Deuteronomium 28:1-68
28 “Ano nsene mu purakena eyi ana kumutantera Karunga gweni Jehova pokusikisa mo nompangera dendi nadinye edi nina kumutantera neina, Karunga gweni Jehova nga mu zerura kupitakana nomuhoko nadinye edi da kara pevhu.
2 Nsene mu twikira kulimburukwa kweyi ana kumutantera Karunga gweni Jehova, one nga ga mu gwana matungiko aga gomanzi ntani kapi ngomu vhura kugahenduka:
3 “One ngava mu tungika moyitata yeni ntani monomukunda deni.
4 “Vana veni nomuzangu gweni ntani nononzwi noyitana yeni eyi ngayi vhara yimuna yeni ngava yi tungika.
5 “Age nga tungika yikumba yeni eyi omu tura mbuto ntani marupasa gomanene aga omu duvire mboroto.
6 “One ngava mu tungika mwankenye eyi ngomu rugana.
7 “Jehova nga ninka nonkore deni edi ngadi mu homokera va di funde one kuna kutara. Awo ngava mu homokera koruha rumwe, nye ngava duka va tjwayukire komaruha ntambali.
8 Jehova nga tungika nonzugo deni edi omu pungwire nondya ntani nankenye eyi ngomu rugana. Karunga gweni Jehova nga mu tungika mosirongo esi ana kumupa.
9 Jehova nga mu ninka mu kare vantu vendi wokupongoka ngwendi moomu ga mu tumbwidira, yeeyi one kulimburukwa nompangera daKarunga gweni Jehova.
10 Vantu navenye vepevhu ngava mona asi one vantu vaJehova ntani awo ngava mu tjira.
11 “Jehova nga mu pa vana wovanzi noyimuna yoyinzi ntani one ngomu zangura mbuto zonzi mosirongo esi ga tumbwidira Jehova ozinyakurweni asi nga si mu pa.
12 Jehova nga zegurura eguru ndi nzugopungwiro zendi, yipo a mu rokesere mvhura posiruwo sazo ntani a tungike nayinye eyi ngomu rugana. One ngomu korotesa nomuhoko dononzi, nye one kapi ngomu korota.
13 Nsene mu twikira kulimburukwa nompangera daKarunga gweni Jehova edi nina kumutantera naina, Jehova nga mu ninka mu va pangere ano awo ngava kara mepangero lyeni. Age nga mu zerura kupitakana vantu navenye ntani kapi nga va pulisira va mu pangere.
14 Mwa hepa kusikisa mo nayinye eyi nina kumutantera naina ntani kapisi ngomu karere yikarunga yoyimpempa.
15 “Nye nsene kapi muna kupurakena kweyi ana kumutantera Karunga gweni Jehova pokudira kulimburukwa nompangera nonoveta dendi nadinye edi nina kumutantera naina, one ngava mu finga ntani ngomu ligwanekera noyininke nayinye eyi yoyidona:
16 “One ngava mu finga moyitata yeni ntani monomukunda deni.
17 “Ngava finga yikumba yeni eyi omu tura mbuto ntani marupasa gomanene aga omu duvire mboroto.
18 “Vana veni nomuzangu gweni nononzwigona ntani noyitana yeni ngava yi finga.
19 “One ngava mu finga mwankenye eyi ngomu rugana.
20 “Jehova nga finga nkenye eyi ngomu rugana. Age nga mu ninka mu piyagane ntani nga mu tengeka dogoro ngomu hanauke po, morwa yirugana yeni yoyidona ntani morwa mwa mu siga.*
21 Jehova nga mu ninka li mu gwane ehamba lyokudira kuveruka dogoro nga mu hanagure po mosirongo esi muna kuza mu ka pinge.
22 Jehova nga mu tumina uvera wokapunga,* ngomu pyapyara morutu, ngomu dunda, nga u mu gwana upyu wounene, yita, mpepo zoupyu ntani yimeno yeni ngayi kukuta. Yininke oyo ngayi mu hepeka dogoro ngomu hanauke po.
23 Age nga ninka eguru li dire kumupa mvhura* ano evhu lyeni li dire kumena yuma.*
24 Jehova nga ninka evhu nombundu yi tunde meguru yi gwire mosirongo seni, dogoro nga mu hanagure po.
25 Jehova nga ninka nonkore deni di mu funde. One ngomu homokera nonkore deni koruha rumwe, nye ngomu duka mu tjwayukire komaruha ntambali. Mapangero nagenye gepevhu nga ga kara nowoma apa ngava mona yininke yoyidona eyi ya mu horokera.
