Deuteronomium 32:1-52
32 “Ove eguru purakena, ame tani uyunga,ano ove evhu zuvha nonkango edi dina kutunda mokana kange.
2 Mavyukiso gange ngaga roka ngwendi mvhura;
nonkango dange ngadi gwa ngwendi eme,ngwendi moomu azi nyavangere mvhura powayintani ngwendi moomu azi rokere mvhura zonene yimeno.
3 Ame ngani divisa edina lyaJehova.
Tantereni wopeke kuhamena unankondo waKarunga gwetu!
4 Age Emanya, yirugana yendi nayinye kwa sikilira mo,nkenye eyi a rugana kwa hungama.
Age Karunga gomulimburukwi ntani kapi a rugana yokudira kuhungama;age muhungami ntani kurugana eyi ya vyuka.
5 Awo yiwo va rugana yininke yoyidona.
Awo kapisi vana vendi, vene va liretera udigu.
Awo vakorokotji ntani yimpempa!
6 One vantu wovagova wokudira nondunge,ngesi yimo nomu tekura Jehova ndi?
Nani age kapisi yige Guhyeni ogu ga mu pa eparu,ntani ogu ga mu ninka mu kare muhoko ndi?
7 Diworokeni mazuva ganare;
gazadareni ko eyi ya horokere nomvhura danare.
Pureni vaguhya veni va mu tantere;pureni vakondi veni va mu simwitire.
8 Apa ga pere Karunga gekeguru-guru nomuhoko upingwa wawo,apa ga gawinine vana vaAdamu* va likarere,age kwa tulilire vantu nomururanikuliza nosivaro soVaisraeli.
9 Yeeyi vantu vaJehova kwa hamena kwendi;ano Jakopo upingwa wendi.
10 Age kwa mu gwene mosirongo somburundu,momburundu omu a mu zuvhika mazwi gokutjilisa.
Age kwa mu poperere, kwa mu pakerere mbili,ntani kwa mu takamesere ngwendi eho lyendi.
11 Ngwendi moomu ekuvi a li rongo vana valyo kutuka,nokuzanza mavava galyo li damune vana valyo,li va simbire pomavava galyo,
12 Jehova kwa mu* pitisilire gelike;kwato karunga ga mu vaterere.
13 Age kwa mu ninkire a pangere nomukunda donondundu,yipo a lye muzangu gomomapya gawo.
Age kwa mu pere usi wokutunda memanya
magadi gokutunda memanya lyononkondo,*
14 magadi gongombe nomasini gokutunda koyimuna,kumwe nomagadi gononzwi,ntani nononzwi donongara domoBasani, noyikombo yoyigara,ntani norukokotwa roruwa;ntani age ga nwine vhinyu zokutunda komandjembere.
15 Apa ga netere Jesuruni,* age kwa rwanesere hekurwendi.
(Ove ono nete, ono mbwizuka, ntani ono furu.)
Makura yiyo ga zumba Karunga ogu ga mu sita,nokunyenga Emanya eli lya mu parura.
16 Awo kwa mu handukisire pokukarera yikarunga yapeke;awo kwa mu handukisire noyininke yoyidona.
17 Awo ngava gava nonzambo dawo konompepo donondona nye kapisi kwaKarunga,yikarunga eyi va dira kudiva,yikarunga yantaantani,eyi va dilire kudiva ozinyakurwawo.
18 (Ove kwa divara Emanya eli lya ku sita,ntani kapi wa diworoka Karunga ogu ga ku pa eparu.)
19 Apa ga yi mwene Jehova, ta va nyoka
morwa vana vendi kwa mu handukisire.
20 Age kwa tente asi: ‘Ame kapi ngani va vatera;*ngani tara eyi ngayi va horokera.
Yeeyi awo vantu wovadona,awo vana ava ava dili kulimburukwa nge.
21 Awo kwa handukisire nge* pokukarera yikarunga yoyimpempa;awo kwa handukisire nge pokukarera mafano gokudira mulyo.
Ame ngani va ninkisa va fire mfudu vantu ava va dira kukara muhoko;ngani ruganesa muhoko gokudira nondunge ni va handukise.
22 Yeeyi ehandu lyange lina hwama ngwendi mundiroogu ngagu hwika dogoro konhi zEyendo,*alyo nga li hwika evhu ntani neyi ya kara pontani nga li veveka etateko lyonondundu.
23 Ame ngani vhukisa maudigu gawo;ame ngani va tumina yikutji.
24 Awo ngava roroka konzaraawo ngava hepa koupyu wounene ntani ngava va zonagura po.
Ame ngani va tumina yikasamantani ngani va tumina mazoka* gouhungu aga aga wovana pevhu.
25 Rufuro ngaru dipaga ava ngava kara ponze;ano ava ngava kara monda ngava kara noutjirweva kare asi vamati ndi vakadona,*ndi vakeke ntani vakurupe.
26 Ame ngano na tente asi: “Ngani va ninka va lihanene koyirongo yokoure;ngani ninka vantu va dire kuvadiworoka,”
27 nye ame kwa tjilire eyi ngadi uyunga nonkore,morwa nonkore kuvhura ngadi yi kwate egano mepuko.
Awo kuvhura ngava tante asi: “Ose tuna fundu;
Jehova kapisi yige ga yi rugana eyi.”
28 Yeeyi awo muhoko gokudira nondunge,*ntani kapi ava lizuvhu mokatji kawo.
29 Ngano va kere nonondunge, ngano tava teda ko koyininke eyi.
Awo ngano tava gazadara ko kweyi ngayi va horokera.
