogu nga ligwanekera panyama nangumweyi zendi ngava mu finge.’ (Makura vantu navenye ngava tante asi: ‘Amen!’)
24 “‘Nkenye ogu nga homokera mukwawo a mu dipage ngava mu finge.’ (Makura vantu navenye ngava tante asi: ‘Amen!’)
25 “‘Nkenye ogu nga tambura uhwi* yipo a dipage muntu gokudira unzoni ngava mu finge.’ (Makura vantu navenye ngava tante asi: ‘Amen!’)
26 “‘Nkenye ogu nga dira kusikisa mo Veta ezi ngava mu finge.’ (Makura vantu navenye ngava tante asi: ‘Amen!’)
Nonkango dokonhi
^ Ndi “mu ga kwite yininke yoyizera.”
^ Ndi “mu ga kwite yininke yoyizera.”
^ Ndi “Yikare ngorooro!”
^ Ndi “yimaliwa.”
