Deuteronomium 9:1-29
9 “One Vaisraeli purakeneni, neina tomu rutu mukuro gwaJorodana mu ka tjide nomuhoko dononene ntani dononkondo kumupitakana, mu ka va hakane yitata yoyinene eyi va kundurukida makuma gomare,
2 novantu wononkondo wovare womoruvharo rwaAnaki ava mwa diva, ava mwa zuvha asi kwato gokuvhura kuvarwanesa.
3 Yipo nye, yi diveni naina asi Karunga gweni Jehova ta piti komeho zeni. Age kwa fana ngwendi mundiro ogu agu veveke ntani age ngava zonagura po. Age ngava funda komeho zeni, yipo ngomu va tjide mo usimbu noku va zonagura po ngwendi moomu ga mu tumbwidira Jehova.
4 “Apa nga tjida mo Karunga gweni Jehova nomuhoko edi komeho zeni, kapisi ngomu tante asi: ‘Jehova kwa tu pa sirongo esi morwa ose vahungami.’ Nye Jehova kuna kutjida mo nomuhoko edi komeho zeni, morwa yirugana yawo yoyidona.
5 One kapi ngomu gusa sirongo oso morwa one vahungami ndi morwa kulimburukwa kutundilira komutjima. One ngomu gusa sirongo morwa yirugana yoyidona yonomuhoko edi ana kutjida Jehova komeho zeni ntani Jehova kuna kuyirugana, yipo a sikise mo eyi ga tumbwidilire ozinyakurweni Abirahamu naIsaka ntani naJakopo.
6 Yipo nye, diveni asi Karunga gweni Jehova kapi ana kumupa sirongo esi sosiwa morwa one vahungami. One kapi omu zuvhu.
7 “Mwa ha divara omu mwa handukisire Karunga gweni Jehova momburundu. One kwa rwanesa Jehova kutunda ezuva eli mwa tundire moEgipite dogoro apa mwa ya sika pevango eli.
8 Nampili apa mwa kere momukunda gwaHoreba, one kwa handukisire Jehova, ano Jehova kwa mu handukilire unene dogoro ta hara kumuzonagura po.
9 Apa na rondere kondundu ni ka simbe mamanya gegwanekero* eli ga tulire po Jehova kumwe none, ame kwa ka kere kondundu mazuva 40 nomasiku 40, na hana kulya ndi ni nwe mema.
10 Makura Jehova yipo ga pere nge mamanya gavali aga ga tjenge nonyara zendi. Jehova kwa tjenge po nonkango edi ga mu tanterere kupitira momundiro apa mwa pongere kondundu.
11 Konyima zomazuva 40 nomasiku 40, Jehova kwa pere nge mamanya gavali gegwanekero,
12 makura Jehova yipo ga tanterere nge asi: ‘Katuka usimbu o ze, yeeyi vantu woge ava wa gusa mosirongo saEgipite vana rugana yininke eyi nayi va ninkisa va va zonagure po. Awo vana genderere kusiga eyi nava tantera va rugane. Awo vana liruganene vene efano lyosivera.’
13 Makura Jehova yipo ga tanterere nge asi: ‘Ame na diva asi vantu ava kapi ava zuvhu.
14 Siga nge ni va zonagure po yipo ngava dire kudiworoka madina gawo, makura ngani ku ninke o kare muhoko gomunene gononkondo kuvapitakana.’
15 “Makura yipo na humburukire kondundu, azo ndundu kuna kutwera, ano mamanya gavali gegwanekero kwa kere momawoko gange.
16 Yipo na mwene asi one muna zono kwaKarunga gweni Jehova! One kwa liruganenene ntana zosivera ntani kwa genderere kusiga eyi ga mu tanterere Jehova.
17 Yipo na zugumine mamanya ogo gavali, makura ta ga bomauka komeho zeni.
18 Tani linyongamene nkenye ezuva komeho zaJehova mazuva 40 nomasiku 40, ngwendi moomu na yi rugene pomuhowo. Ame kapi na lire nondya ndi ni nwe mema, morwa yirugana yeni yoyidona eyi ya handukisire Jehova.
19 Ame kwa tukukire, morwa Jehova kwa mu handukilire unene dogoro ta hara kumuzonagura po. Nye Jehova ga purakenene nge hena.
20 “Jehova kwa handukilire hena Arona ntani kwa here kumuzonagura po, nye ame yipo na likwamberere po Arona.
21 Konyima yipo na gusire ntana ezi mwa rugene ezi za mu ninkisire mu ture nzo, tani zi hwike ntani tani zi bomagura dogoro tazi kara usura-sura. Usura owo tani u zugumine momukuro ogu agu pupu gu tunde kondundu.
22 “One kwa handukisire hena Jehova poTabera, poMasa ntani poKiboroto-hatava.
23 Apa ga mu tanterere Jehova mu tunde moKadesi-baraneya, age kwa tente asi: ‘Zendeni mu ka guse sirongo esi nina kumupa,’ one kwa rwanesere hena Karunga gweni Jehova ntani kapi mwa likidire epuro mwendi ndi mu mu limburukwe.
24 Kutunda apa na mu diva, one kwa rwanesa Jehova.
25 “Makura yiyo na twikilire kulinyongamena kwaJehova mazuva 40 nomasiku 40. Ame kwa yi rugene eyi morwa Jehova kwa tente asi ta mu zonagura po.
26 Yipo na likwamberere kwaJehova, tani mu tantere asi: ‘Jehova Hompa Mupangeli gwanayinye, wa ha zonagura po vantu woge.* Awo vantu woge ava wa zowora mosirongo saEgipite nononkondo doge dononene.
27 Diworoka vakareli woge, Abirahamu, Isaka ntani naJakopo. Gusira po vantu ava wokudira kuzuvha noyirugana yawo yoyidona ntani nononzo dawo.
28 Nsene kapi ono kuyirugana, vantu womosirongo esi ono kututwara ngava tanta asi: “Jehova kapi ga vhura kureta vantu mosirongo esi ga va tumbwidira. Age kwa va nyenga yiyo ga va gusira moEgipite a ya va dipagere momburundu.”
29 Awo emona lyoge* ntani vantu woge ava wa gusa mosirongo saEgipite nononkondo doge dononene.’