30 Ngapi muntu gumwe na tjida Vaisraeli 1 000,ntani ngapi vantu vavali nava tjida Vaisraeli 10 000?
Eyi kwa horokere morwa Emanya lyawo kwa va sigirentani morwa Jehova kwa va geve kononkore dawo.
31 Yeeyi emanya lyawo kapi lya fana ngwendi Emanya lyetu,nampili nonkore detu nado da yi diva eyi.
32 Awo kwa fana ngwendi yitji yomandjembere yomoSodomantani yomomapya gomoGomora.
Mandjembere gawo uhungu,ntani yisokombwa yawo ururu.
33 Vhinyu zawo uhungu womazoka,uhungu wosiponga wasizava.
34 Yirugana yawo kwa yi pata nosinongweneso,ntani kwa yi pungura monzugopungwiro zange.
35 Nyame ani tengwida kuwoko nokutengeka,apa ngasi sika siruwo awo ngava senutuka,yeeyi ezuva lyawo lyoudigu pepi lina kara,ntani eyi yina kuvandindira ntaantani yi horoke.’
36 Yeeyi Jehova nga pangura vantu vendi,ntani nga fira nkenda vakareli vendiapa nga mona asi nonkondo dawo dina sesupa,ntani apa nga mona asi ava vana hupu po kwato ogu ana kuvavatera ntani kwato nonkondo.
37 Makura age nga tanta asi: ‘Kupi yina kara yikarunga yawo,emanya eli va huguvarere asi nga li va popera,
38 kupi yina kara yikarunga yawo eyi ngayi li magadi gononzambo dawo,*nokunwa vhinyu zononzambo dawo doyikunwa?
Yi ninkeni yi wize yi ya mu vatere.
Yi ninkeni yi wize yi ya mu popere.
39 Ame nyame Karunga,kwato hena karunga gwapeke.
Ame kudipaga ntani kugava eparu.
Ame kuremeka ntani kuverura,ntani kwato gokuvhura kupopera vakwawo momawoko gange.
40 Ame tani zerura ewoko lyange meguru,ame Karunga ogu ani paruka narunye, tani gana asi
41 nsene ni twepeka rufuro rwange,ntani ni liwapaikire kupangura,ame ngani tengwida kuwoko nonkore dangentani ngani tengeka ava va nyenga nge.
42 Ame ngani ninka yikutji yange yikorwe honde,ntani rufuro rwange ru lye nyama,ayo ngayi nwa honde zava ngani dipaga ntani zononkwate,ntani nga ru lya nomutwe dovapitisili wononkore dange.’
43 One nomuhoko, hafeni kumwe novantu vendi,yeeyi age nga tengwida kuwoko ava ava tjisanga honde zovakareli vendi,ntani nga futisa nonkore dendinokukuhura sirongo sovantu vendi.”
44 Makura Mosesa ta wiza, ta ruguruka nonkango dorusumo oru kumwe naHoseya* munaNunu, yipo va di zuvhe vantu.
45 Apa ga mene Mosesa kutantera Vaisraeli nonkango edi,
46 ta va tantere hena asi: “Pungureni monomutjima deni nonkango edi derondoro edi nina kumutantera neina, yipo ngomu tantere vana veni ngava sikise mo nonkango doVeta ezi.
47 Yeeyi nonkango edi kapisi domawoko-woko nye amo kwa hamena mo eparu lyeni. Nsene mu di limburukwa, ngomu paruka siruwo sosire mosirongo esi ngomu pinga konyima zokuruta mukuro gwaJorodana.”
48 Ezuva olyo, Jehova kwa tanterere Mosesa asi:
49 “Ronda kondundu zimwe zaAbalimu, koNdundu zaNebo ezi za kara mosirongo saMowaba ntani azo kwa livyuka naJeliko, o ka tare sirongo saKanani esi nina ku pa Vaisraeli va pinge.
50 Ove ngo ka fira kondundu ozo nokukuhoreka ngwendi moomu va horeka vantu woge,* ngwendi moomu mukuroge Arona ga fililire koNdundu zaHoro, va mu horeke ngwendi moomu va horeka vantu vendi.
51 Namuvenye kapi mwa limburukwire nge mokatji koVaisraeli pomema gomoMeliba poKadesi momburundu zaSini. One kapi mwa fumadekere nge komeho zoVaisraeli.
52 Ove ngo mona sirongo koure, nye kapi ngo za mosirongo esi nina ku pa Vaisraeli.”
Nonkango dokonhi
^ Ndi nampo asi “vantu.”
^ Kwa tamba Jakopo.
^ Ndi “yingurumanya.”
^ Kutanta asi “Muhungami,” esi situmbwisiso soVaisraeli sefumadeko.
^ MoRuhebeli asi “ame ngani va horekera sipara sange.”
^ Ndi “kwa ninkisire nge ni kare nomfudu.”
^ Ndi “Seyoli.” Tara koMauzera.
^ Ndi “yinamwenyo eyi ayi wovana.”
^ Kwa tamba kovakadona ava va dira kuligwanekera rumwe panyama novagara.
^ Ndi nampo asi “kapi ava purakene komapukururo.”
^ Ndi “nga yi li nonzambo dawo donongwa po.”
^ Eli kuna kara edina lyaJosuwa lyene-lyene. Hoseya kwa tunda kedina Hosaya eli ali tanta asi “Ogu ga popera Jehova; Jehova kupopera.”
^ MoRuhebeli asi “nokukutwara kovantu woge.” Esi sisewe sa tamba konomfa.
