Buke zEhororo 12:1-17
12 Makura tani mono emoneko lyenene meguru: Ame kwa mwene mukadi ana dwara ezuva ntani konhi zonompadi dendi kwa kere ko kwedi. Ano komutwe gwendi kwa kere ko nkata ezi va rugana nonombungururu 12,
2 ntani age kwa kere nomarutu gavali. Mokumona asi age kwa kere pepi nokuhampuruka, age kwa lilire morwa kwa humisire.
3 Makura tani mono hena emoneko limwe, emuzoka lyenene lyegeha ngwendi mundiro. Alyo kwa kere nonomutwe ntambali nononkata ntambali ntani nonombinga murongo.
4 Musira gwalyo kwa pitwilire siutatu sonombungururu demeguru, makura tali zugumine nombungururu odo pevhu. Emuzoka olyo kwa sikeme ngorooro pepi nomukadi, yipo li dipage munendi apa nava mu hampuruka.
5 Mukadi ogo makura ta hampuruka mukeke gomumati, ogu nga pangera nomuhoko nadinye nomburo zosivera. Konyima zapa va mu hampurukire, tava mu twara kwaKarunga ogu ga hingilire posipundi sendi souhompa.
6 Mukadi ogo makura ta tjwayukire momburundu kevega oku ga mu wapaikilire Karunga, yiko va ka mu rerere mazuva gokusika 1 260.
7 Makura meguru tamu kara yita: Mikayera* novaengeli vendi tava rwisa emuzoka, ano emuzoka nalyo tali va rwisa kumwe novaengeli valyo
8 nye tava li fundu novaengeli valyo, makura tali zumbanesa evega lyalyo meguru.
9 Emuzoka makura tava li zugumine pevhu, alyo ezoka lyanare eli ava tumbura asi Muzonaguli ntani Satana, ogu ana kupukisa uzuni naunye. Age kwa mu zuguminine pevhu kumwe novaengeli vendi.
10 Ame makura tani zuvhu ezwi lyenene meguru lina kutanta asi:
“Karunga gwetu ana zowora vantu vendi ntani age ana horora nonkondo dendi. Uhompa wendi vana u tulisa po ntani Kristusa ana tameke kupangera, morwa ogu a rundire vapuli vakwetu masiku nomutenya kosipara saKarunga gwetu, vana mu zugumine pevhu.
11 Awo kwa mu fundire kupitira mohonde zoNzwigona ntani morwa mbudi ezi ngava zuvhisa, awo kwa liwapaikilire kugava eparu lyawo.
12 Eyi yiyo nye no hafera ove eguru nava va kara mo! Nye nane vakwetu ava mwa kara pevhu nemefuta, yeeyi Muzonaguli ana mu hegumukire nehandu lyenene, morwa ana diva asi siruwo esi sina mu hupire ko sisupi.”
13 Apa emuzoka lya dimbwilire asi vana li zugumine pevhu, alyo kwa tamekere kuhepeka mukadi ogu ga hampurukire mukeke gomumati.
14 Nye mukadi tava mu pe mavava gavali gekangakodi, makura ta tuka aze momburundu kevega eli va mu wapaikilire, awo ngava ka mu rera yiruwo yitatu noharufa* ure nemuzoka.
15 Emuzoka makura tali rusire mukadi mema gomanzi ngwendi mukuro, yipo ga mu divide mema.
16 Nye evhu tali popere mukadi, alyo kwa zahamene li mine mema aga lya rusire emuzoka.
17 Emuzoka makura tali handukire mukadi, makura tali zi li ka rwise vana* womukadi ava va hupire po ava ava limburukwa koyipango yaKarunga ntani ava ava zuvhisa kuhamena Jesus.
Nonkango dokonhi
^ Kutanta asi “Yilye ogu ga kara ngwendi Karunga?”
^ Ndi “3 1⁄2.”
^ MoRugereka asi “mbuto.”
