Deuteronomium 30:1-20
30 “Nonkango edi nina kumutantera neina ngadi sika mo, yi kare asi matungiko ndi maudigu aga na mu tantera. One ngomu ka yi diworoka apa ngomu ka kara mokatji konomuhoko edi nga mu tjidira Karunga gweni Jehova.
2 Nsene ngomu tengura kwaKarunga gweni Jehova mu limburukwe novana veni nomutjima gweni nagunye nomwenyo* gweni nagunye, yininke eyi nina kumutantera naina,
3 Karunga gweni Jehova nga mu gusa mounkwate ntani nga mu fira nkenda. Age nga ka mu simba oku ga mu tjidira Karunga gweni Jehova.
4 Nampili ngomu lihanene dogoro kooku wa ka twa uzuni, Karunga gweni Jehova nga mu pongaika a ka mu tengwide kosirongo seni.
5 Karunga gweni Jehova nga mu reta mosirongo esi va pingire vaguhya veni, yipo nga si kare seni. Age nga mu tungika ntani age nga vhukisa sivaro seni mu pitakane vaguhya veni.
6 Karunga gweni Jehova nga kuhura nomutjima deni nedi dovana veni, yipo ngomu hare Karunga gweni Jehova nomutjima gweni nagunye nomwenyo* gweni nagunye, ngomu paruke.
7 Makura Karunga gweni Jehova nga ninka nonkore deni edi da mu nyengere nokumuhepeka di ligwanekere nomaudigu nagenye aga.
8 “One ngomu limburukwa hena eyi ga mu tantera Jehova ntani ngomu sikisa mo nompangera dendi nadinye edi nina kumutantera naina.
9 Karunga gweni Jehova nga mu tungika mwanayinye eyi ngomu rugana ntani nga vhukisa ruvharo rweni noyimuna yeni nomuzangu gweni. Jehova nga hafera kumutungika ngwendi moomu ga haferere kutungika ozinyakurweni.
10 Yeeyi one ngomu limburukwa eyi ga mu tantera Karunga gweni Jehova nokusikisa mo nompangera nonoveta edi va tjanga mobuke ezi zoVeta ntani one ngomu tengura kwaKarunga gweni Jehova nomutjima gweni nagunye nomwenyo* gweni nagunye.
11 “Veta ezi nina kumupa naina kapisi udigu kuzilimburukwa ntani kapi za kara ure none.
12 Azo kapi za kara meguru yipo ngomu tante asi: ‘Yilye ogu na za meguru a ka zi tu simbire, yipo tu ya zi zuvhe, tu zi limburukwe?’
13 Azo hena kapi za kara mesinya mwina lyefuta, yipo ngomu tante asi: ‘Yilye ogu na ruta efuta a ka zi tu simbire, yipo tu ya zi zuvhe, tu zi limburukwe?’
14 Nonkango daKarunga kwa kara pepi none. Ado kwa kara motuna tweni ntani monomutjima deni, yipo ngomu di limburukwe.
15 “Neina ame kuna kumuninka mu horowore pokatji komwenyo nonomfa ntani pokatji kouwa noudona.
16 Nsene mu purakena konompangera daKarunga gweni Jehova edi nina kumutantera naina, pokuhara Karunga gweni Jehova nokukwama nonzira dendi ntani pokusikisa mo nompangera nonoveta dendi, one ngomu paruka ntani ngomu ligwederera, ano Jehova nga mu tungika mosirongo esi muna kuza mu ka pinge.
17 “Nye nsene mu hageka kukarera Karunga gweni ntani mu dire kumupurakena, makura va mu ninkise mu nyongamene yikarunga yapeke mu yi karere,
18 tani mu rondora naina asi one ngomu zonauka po. One kapi ngomu paruka siruwo sosire mosirongo esi muna kuza mu ka pinge, apa ngomu ruta mukuro gwaJorodana.
19 Neina ame kuna kumuninka mu horowore pokatji komwenyo nonomfa ntani pokatji komatungiko nomaudigu. Eguru nevhu kuna kara nombangi deni. None novana veni mwa hepa kuhorowora mwenyo, yipo ngomu paruke.
20 Yipo nye, hareni Karunga gweni Jehova, purakeneni kwendi ntani kareni pepi nage, yeeyi age yige a gava mwenyo ntani age kuvhura a mu ninke mu paruke siruwo sosire mosirongo esi ga tumbwidira Jehova ku pa ozinyakurweni Abirahamu, Isaka ntani naJakopo.”
