Deuteronomium 5:1-33
5 Mosesa ta zigida Vaisraeli navenye, ta va tantere asi: “Purakeneni konoveta nonompangera edi nina kumutantera naina one Vaisraeli, mwa hepa kudilironga ntani mwa hepa kudisikisa mo nawa-nawa.
2 Karunga gwetu Jehova kwa tulire po egwanekero* kumwe nose momukunda gwaHoreba.
3 Jehova kapi ga tulire po egwanekero eli kumwe nozinyakurwetu, nye age kwa li tura po kumwe nose ava tuna kara apa.
4 Jehova kwa uyungire none kuvyukilira kondundu kupitira momundiro.
5 Ame kwa sikeme pokatji keni naJehova posiruwo oso, yipo ni mu tantere nonkango daJehova, yeeyi one kwa tjilire mundiro makura kapi mwa rondere kondundu. Karunga kwa tente asi:
6 “‘Ame nyame Karunga gweni Jehova ogu ga mu gusa mosirongo saEgipite omu mwa kere vapika.
7 Mwa hepa kukarera nge nyamelike, mwa ha karera yikarunga yapeke.
8 “‘Mwa ha liruganena mafano gokuhonga ndi efano lyankenye eyi, yi kare asi yemeguru ndi yepevhu ndi yomomema.
9 Mwa ha yi nyongamena ndi mu yi karere, yeeyi ame Karunga gweni Jehova kwa hara kukarera nge nyamelike. Ame ngani tengeka vana novatekuru ntani novatekuru wokononkokona morwa mapuko govaguhya vawo ava va nyenga nge.
10 Nye ava va hara nge nokulimburukwa koyipango yange, ame ngani twikira kulikida eharo lyanarunye koruvharo rwawo nomvhura dononzi.
11 “‘Mwa ha ruganesa edina lyaKarunga gweni Jehova momudona, yeeyi Jehova nga tengeka nkenye ogu nga ruganesa edina lyendi momudona.
12 “‘Sikiseni mo ezuva lyEsabata ntani li tareni asi lya pongoka ngwendi moomu ga mu pangera Karunga gweni Jehova.
13 Mwa hepa kurugana yirugana yeni nayinye momazuva ntazimwe,
14 nye ezuva lyauntambali kuna kara ezuva lyesabata lyaKarunga gweni Jehova. Kapisi ngomu rugane nkenye sirugana none novana veni wovagara nava wovakadi novapika veni wovagara nava wovakadi nonontwedu deni noyindongi yeni noyimuna yeni yimwe novanayirongo ava va tunga moyitata yeni,* yipo vapika veni wovagara nava wovakadi ngava pwizumuke ngwendi nyone.
15 Diworokeni asi one kwa kere vapika mosirongo saEgipite, ano Karunga gweni Jehova kwa mu gusire mo nononkondo dendi dononene. Eyi yiyo ana kumutanterera Karunga gweni Jehova mu sikise mo ezuva lyEsabata.
16 “‘Fumadekeni vaguhya veni novazinya veni ngwendi moomu ga mu pangera Karunga gweni Jehova, yipo ngomu paruke siruwo sosire ntani yipo ngayi mu tompoke* mosirongo esi ana kumupa Karunga gweni Jehova.
17 “‘Walye o dipaga.
18 “‘Ndi o hondere.
19 “‘Ndi o vake.
20 “‘Ndi o gave umbangi woyimpempa kuhamena mukweni.
21 “‘Ndi o dovaukire mukadamukweni. Ndi o dovaukire embo lyamukweni ndi epya lyendi ndi mupika gwendi gomugara ndi gomukadi ndi ntwedu zendi ndi sindongi sendi ndi nkenye eyi ga weka.’
22 “Eyi yiyo yipango* ga mu tanterere Jehova namuvenye one mwa pongere kondundu. Age kwa yi uyungire nezwi lyenene kutundilira momundiro ntani meremo lyenene lyesovagani. Age kapi ga gwederere ko yimwe. Konyima, age kwa yi tjenge pomamanya gavali makura ta ga pe nge.
23 “Nye tupu mwa zuvhire ezwi kuna kutunda meremo lyesovagani, azo ndundu kuna kutwera, masimbi gomomarudi geni novapitisili tava hedere nge.
24 Awo yipo va tanterere nge asi: ‘Karunga gwetu Jehova ana tu likida uyerere wendi nononkondo dendi ntani ose tuna zuvhu ezwi lyendi lina kutunda momundiro. Neina tuna yi limonene asi muntu kuvhura kuparuka konyima zokumuuyungisa Karunga.
25 Ose kapi tuna hara kufa yeeyi mundiro ogu gomunene kuvhura gu tu hwike. Nsene Karunga gwetu Jehova na twikira kutuuyungisa tatu fu.
26 Yeeyi kwato muntu ogu ga zuvha ezwi lyaKarunga gomunamwenyo lina kutundilira momundiro ngwendi moomu yina tu horokere makura a twikire kuparuka.
27 Hedera ko nyamoge, o ka purakene nayinye eyi na ka kutantera Karunga gwetu Jehova, makura o ya tu tantere nayinye eyi na ka kutantera Jehova, ano ose natu ya kupurakena, tu ya yi sikise mo.’
28 “Jehova ga zuvhire eyi mwa tanterere nge ntani Jehova kwa tanterere nge asi: ‘Nina zuvhu eyi vana ku tantere vantu ava. Awo mouhunga vana kara.
29 Nsene va tjira nge kutundilira komutjima ntani va limburukwe yipango yange nayinye, awo ngayi va tompoka novana vawo dogoro narunye!
30 Zende o ka va tantere asi: “Tengureni konotende deni.”
31 Nye ove kara name ni ku tantere nompangera noyipango ntani nonoveta edi no ka ronga vantu, yipo ngava ka di limburukwe mosirongo esi nina kuvapa va pinge.’
32 Yipo nye, mwa hepa kuyisikisa mo nayinye ngwendi moomu ga mu pangera Karunga gweni Jehova. Kapisi ngomu ze korulyo ndi korumoho.
33 Mwa hepa kukwama nayinye eyi ga mu pangera Karunga gweni Jehova, yipo ngayi mu gende po nawa ntani ngomu paruke siruwo sosire mosirongo esi ngomu pinga.
Nonkango dokonhi
^ Ndi “elizuvhasano.”
^ MoRuhebeli asi “momarungavero geni.”
^ Ndi “yipo ngayi mu gende po nawa.”
^ MoRuhebeli asi “nonkango.”
