Buke zEhororo 1:1-20
1 Nonkango edi kwa hamena koyininke eyi ga horwere Jesus Kristusa. Jesus kwa gwene yininke eyi kwaKarunga yipo a tantere vakareli vaKarunga yininke eyi ngayi horoka konyima zokaruwogona. Jesus kwa tumine muengeli komukareli gwendi Johanesa, yipo a ka mu likide memoneko* kuhamena yininke eyi ngayi horoka.
2 Johanesa kwa uyungire yininke nayinye eyi ga mu tanterere Karunga noumbangi ou ga mu pere Jesus. Age kwa geve umbangi woyininke nayinye eyi ga mwene.
3 Muntu ogu a resa kuziguruka nonkango edi douporofete nava ava di purakene nokudisikisa mo, awo vantu woruhafo, yeeyi siruwo pepi sina kara di sike mo.
4 Ame Johanesa, kuna kutjangera nombungakriste ntambali edi da kara momukunda gwaAsiya:
Ngano mu gwane nkenda zonene nombili kwaKarunga “ogu ana kara po, ogu ga kere po, ogu nga wiza” ntani konompepo ntambali edi da kara komeho zosipundi sendi soUhompa.
5 Ntani kwaJesus Kristusa, “Mbangi zokulimburukwa,” “ogu va hova kupindura koufe” “noMupangeli govahompa vepevhu.”
Age kwa tu hara ntani kwa tu zowora kononzo kupitira mohonde zendi.
6 Age kwa tu ninka tu kare vahompa novapristeli vaKarunga Guhwe. Uyerere nononkondo ngano yi kare yendi dogoro narunye. Amen.
7 Tareni! Age kuna kuwiza nomaremo, vantu navenye ngava mu mona, kukwatera mo nava va mu twire negonga, ntani vantu womarudi nagenye gepevhu. Awo ngava guva unene apa ngava mu mona. Amen.
8 Jehova Karunga kuna kutanta asi: “Ame nyame etameko nouhura,* ogu ana kara ko, ogu ga kere ko, ogu ana kuwiza, Munankondo nadinye.”
9 Ame Johanesa mukweni ogu nga ka pangera kumwe none, kuna kulididimikira maudigu ngwendi nyone, morwa kukara murongwa gwaJesus. Ame kwa tu lire nge posirudi saPatimosa, morwa kuuyunga kuhamena Karunga nokugava umbangi wokuhamena Jesus.
10 Mpepo zokupongoka kwa twere nge mezuva lyaHompa ntani ame kwa zuvhire konyima zange ezwi lyenene eli lya zuvhikire ngwendi rumbendo,
11 alyo kwa tente asi: “Nayinye eyi ono kumona, yi tjanga mobukegango nokuyitumina nombungakriste edi ntambali: Efeso, Simerena, Peregamu, Tiyatira, Saredesa, Firadelifiya naRawodikeya.”
12 Ame kwa pirukire ni tare ogu ga uyungisire nge, apa na pirukire ame kwa mwene mauzweko gonoramba ntambali gongorodo,
13 ntani pokatji komauzweko gonoramba odo, kwa kere po muntu gokufana munwamuntu. Age kwa dwere sikoverero sosire dogoro konompadi ntani kwa limenge sikehe songorodo ponturo zendi.
14 Ano nohuki dokomutwe gwendi kwa kere dononzera ngwendi ngodi zonzera ntani ngwendi yiterengenze, ano meho gendi kwa twerere ngwendi mundiro,
15 nompadi dendi kwa fene ngwendi ngoporo ezi zina kuvembera mesuga lyomundiro, ano ezwi lyendi kwa zuvhikire ngwendi mema gomanzi aga gana kupupa.
16 Ntani age kwa kwaterere mokuwoko kwendi kokorulyo nombungururu ntambali ntani mokana kendi kwa tundire mo rufuro rokutwepa ronomemo mbali ntani sipara sendi kwa paimine ngwendi ezuva lina kutema unene.
17 Apa na mu mwene tani gwire konompadi dendi.
Makura ta kambeke nge kuwoko kwendi kokorulyo nokutantera nge asi: “Wa ha tjira, ame nyame gokuhova ntani gokuhulilira,
18 ntani ame kuna kuparuka. Ame kwa fire, nye ame kuna kuparuka narunye nanarunye, ntani ame kwa kara nononsapi dokumangurura vantu konomfa ntani moMayendo.*
19 Yipo nye, tjanga yininke eyi ono mono neyi yina kuhoroka ngesi ntani neyi ngayi ka horoka konyima zeyi.
20 Nombungururu ntambali edi ono mono mokuwoko kwange kokorulyo ntani nomauzweko gonoramba ntambali gongorodo kuna kara sihoramo saKarunga, nombungururu ntambali kwa fanekesa vaengeli ava va kara monombungakriste ntambali, ano mauzweko gonoramba ntambali kwa fanekesa nombungakriste ntambali.
Nonkango dokonhi
^ Ndi “moyidiviso.”
^ MoRugereka asi “Alpha naOmega.” Alpha kuna kara ndanda zokuhova ano Omega kuna kara ndanda zokuhulilira monoalfabeti doRugereka.