26 Yidira nayinye noyikorama yiyo ngayi mu lya apa ngomu fa, kwato ogu ngayi tjilisa.
27 “Jehova nga mu ninka mu kare nomasina goVaegipite, nomusira noyimburwa ntani nokuzuga ntani one kapi ngomu veruka komauvera aga.
28 Jehova nga mu ninka mu zaruke, mu twike ntani mu piyagane.
29 Mutenya one ngomu papatera ngwendi moomu a papatere mutwiku momundema ntani nkenye eyi ngomu rugana kapi ngayi mu tompoka. One ngava mu fukira nkenye apa ntani ngava mu vaka, kwato ogu nga mu vatera.
30 One ngomu vandekera mukadi, nye age nga mu kwatera kononkondo mugara gwapeke. One ngomu dika nzugo nye kapi ngomu tunga mo. One ngomu wapaika sikunino somandjembere, nye kapi ngomu lya enyango lyamo.
31 Ntwedu zeni ngava zi dipaga one kuna kutara, nye kapi ngomu lya ko. Sindongi seni ngava si vaka komeho zeni, nye kapi ngava si mu tengwidira. Nzwi zeni ngava zi gava kononkore deni, nye kwato ogu nga mu vatera.
32 Vana veni wovagara nava wovakadi ngava va gava kovantu vapeke one kuna kutara. One ngomu va rongora nye kwato eyi ngomu rugana ko.
33 Muzangu gweni ntani nonondya deni ngava di lya vantu ava mwa dira kudiva. One ngava mu fukira nkenye apa ntani ngava mu hepeka.
34 Yininke eyi ngomu mona ngayi mu ninkisa mu zaruke.
35 “Jehova nga mu tumina masina gokukora ntani gokudira kuveruka. Ago ngaga mu kara ponongoro deni nomomaguru ntani kutundilira konompadi dogoro komutwe.
36 Jehova nga mu tjida kumwe nahompa ogu ngomu horowora, mu ze kosirongo esi mwa dira kudiva kumwe nozinyakurweni. Ano one ngomu ka karera yikarunga eyi va honga neyi yomamanya kosirongo oso.
37 Apa ngomu ka sika kosirongo esi nga mu tjidira Jehova, yininke eyi ya mu horokera ngayi tjilisa vantu. Awo ngava mu zora ntani ngava mu sindagura.
38 “One ngomu kuna mbuto zonzi momapya geni nye yoyisesu tupu ngomu zangura, yeeyi simbonde nga lya mbuto zeni.
39 One ngomu tapeka nokuwapaika yikunino yeni yomandjembere, nye kapi ngomu nwa vhinyu ndi mu zangure mo yuma, morwa maginyo nga ga yi lya po.
40 Mosirongo seni nasinye nga mu kara yitji yomauzwe, nye kapi ngomu likwita magadi, morwa nonzwe ngadi gwako.
41 One ngomu reta vana wovagara nava wovakadi, nye kapi ngava kara veni morwa awo ngava va twara kounkwate.
42 Yimbumburu nga yi lya yitji yeni nayinye nombuto zeni.
43 Vanayirongo ava va kara mokatji keni ngava kara nononkondo, nye one ngomu zumbanesa nonkondo edi mwa kere nado.
44 Awo ngava mu korotesa, nye one kapi ngomu va korotesa. Awo ngava mu pangera ano one ngomu kara mepangero lyawo.
45 “One ngava mu finga ntani ngayi mu horokera yininke eyi yoyidona dogoro ngomu hanauke po, morwa one kapi mwa purakena eyi ga mu tantera Karunga gweni Jehova pokudira kusikisa mo nompangera nonoveta dendi.
46 Ntani yininke eyi ngayi mu horokera kumwe noruvharo rweni, yipo ngayi kare sidiviso nerondoro dogoro narunye,
47 morwa kapi mwa karera Karunga gweni Jehova nomutjima goruhafo apa mwa kere noyininke yoyinzi.
48 Jehova nga mu tumina nonkore deni, ano one ngomu di ruganena nonzara nenota noyikoverero yoyidona mwa hana yuma. Nonkore deni ngadi mu tura moupika* dogoro ngomu hanauke po.
49 “Jehova nga ninka muhoko gokoure gu mu homokere ngwendi ekuvi. Ago kuuyunga eraka eli ngomu dira kuzuvha.
