Deuteronomium 4:1-49
4 “Yipo nye, purakeneni konoveta nokonompangera edi nina kumuronga one Vaisraeli ntani mwa hepa kudikwama, yipo ngomu paruke ntani ngomu ka guse sirongo esi ana kumupa Jehova Karunga gozinyakurweni.
2 Mwa ha gwederera ko ndi mu hore ko kweyi nina kumupangera, nye sikiseni mo nompangera daJehova Karunga edi nina kumutantera.
3 “One mwa mwene eyi ga rugene Jehova kwaBara gomoPeoro. Karunga gweni Jehova kwa zonagwire po mokatji keni vantu ava ngava karere Bara gomoPeoro.
4 Nye one muna kulimburukwa Karunga gweni Jehova simpe kuna kutwikira kuparuka.
5 Ame kwa mu ronga nompangera nonoveta ngwendi moomu ga yi tantera nge Karunga gwange Jehova, yipo ngomu ka di sikise mo mosirongo esi ngomu pinga.
6 Mwa hepa kukwama nawa noveta nonompangera edi, yipo vantu ava ngava di zuvha ngava mone asi mwa kara nounongo ntani nonondunge, makura awo ngava tante asi: ‘Muhoko ogu gomunene kwa kara nonondunge ntani nounongo.’
7 Karunga gwetu Jehova kulimburura makanderero getu apa atu kanderere kwendi. Koguli muhoko gwapeke ogu gwa kara nakarunga gwawo pepi ndi?
8 Ntani koguli muhoko ogu gwa kara nonoveta dokuhungama nonompangera ngwendi dedi nina kumupa naina ndi?
9 “Mwa hepa kutakamesa yipo ngomu dire kudivara yininke eyi mwa mona, ngayi dire kutunda monomutjima deni eparu lyeni nalinye. Mwa hepa kuyitantera vana veni novatekuru veni.
10 Apa mwa sikeme komeho zaKarunga gweni Jehova momukunda gwaHoreba, Jehova kwa tanterere nge asi: ‘Tantera vantu va ponge, ni va tantere nonkango dange yipo ngava tjire nge eparu lyawo nalinye ntani yipo ngava ronge vana vawo.’
11 “Makura one yiyo mwa hederere pepi, tomu sikama kedi lyondundu, ano ako kwa kere ko mundiro ogu gwa twerere dogoro keguru. Ako kwa kere ko mundema neremo lyenene lyesovagani.
12 Makura Jehova ta mu uyungisa kupitira momundiro. One mwa zuvhire eyi ga uyungire nye kapi mwa mu mwene. One ezwi lyelike mwa zuvhire.
13 Age kwa mu tanterere egwanekero lyendi ndi yipango murongo,* eyi ga mu tantera mu yi sikise mo. Konyima, age kwa yi tjenge pomamanya gavali.
14 Posiruwo oso, Jehova kwa tanterere nge ni mu ronge noveta nonompangera edi ngomu kwama mosirongo esi ngomu pinga.
15 “Mokumona asi one kapi mwa mwene Jehova apa ga mu uyungisire kupitira momundiro momukunda gwaHoreba, takameseni
16 yipo ngomu dire kulizonagura nyamweni pokuliruganena mafano goyininke nkenye eyi, mafano goyininke yoyigara ndi yoyikadi,
17 goyikorama ndi goyidira eyi ayi tuka keguru,
18 goyininke eyi ayi wovana pevhu ndi gonomfi edi da kara momema.
19 Apa ngomu tara keguru mu mone ezuva nokwedi nonombungururu ndi nayinye eyi ya kara keguru, kapisi ngayi mu ninkise mu yi nyongamene ntani mu yi karere. Karunga gweni Jehova kwa yi gava kovantu navenye vepevhu.
20 Jehova kwa mu gusa moEgipite omu mwa hepere ngwendi vantu ava vana tura mesuga lyomundiro, yipo mu kare vantu vendi* ngwendi moomu muna kara neina.
21 “One kwa ninkisire Jehova a handukire nge ntani age kwa tanterere nge asi kapi ngani ruta mukuro gwaJorodana ni ze mosirongo sosiwa esi ana kumupa Karunga gweni Jehova ngoupingwa.
22 Ame tani fire mosirongo esi, kapi ngani ruta mukuro gwaJorodana, nye one ngomu ruta mu ka guse sirongo oso sosiwa.
23 Takameseni asi kapisi ngomu divare egwanekero* eli ga tura po Jehova kumwe none ntani kapisi ngomu liruganene mafano goyininke eyi ga mu silika Karunga gweni Jehova.
24 Yeeyi Karunga gweni Jehova kwa fana ngwendi mundiro ogu agu veveke, age Karunga ogu ga hara va mu karere gelike.
25 “Nsene ngomu kara novana novatekuru ntani nokutunga siruwo sosire mosirongo, makura mu lizonagure nyamweni pokuliruganena mafano goyininke nkenye eyi ntani mu rugane yininke yoyidona kosipara saKarunga gweni Jehova, mu mu handukise,
26 one ngomu dongonoka mo usimbu mosirongo esi ngomu pinga konyima zokuruta mukuro gwaJorodana. One kapi ngomu tunga mo siruwo sosire, nye ngava mu zonagura po, ano eguru nevhu kuna kara nombangi dange.
