Buke zEhororo 10:1-11
10 Makura tani mono muengeli gumwe gononkondo ana kutunda meguru. Age kwa mu dingilire eremo ntani pomutwe gwendi kwa kere po ekongoro. Sipara sendi kwa fene ngwendi ezuva ntani maguru* gendi kwa fene ngwendi nongundi domundiro.
2 Age kwa kwaterere bukegango zonunu ezi vana gonyonona. Ntani age kwa lyete mpadi zendi zokorulyo mefuta, ano zokorumoho kwa lyete pevhu,
3 makura ta zigire unene ngwendi moomu a nungu nyime. Apa ga zigilire, ame tani zuvhu mazwi goyindundumo ntambali.
4 Ame kwa here kutjanga eyi na zuvhire koyindundumo ntambali. Nye tani zuvhu ezwi lina kutundilira meguru lina kutantera nge asi: “Horeka yininke eyi ono zuvhu koyindundumo ntambali ntani kapisi o yi tjange.”
5 Muengeli ogu na mwene age kuna lyata mefuta nepevhu, kwa zerwire kuwoko kwendi korulyo meguru,
6 age kwa gene medina lyogu a paruka narunye nanarunye, ogu ga sita eguru nanayinye ya kara mo, evhu nanayinye eyi ya kara po, nefuta nanayinye eyi ya kara mo asi: “Kapi ngapa pita siruwo sosire hena.
7 Momazuva ogo, apa muengeli gwauntambali nga fuda rumbendo rwendi, sihoramo saKarunga ngasi sika mo. Aso kuna kara mbudi zongwa ezi ga divisire kovaporofete ava ngava mu karere.”
8 Makura tani zuvhu ezwi lina kutunda meguru, alyo kwa tanterere nge hena asi: “Zende o ka guse bukegango ezi vana gonyonona mokuwoko komuengeli ogu ana lyata mefuta nepevhu.”
9 Makura tani zi komuengeli nokumutantera a penge bukegango zonunu, age ta tantere nge asi: “Zi gusa o zi lye, azo nazi rurupika ezimo lyoge, nye mokana koge tazi tovara ngwendi usi.”
10 Tani gusa bukegango zonunu mokuwoko komuengeli makura tani zi li po. Azo kwa tovarere mokana kange ngwendi usi, nye apa na mene kuzilya, mezimo lyange tamu rurupa.
11 Awo kwa tanterere nge asi: “Pumba hena kuhamena vantu nonomuhoko nomaraka ntani novahompa.”
Nonkango dokonhi
^ MoRugereka asi “nompadi.”
