Deuteronomium 6:1-25
6 “Eyi yiyo yipango nonoveta ntani nonompangera edi ga pa nge Jehova ni di mu ronge, yipo ngomu di limburukwe apa ngomu ruta mu ze mosirongo esi ngomu pinga.
2 Mwa hepa kutjira Karunga gweni Jehova nokulimburukwa eparu lyeni mudima konoveta dendi nadinye ntani noyipango yendi eyi nina kumutantera none novana veni wovagara novatekuru veni, yipo ngomu paruke siruwo sosire.
3 Purakeneni nokusikisa mo noveta nonompangera edi one Vaisraeli, yipo ngayi mu tompoke ntani ngasi ligwederere sivaro seni mosirongo esi sa zura masini nousi, ngwendi moomu ga yi mu tumbwidira Jehova Karunga gozinyakurweni.
4 “Purakeneni one Vaisraeli: Karunga gwetu Jehova yige gelike Jehova.
5 Hareni Karunga gweni Jehova nomutjima gweni nagunye nomwenyo* gweni nagunye nononkondo* deni nadinye.
6 Nonkango edi nina kumutantera naina, mwa hepa kudipungura monomutjima deni,
7 ntani mwa hepa kudironga* vana veni, mu di va tantere nsene membo muna kara ndi morugendo ndi pokurara ndi pokupinduka.
8 Di limangeni komawoko geni, yipo di kare sidiworokeso ntani da hepa kukara ngwendi sidiviso poyipara yeni.*
9 Di tjangeni monompatji* domavero geni ntani komarungavero geni.
10 “Apa nga mu twara Karunga gweni Jehova mosirongo esi ga tumbwidilire ozinyakurweni Abirahamu, Isaka ntani naJakopo asi nga si mu pa, sirongo soyitata yoyinene yoyiwa eyi mwa dira kudika,
11 sirongo sononzugo edi da zura yininke yoyiwa eyi mwa dira kuruganena nomatope aga mwa dira kusima noyikunino yomandjembere ntani noyitji yomauzwe eyi mwa dira kutapeka, makura ngomu lye mu kute,
12 takameseni asi kapisi ngomu divare Jehova, ogu ga mu gusa mosirongo saEgipite omu mwa kere vapika.
13 Mwa hepa kutjira Karunga gweni Jehova ntani mwa hepa kumukarera nokugana medina lyendi.
14 Mwa ha karera yikarunga yapeke eyi ava karere vantu ava va mu kundurukida,
15 yeeyi Karunga gweni Jehova ogu ga kara mokatji keni, kwa hara kumukarera gelike. Nsene mu karera yikarunga yapeke, Karunga gweni Jehova nga mu handukira ntani nga mu zonagura po pontunda zevhu.
16 “Mwa ha heteka Karunga gweni Jehova ngwendi moomu mwa yi rugene poMasa.
17 Mwa hepa kulimburukwa nawa-nawa yipango yaKarunga gweni Jehova nomadiworokeso gendi ntani nonoveta edi ga mu pangera mu limburukwe.
18 Mokuninka asi ngayi mu tompoke ntani mu pinge sirongo sosiwa esi ga tumbwidira Jehova ozinyakurweni, mwa hepa kurugana yininke youhunga ntani yoyiwa komeho zaJehova,
19 pokutjida mo nonkore deni nadinye ngwendi moomu ga mu tantera Jehova.
20 “Apa ngava mu pura vana veni komeho asi: ‘Morwasinke ga mu pera Jehova madiworokeso nonompangera ntani nonoveta edi?’
21 Ngomu va tantere asi: ‘Ose kwa kere vapika vaFarawo moEgipite, nye Jehova yipo ga tu gusire mo moEgipite nononkondo dendi dononene.
22 Jehova kwa rugene yidiviso noyitetu komeho zetu. Ayo kwa kere yitetu yoyinene ntani age kwa hepekere Vaegipite naFarawo ntani nanavenye vemembo lyendi.
23 Makura Karunga yipo ga tu gusire mo moEgipite a tu rete oku, yipo a ya tu pe sirongo esi ga tumbwidilire ozinyakurwetu.
24 Jehova yipo ga tu pangerere tu limburukwe nompangera nadinye edi, tu tjire Karunga gwetu Jehova yipo ngayi tu tompoke nkenye apa ntani tu twikire kuparuka dogoro ngesi.
25 Ano nsene tu sikisa mo nawa-nawa yipango nayinye ngwendi moomu ga tu pangera Karunga gwetu Jehova, age nga tu tara asi ose vahungami.’
Nonkango dokonhi
^ Tara koMauzera.
^ Ndi “noyiweka yeni nayinye.”
^ Ndi “kudirugurukira.”
^ MoRuhebeli asi “pokatji komeho geni.”
^ Ndi “koyikuravero.”