27 Jehova nga mu ninka mu lihanene mokatji konomuhoko, ano wovasesu tupu ngava ka paruka mokatji konomuhoko edi nga mu tjidira Jehova.
28 Ano konomuhoko odo, one ngomu karera yikarunga eyi va honga ntani yomamanya eyi va rugana vantu nomawoko, yikarunga eyi ayi dili kumona ndi yi zuvhe ndi yi lye ndi yi fumbwire.
29 “Nsene ngomu hara kukarera Karunga gweni Jehova kosirongo oso ntani ngomu mu papare nomutjima gweni nagunye nomwenyo* gweni nagunye, one ngomu mu gwana.
30 Komeho apa ngomu ligwanekera noudigu wounene ntani apa nga yi mu horokera yininke eyi, one ngomu tengura kwaKarunga gweni Jehova nokupurakena kezwi lyendi.
31 Yeeyi Karunga gweni Jehova age Karunga gonkenda. Age kapi nga mu zumba ndi a mu zonagure po ndi a divare egwanekero eli ga tulire po kumwe nozinyakurweni.
32 “Pureni eyi ya horokere nare, apa ga sitire Karunga muntu a mu ture pevhu. Papareni kutundilira koruha rumwe rwepevhu dogoro koruha rukwawo. Yininke yoyiwa yokufana ngesi ya horoka rumwe ndi mu yi zuvhe ndi?
33 Koveli hena vantu vamwe ava va zuvha Karunga kuna kuuyunga kupitira momundiro, va twikire kuparuka ngwendi moomu ya mu horokera ndi?
34 Ndi Karunga ga horowora rumwe muhoko pokuruganesa mahepeko, yidiviso, yitetu, yita, nonkondo dononene ntani noyirugana yendi yokutukukisa ngwendi moomu ga yi mu ruganena Karunga gweni Jehova moEgipite one kuna kutara ndi?
35 One kwa mu likida yininke eyi, yipo mu dive asi Jehova yige Karunga gousili; kwato hena Karunga gwapeke.
36 Age kwa mu ninkire mu zuvhe ezwi lyendi kutundilira meguru, yipo a mu vyukise ntani kwa mu ninkire mu mone mundiro gomunene pevhu omu mwa tundire ezwi lyendi.
37 “Age kwa here ozinyakurweni ntani age kwa horowere ruvharo* rwawo, yiyo ga mu gusilire moEgipite nononkondo dendi dononene.
38 Age kwa tjidire komeho zeni nomuhoko dononene ntani dononkondo kumupitakana, yipo a mu pe sirongo sawo mu si pinge ngwendi moomu yina kuhoroka naina.
39 Yipo nye, yi diveni kutunda neina ntani yi pungureni monomutjima deni asi Jehova yige Karunga gousili, kwato hena Karunga gwapeke meguru ndi pevhu.
40 Mwa hepa kulimburukwa noveta nonompangera dendi edi nina kumutantera naina, yipo ngayi mu tompoke novana veni ntani ngomu twikire kutunga mosirongo esi ana kumupa Karunga gweni Jehova.”
41 Makura Mosesa ta horowora yitata yitatu eyi ya kara koUpumezuva womukuro gwaJorodana.
42 Yipo asi nsene gumwe a dipaga mukwawo momponyo ntani kapi ga mu nyenga, age ga hepa kudukira kositata oso simwe yipo a paruke.
43 Sitata sokuhova kuna kara Besere, aso kwa kere momburundu kondundu, aso sitata sorudi rwaRubena. Sitata sauvali kuna kara Ramoto esi sa kere moGiliyata, aso sitata sorudi rwaGada, sitata sautatu kuna kara Gorani esi sa kere moBasani, aso sitata sorudi rwaManase.
44 Ezi kuna kara veta ezi ga tanterere Mosesa Vaisraeli
45 ntani aga kuna kara mavyukiso nonoveta nonompangera edi ga tanterere Mosesa Vaisraeli apa va tundire moEgipite.
46 Age kwa di va tanterere momukunda gwaJorodana, momuramba ogu gwa livyukire naBete-peoro mosirongo saSihoni hompa goVaamoli, ogu ga tungire moHesiboni. Age kwa mu fundire Mosesa noVaisraeli konyima zapa va tundire moEgipite.
47 Awo kwa gusire sirongo sendi nosirongo saOgo hompa gwaBasani. Vahompa ava vavali woVaamoli kwa tungire koUpumezuva womukunda gwaJorodana.
48 Mururani gwawo kwa tamekerere kositata saAroere, esi sa kara konontere doMuramba gwaArunoni dogoro koNdundu zaSiyoni ndi Ndundu zaHeremoni,
49 ntani nomukunda nagunye gwaAraba ogu gwa kara koUpumezuva waJorodana dogoro kEfuta lyaAraba* eli lya kara kedi lyonondundu daPisiga.
Nonkango dokonhi
^ MoRuhebeli asi “nonkango murongo.” Kwa divikwa hena asi Decalogue.
^ Ndi “upingwa wendi.”
^ Ndi “elizuvhasano.”
^ Tara koMauzera.
^ MoRuhebeli asi “mbuto.”
^ Kwa tamba Efuta lyoMungwa ndi Efuta lyoKufa.
