Deuteronomium 29:1-29
29 Edi kuna kara nonkango degwanekero* eli ga tulisire po Jehova kumwe noVaisraeli mosirongo saMowaba kupitira mwaMosesa. Karunga kwa tulisire po hena egwanekero kumwe nawo momukunda gwaHoreba.
2 Makura Mosesa ta zigida Vaisraeli navenye, ta va tantere asi: “One mwa mwene eyi ga rugene Jehova kwaFarawo novakareli vendi navenye nosirongo sendi nasinye saEgipite,
3 one mwa mwene mahepeko noyidiviso ntani noyitetu.
4 Nye Jehova kapi ga mu ninka mu kwate egano eyi mwa mwene neyi mwa zuvhire dogoro nampili naina.
5 Age kuna tanta asi: ‘Apa na mu pitisilire momburundu nomvhura 40, yikoverero yeni noyicamakaku eyi mwa dwere konompadi deni kapi ya kurupire.
6 One kapi mwa lire mboroto ndi mu nwe vhinyu ndi nkenye marovhu, yipo mu dive asi ame nyame Karunga gweni Jehova.’
7 Apa twa ya sikire pevango eli, Sihoni hompa gwaHesiboni naOgo hompa gwaBasani kwa wizire va ya tu rwanese, nye ose yipo twa va fundire.
8 Konyima tatu gusa sirongo sawo, tatu si gava korudi rwaRubena noru rwaGada ntani kovantu vamwe womorudi rwaManase.
9 Yipo nye, limburukweni nonkango degwanekero eli, yipo ngayi mu tompoke nayinye eyi ngomu rugana.
10 “Naina namuvenye kuna sikama komeho zaKarunga gweni Jehova nomasimbi gomomarudi geni nomasimbi geni novapitisili novagara navenye woVaisraeli,
11 novana veni novakadi veni ntani novanayirongo ava va tunga mokatji keni, kutundilira kogu a mu tjavere yitare dogoro kogu a mu vhetere mema.
12 Neina one kuna wiza mu ya gane mokukwatesa ko egwanekero lyaJehova, eli ana kutulisa po Karunga gweni Jehova kumwe none,
13 yipo a mu ninke mu kare vantu vendi, ano age a kare Karunga gweni, ngwendi moomu ga mu tumbwidira kumwe nozinyakurweni Abirahamu, Isaka naJakopo.
14 “Ame kapi tupu nina kutulisa po egwanekero eli nomugano kumwe none
15 ava muna sikama komeho zaKarunga gwetu Jehova, nye ame kuna kutulisa po hena egwanekero eli kumwe nava vana dili kukara po naina.
16 (Yeeyi one mwa yi diva omu twa ka sikire mosirongo saEgipite nomu twa pitire mokatji konomuhoko dokulisiga-siga morugendo rwetu.
17 One mwa mwene yininke yawo yokunyata ntani yikarunga yawo yokunyata yokuhonga neyi yomamanya neyi yosisiliveli nongorodo eyi ya kere mokatji kawo.)
18 Takameseni yipo mokatji keni mu dire kukara mugara ndi mukadi, epata ndi rudi oru ngaru hageka kukarera Karunga gwetu Jehova, ru ka karere yikarunga eyi adi karere nomuhoko edi. Muntu gwangoso kwa fana ngwendi ndandani zositji esi asi yimi enyango lyouhungu ntani ngwendi sitji soururu.
19 “Nye nsene gumwe ogu ana kuzuvha nonkango edi domugano a tanta momutjima gwendi asi: ‘Ame nga yi tompoka nge nye nina hara kurugana eyi guna tokomene mutjima gwange.’ Ogu nga kara pepi nomuntu gwangoso, ngava mu zonagura po.
20 Jehova kapi nga mu gusira po, nye ehandu lyaJehova lyenene nga li mu gwana ntani nga ligwanekera nomaudigu aga va tjanga mobuke ezi. Jehova nga ninka edina lyendi va dire kulidiworoka pevhu.
21 Jehova nga mu gusa mo mokatji komarudi nagenye goVaisraeli ntani nga ninka maudigu ga mu gwane. Age nga ligwanekera nomaudigu aga ngava ligwanekera nago vantu ava ava teza po egwanekero kuliza nomu va yi tjanga mobuke ezi zoVeta.
22 “Ruvharo rweni rokomeho ntani novanayirongo ava ngava tunda koure ngava mona mahepeko nomauvera aga nga reta Jehova mosirongo.
23 Karunga nga zonagura po sirongo nasinye nomundiro ntani nomungwa, yipo ngava dire kukuna mo ndi mu mene yimeno ngwendi moomu ya horokerere Sodoma naGomora naAdima ntani Seboyimu, yitata eyi ga zonagwire po Jehova morwa kwa handukire.
24 Vana veni novanayirongo ntani nonomuhoko dapeke ngava lipura asi: ‘Morwasinke Jehova ga zonagwira po sirongo esi? Yisinke ya mu ninkisire a handuke unene?’
25 Makura vantu ngava tanta asi: ‘Yeeyi awo kapi va sikisa mo egwanekero lyaJehova Karunga gozinyakurwawo, eli ga tulisire po kumwe nawo apa ga va gusire mosirongo saEgipite.
26 Awo kwa karerere yikarunga yapeke, tava yi nyongamene, yikarunga eyi va dilire kudiva ntani age hena kapi ga va pulisilire va yi karere.
27 Makura Jehova yipo ga handukilire vantu womosirongo oso, ta va retere maudigu aga va tjanga mobuke ezi.
28 Jehova yipo ga va gusa mo mosirongo, morwa age kwa handukire unene makura tava twara kosirongo sapeke oku vana kara naina.’
29 “Karunga gwetu Jehova ga diva yininke nayinye yemehoramo, nye age kwa tu tantera noruvharo rwetu eyi ga here tu dive, yipo tu sikise mo Veta zendi.
Nonkango dokonhi
^ Ndi “delizuvhasano.”