50 Ago muhoko ogu gwa kara nemoneko lyokutjilisa ntani kapi ngagu fira nkenda vakurupe ndi vanonagona.
51 Awo ngava lya yimuna yeni nomuzangu gweni dogoro ngomu hanauke po. Awo kapi ngava mu sigira po mbuto, vhinyu zompe ndi magadi, yitana ndi nonzwigona, dogoro ngava mu zonagure po.
52 Awo ngava kundurukida sirongo seni nasinye, mu dire kutunda moyitata yeni* dogoro makuma geni gomare aga mwa huguvara ngaga gwe. Awo ngava kundurukida yitata yeni nayinye eyi ya kara mosirongo esi ga mu pa Karunga gweni Jehova.
53 Makura one ngomu lya vana veni wovagara nava wovakadi ava ga mu pa Karunga gweni Jehova, morwa nonkore deni ngadi kundurukida yitata yeni di mu retere maudigu.
54 “Nampili mugara ogu a paruka eparu lyewa ntani gonkenda, kapi nga fira mukwawo nkenda ndi mukadendi ogu ga hara ndi vana vendi wovagara ava ngava hupa po,
55 ntani age kapi ngava pa ko nyama zovana vendi ava nga lya, morwa kapi nga kara noyuma, yeeyi nonkore dawo ngadi va kundurukida di va retere maudigu.
56 Ano mukadi ogu a paruka eparu lyewa mokatji keni ntani gonkenda ogu nga dili kugenda porupadi morwa kuparuka nawa, kapi nga likida nkenda kwamugara gwendi ogu ga hara ndi munendi gomugara ndi gomukadi.
57 Age kapi ngava pa ko nyama zamunendi ogu nga hampuruka ntani noyininke eyi ayi pwaga apa ava hampuruka mukeke. Age ngayi lya mokahore-hore, yeeyi nonkore dawo ngadi va kundurukida di va retere maudigu.
58 “Nsene kapi ngomu limburukwa Veta ezi va tjanga mobuke ezi ntani mu dire kufumadeka unene edina lyaKarunga gweni Jehova eli lya fumana,
59 Jehova nga mu tumina none novana veni mahepeko gomanene gokudira kuhaga ntani nomauvera gokudira kuveruka.
60 Age nga mu retera mauvera goVaegipite aga mwa tjilire ntani kapi ngomu veruka komauvera ogo.
61 Jehova nga mu retera hena mauvera nomahepeko aga va dira kutjanga mobuke ezi zoVeta dogoro ngomu hanauke po.
62 Nampili ngomu mwa kara wovanzi ngwendi nombungururu dekeguru, wovasesu tupu ngomu hupa po, yeeyi kapi mwa limburukwa eyi ga mu tantera Karunga gweni Jehova.
63 “Jehova ngayi hafera kumuzonagura po ntani nga mu tjida mo mosirongo esi muna kuza mu ka pinge, ngwendi moomu tupu ga yi haferere Jehova kumutungika nokuvhukisa sivaro seni.
64 “Jehova nga mu ninka mu lihanene mokatji konomuhoko uzuni mudima, ano konomuhoko odo one ngomu ka karera yikarunga eyi va honga neyi yomamanya eyi mwa dira kudiva kumwe nozinyakurweni.
65 One kapi ngomu kara nombili mokatji konomuhoko odo ndi mu kare nomavango gokupwizumukira. Nye Jehova nga mu ninka mu kare nosinka, mu dire kumona nawa, one hena ngomu dompa mutjima.
66 Eparu lyeni ngali kara mosiponga ntani one ngomu kara noutjirwe mutenya nomasiku. One kapi ngomu kara nehuguvaro lyokuparuka.
67 Ngurangura one ngomu tanta asi: ‘Litoke usimbu!’ ano masiku one ngomu tanta asi: ‘Lise usimbu!’ morwa utjirwe ou ngomu kara nawo ntani neyi ngomu mona.
68 Jehova nga mu tengwida koEgipite nosikepa, mu pite nzira ezi na mu tanterere asi: ‘Kapi ngomu zi mona hena.’ One ngomu ka lirandesa kononkore deni mu kare vapika vawo, nye kwato ogu nga mu randa.”
Nonkango dokonhi
^ MoRuhebeli asi “mwa siga nge.”
^ Ndi “uvera woTB.”
^ MoRuhebeli asi “nga ninka eguru lyeni li kare ngwendi ngoporo.”
^ MoRuhebeli asi “nga ninka evhu lyeni li kare ngwendi sivera.”
^ MoRuhebeli asi “ngava mu tura ndjoko zosivera monsingo.”
^ MoRuhebeli asi “momarungavero geni.”
