Deuteronomium 8:1-20
8 “Mwa hepa kusikisa mo yipango nayinye eyi nina kumupa naina, yipo ngomu twikire kuparuka mu ligwederere, ntani mu ze mosirongo esi ngomu pinga esi ga tumbwidilire Jehova ozinyakurweni.
2 Diworokeni rugendo rorure oru ga mu pitisilire Karunga gweni Jehova nomvhura 40 momburundu, yipo a mu ninke mu linunupike ntani a mu heteke a dive eyi ya kere monomutjima deni; nsene asi ngomu limburukwa yipango yendi ndi hawe.
3 Age kwa mu ninkire mu linunupike pokumuninka mu zuvhe nzara, ntani pokumupa mana ezi mwa dilire kudiva none novaguhya veni, yipo mu dive asi muntu kapi a parukire komboroto zelike, nye age kuparukira kwankenye nkango ezi azi tundu mokana kaJehova.
4 Yikoverero eyi mwa dwere kapi ya kurupire, ano nompadi deni kapi da dundire monomvhura edi 40.
5 One mwa yi diva asi Karunga gweni Jehova kwa mu pukwilire ngwendi moomu mugara a pukurura munendi gomugara.
6 “Yipo nye, mwa hepa kusikisa mo yipango yaKarunga gweni Jehova pokulimburukwa noveta dendi ntani pokumutjira.
7 Yeeyi Karunga gweni Jehova kuna kumutwara mosirongo sosiwa, esi sa kara nonomukuro nomarunone gomema aga aga pupu momuramba ntani momukunda gonondundu,
8 sirongo oso kwa kara mo rukokotwa, mbuto,* yitji yomandjembere, yitji youkuzu, pomegaranate, magadi gononzwe ntani nousi.
9 Amo kwa zura mo nondya ntani kapi ngomu hepa yuma. Mamanya gamo kwa kara mo yivera ntani one ngomu sima ngoporo monondundu domosirongo oso.
10 “Apa ngomu lya mu kute, mwa hepa kuhamberera Karunga gweni Jehova ogu ga mu pa sirongo sosiwa.
11 Takameseni asi kapisi ngomu divare Karunga gweni Jehova pokudira kusikisa mo yipango nonompangera ntani nonoveta edi nina kumutantera naina.
12 Apa ngomu lya mu kute, mu dike nonzugo deni donongwa, mu tunge mo,
13 apa nga di ligwederera nongombe deni noyikombo yeni nononzwi deni nosiliveli ntani nongorodo zeni, makura mu kare noyininke yoyinzi;
14 kapisi ngomu linenepeke mu divare Karunga gweni Jehova ogu ga mu gusa mosirongo saEgipite omu mwa kere vapika.
15 Age kwa mu pitisilire momburundu zonene zokutjilisa, omu mwa kere mazoka gouhungu nononge ntani omu mwa dilire kukara mema. Age kwa ninkire mema ga tunde memanya,
16 ntani kwa mu ninkire mu lye mana momburundu ezi va dilire kudiva vaguhya veni, yipo a mu nunupike ntani age kwa mu hetekere ngo mu gwanene mo uwa komeho.
17 Nsene mu litantera asi one kwa gwana ungawo morwa nonkondo deni,
18 diworokeni asi Karunga gweni Jehova yige ga mu pa nonkondo mu ngawope, yipo a sikise mo egwanekero* eli ga tulire po nozinyakurweni ngwendi moomu ana kuyirugana naina.
19 “Nsene ngomu divara Karunga gweni Jehova, mu karere yikarunga yapeke noku yi nyongamena, ame tani mu rondora naina asi ngomu dongonoka po.
20 One ngomu zonauka po ngwendi nomuhoko edi ana kuzonagura po Jehova, morwa kapi mwa purakena kezwi lyaKarunga gweni Jehova.
