Buke zEhororo 11:1-19
11 Makura tava penge ruu rokufana ngwendi mpango* nokutantera nge asi: “Katuka o faneke* evango lyokupongoka* lyaKarunga nosizambero, ove hena o varure ava ava karerere mo.
2 Nye wa ha faneka eharango eli lya kara ponze zevango lyokupongoka, yeeyi alyo kwa li gava konomuhoko ntani ado ngadi lyatanga sitata sokupongoka ure womakwedi 42.
3 Ame ngani ninka nombangi dange mbali, di pumbe ure womazuva 1 260 ado kuna dwara yikoverero yononsako.”
4 Awo kwa va fanekesa koyitji yivali yomauzwe ntani komauzweko gavali gonoramba ntani awo kwa sikama komeho zaHompa gouzuni.
5 Nkenye ogu ana hara kuvakoresa, mokana kawo tamu tundu mundiro gu veveke po nonkore dawo. Nkenye ogu ana hara kuvakoresa yimo ngava mu dipaga monkedi zangesi.
6 Awo va kara nononkondo dokupata eguru, yipo mvhura zi pire kuroka momazuva aga vana kupumba. Ntani awo va kara nononkondo dokuninka mema ga kare honde, ntani awo va kara nononkondo dokuzuguma mauvera gokulisiga-siga pevhu nkenye apa vana harere.
7 Apa ngava mana kupumba, sikasama esi ngasi tunda mekero ngasi va rwisa, tasi va fundu makura tasi va dipaga.
8 Yimpu yawo ngayi rara monzira zositata esi sa fumana. Aso kwa fanekesa Sodoma naEgipite, ano mositata oso yimo va pamparerere Hompa gwawo kositji.
9 Vantu wokomarudi nokomaraka nokonomuhoko, ngava tara koyimpu yawo ure womazuva gatatu noharufa ntani kapi ngava pulisira yimpu yawo asi va yi ture monontoko.
10 Ano vantu vepevhu ngava hafera unene nomfa dovaporofete owo nokulitumina-tumina mauhwi, morwa vaporofete owo vavali ngava hepeke vantu ava va tungire pevhu.
11 Konyima zomazuva gatatu noharufa, Karunga tava pe mpepo makura tava sikama. Ano ava va va mwene tau va kwata woma wounene.
12 Makura nombangi mbali tadi zuvhu ezwi lina kutunda meguru lina kutanta asi: “Wizeni oku!” Makura tava zi meguru momaremo ntani nonkore dawo dava mwene.
13 Hararasi* tapa horoka ekankamo lyevhu ntani siumurongo* sositata kwa zonaukire, ano vantu 7 000 kwa va dipagere ekankamo lyevhu. Ano ava va hupire po, kwa tukukire unene, makura tava yererepeke Karunga gemeguru.
14 Udigu wauvali una piti, nye udigu wautatu kuna kugenderera kuwiza.
15 Muengeli gwauntambali ta fuda rumbendo rwendi. Makura tani zuvhu mazwi gana kuzigira meguru asi: “Uhompa waKarunga naKristusa, ngesi kuna kupangera vantu. Ntani Karunga nga pangera ngaHompa narunye nanarunye.”
16 Makura vapangeli* 24 ava va hingilire poyipundi youhompa tava ligandere komeho zaKarunga va mu karere.
17 Awo kwa tente asi: “Tatu ku pandura Jehova Karunga, Munankondo nadinye, ove ono kara ko ntani ove ogu ga kere ko, morwa ove wa gusa nonkondo doge ntani ove kuna kupangera ngaHompa.
18 Nye nomuhoko kwa handukire, makura nove to likida ehandu lyoge, makura siruwo sokupangura vafe tasi siki mo, nesi sokufuta vapongoki novaporofete ava vana kukukarera ntani nava ava fumadeke edina lyoge, ava va fumana nava va dira kufumana ntani sokuzonagura po ava vana kuzonagura evhu.”
19 Ntembeli zaKarunga zemeguru kwa zegurukire ntani sikesa sendi sEgwanekero kwa si mwene montembeli. Tani mono hena maruvadi nekankamo lyevhu nomvhura zakamanya ntani tani zuvhu mazwi nosindundumo somvhura.
Nonkango dokonhi
^ Ndi “mpango zokumetesa.”
^ Ndi “o mete.”
^ Kwa tamba kevango oku za kara nzugo zokupongoka nezi zokupongokerera montembeli.
^ MoRugereka asi “Movili zoozo.”
^ Ndi “1⁄10.”
^ MoRugereka asi “vakurona.”
