Deuteronomium 3:1-29
3 “Makura tatu piruka tu gende Nzira zaBasani, ano Ogo hompa gwaBasani ta wiza kumwe novantu vendi navenye a ya tu rwise moEdereyi.
2 Makura Jehova yipo ga tanterere nge asi: ‘Wa ha mu tjira, yeeyi ame ngani mu gava momawoko goge kumwe novantu vendi navenye ntani nosirongo sendi. Ove ngo mu rugana ngwendi moomu wa rugene Sihoni hompa goVaamoli, ogu ga tungire moHesiboni.’
3 Yipo nye, Karunga gwetu Jehova kwa geve hena Ogo, hompa gwaBasani novantu vendi navenye momawoko getu. Ano ose kwa va rwanesere dogoro tatu va dipaga navenye.
4 Ose kwa gusire yitata nayinye 60 yomomukunda gwaArogobo ndi mukunda ogu nga pangere hompa Ogo gwaBasani.
5 Yitata nayinye eyi kwa yi kundurukidire makuma gomare ntani kwa kere nomarungavero noyininke yokupatesa ko.* Ose kwa gusire hena nodoropagona dononzi.
6 Nye ose kwa yi zonagwire po ngwendi moomu twa zonagwire yitata yaSihoni hompa gwaHesiboni, kukwatera mo vagara novakadi ntani novanona.
7 Makura tatu gusa yimuna nayinye ntani nemona lyomoyitata yawo.
8 “Yipo nye, ose kwa gusire sirongo sovahompa vavali woVaamoli ava va kere momukunda gwaJorodana, kutundilira koMuramba gwaArunoni dogoro koNdundu zaHeremoni
9 (ndundu ozo ngava zi tumbura Vasidoni asi Siliyoni, ano Vaamoli ngava zi tumbura asi Senire),
10 yitata nayinye yokondundu nomukunda nagunye gwaGiliyata naBasani dogoro koSareka naEdereyi, yitata eyi nga pangere hompa Ogo gwaBasani.
11 Yeeyi Ogo hompa gwaBasani yige gelike ga hupire po poVarefa. Sikesa sendi kwa si rugene nosivera* ntani simpe mosili momukunda goVaamoni moRaba. Monaure aso kwa kere nometa ne,* ano monompatji daso kwa kere nometa 1,78.*
12 Ose kwa gusire sirongo kutundilira kositata saAroere, esi sa karera pepi noMuramba gwaArunoni nomukunda gumwe gonondundu gwaGiliyata. Ame kwa geve yitata yamo korudi rwaRubena noru rwaGada.
13 Ano mukunda nagunye gwaGiliyata ntani nomukunda gwaBasani ogu nga pangere hompa Ogo, ame kwa gu geve kovantu vamwe womorudi rwaManase. Mukunda nagunye gwaArogobo ndi asi Basani kwa divikwire asi mukunda goVarefa.
14 “Jaire munaManase kwa gusire mukunda nagunye gwaArogobo dogoro komururani goVagesure noVamakati. Ano age kwa rukire nomukunda daBasani edina lyendi Havoti-jaire* dogoro ngesi.
15 Ntani ame kwa geve mukunda gwaGiliyata kwaMakire.
16 Ano rudi rwaRubena noru rwaGada, ame kwa ru pere sirongo kutundilira komukunda gwaGiliyata dogoro koMuramba gwaArunoni. Mururani gwawo kwa kere pokatji komuramba ogo, ano nomururani dawo kwa ka sikire hena koMuramba gwaJaboko, ogu gwa kere mururani goVaamoni,
17 ntani koAraba ndi mukuro gwaJorodana nezenga lyako kutundilira koKinereti dogoro kEfuta lyaAraba nekEfuta lyoMungwa* dogoro kedi lyonondundu daPisiga koUpumezuva.
18 “Makura yipo na mu pere mpangera ezi asi: ‘Karunga gweni Jehova ga mu pa sirongo esi mu si pinge. Vagara navenye wouradi va ze koyita, va pite komeho zoVaisraeli.
19 Vakadi veni novana veni noyimuna yeni (Na yi diva asi one kwa kara noyimuna yoyinzi) yiwo velike ngava twikira kutunga moyitata eyi na mu pa,
20 dogoro Jehova nga ruganene vakweni eyi ga mu ruganena ntani dogoro ngava guse nawo sirongo esi gava pa Karunga gweni Jehova mesinya mwina lyomukuro gwaJorodana. Makura ntani nye ngomu tengura kosirongo seni esi na mu pa.’
21 “Posiruwo oso, ame kwa pangerere Josuwa asi: ‘Ove wa limonena eyi ga rugana Karunga goge Jehova kovahompa ava vavali. Jehova nga rugana yokulifana kovahompa navenye ava ngomu ka rwisa konyima zokuruta mukuro.
22 Kapisi o va tjire, yeeyi Karunga goge Jehova yige ana kumurwira po.’
23 “Yipo nye, ame kwa likwamberere kwaJehova asi:
24 ‘Jehova Hompa Mupangeli gwanayinye, ove kuna kulikida mukareli goge nonkondo doge dononene. Kwato karunga gemeguru ndi gepevhu ogu a rugana yitetu yoyinene ngwendi nyove.
25 Pulisira nge ni ze ni ka tare sirongo sosiwa esi sa kara mesinya mwina lyomukuro gwaJorodana ndi mukunda gomuwa gonondundu ntani naLibanoni.’
26 Nye one kwa ninkisire Jehova a handukire nge ntani a dire kupurakena nge. Jehova kwa tanterere nge asi: ‘Hagera poopo! Kapisi ngo uyunge hena name yininke eyi.
27 Ronda keguru lyondundu zaPisiga o tare koUtokero, koMuzogo, koMbindakano ntani koUpumezuva o tare sirongo, yeeyi ove kapi ngo ruta mukuro gwaJorodana.
28 Horowora Josuwa a kare mupitisili, mu korangeda ntani mu nkondopeka morwa yige nga pitisira vantu ava va ze mosirongo esi ono kumona va ka si pinge.’
29 Yininke nayinye eyi kwa horokere apa twa kere momuramba ogu gwa kara komeho zaBete-peoro.
Nonkango dokonhi
^ Kwa tamba kositji sosinene ndi kosivera esi ngava zweke komarungavero yipo ga dire kuzeguruka.
^ Ndi nampo asi “emanya lyesovagani.”
^ MoRuhebeli asi “nocubit ntane.” Cubit zimwe kwa hura ponosentimeta 44,5. Tara App. B14.
^ MoRuhebeli asi “nocubit ne.”
^ Kutanta asi “Nomukunda donotende daJaire.”
^ Kwa tamba Efuta lyoKufa.
