Buke zEhororo 13:1-18
13 Emuzoka tali sikama konontere defuta.
Makura tani mono sikasama sina kutunda mefuta aso kwa kere nonombinga murongo nonomutwe ntambali ntani konombinga daso kwa kere ko nonkata murongo, nye konomutwe daso kwa kere ko madina gokuswaukisa Karunga.
2 Sikasama esi na mwene kwa fene ngwendi ehumbu. Nye nompadi daso kwa fene ngwendi derundu ntani kana kaso kwa fene ngwendi kanyime. Emuzoka makura tali gava nonkondo dalyo nosipundi salyo souhompa noupangeli walyo kosikasama.
3 Mutwe gwaso gumwe kwa remanene unene, nye nampili ngomu sironda oso sa kere sokufa nokutara, aso kwa verukire. Vantu navenye womouzuni kwa tetukire sikasama oso, makura tava tameke kusikwama.
4 Makura tava karere emuzoka, morwa alyo kwa geve upangeli walyo kosikasama, makura tava karere sikasama nokutanta asi: “Yilye ogu ga fana sikasama oso? Yilye gokuvhura kusirwisa?”
5 Sikasama kwa gwene nonkondo dokulikanganga nokuswaura Karunga ntani aso kwa gwene nonkondo dokurugana nkenye eyi sina hara ure womakwedi 42.
6 Aso kwa swawire Karunga nedina lyendi, oku ga tunga ntani nava va kara meguru.
7 Aso kwa si pulisilire si rwise vapongoki nokuvafunda. Ntani aso kwa si pere nonkondo dokupangera nkenye rudi nomaraka nonomuhoko.
8 Navenye ava va kara pevhu ngava si karera, kutunda ketameko lyouzuni madina govantu owo kapi va ga tjanga mobukegango zomwenyo zoNzwigona ezi va dipagere.
9 Ogu ga kara nomatwi, a zuvhe.
10 Nkenye ogu ngava kwata ga hepa kuza modorongo. Ano ogu ana kudipaga mukwawo norufuro,* ngava mu dipaga norufuro. Yipo nye, vapongoki va hepa kulididimikira nokukara nepuro.
11 Makura tani mono hena sikasama simwe sina kutunda mevhu. Aso kwa kere nonombinga mbali ngwendi donzwigona, nye aso kwa tamekere kuuyunga ngwendi emuzoka.
12 Sikasama esi kuruganesa nonkondo dosikasama sokuhova, moyitarameho yosikasama sokuhova. Ntani aso kuninkisa uzuni novantu ava va tunga mo, va karere sikasama sokuhova, esi sa remanene unene makura tasi veruka.
13 Aso kurugana yitetu yoyinene komeho zovantu ntani aso kuninka mundiro gu tunde meguru gu wize pevhu.
14 Aso kupukisa ava va tunga pevhu, morwa yidiviso eyi va si pulisilire si rugane komeho zosikasama sokuhova. Aso hena kutantera ava va tunga pevhu va rugane* efano lyosikasama esi sa remanene yiyo sa verukire.
15 Aso kwa si pulisilire si gave eparu* kefano lyosikasama. Yipo efano lyosikasama li uyunge nokuninkisa navenye ava ava dili kulikarera va va dipage.
16 Aso kupangera vantu navenye ava va fumana nava va dira kufumana, nongawo novahepwe, ava va manguruka nava va dira kumanguruka, va va ture yidiviso komawoko gawo gokorulyo ndi poyipara yawo,
17 ntani hena asi kwato ogu na randa ndi a randese, nsene kapi ga kara nosidiviso, kutanta asi edina lyosikasama ndi nomora zaso.
18 Muntu ga hepa kukara nounongo mokukwata egano eyi. Ogu ga kara nonondunge, a varure nomora zosivaro zosikasama, yeeyi azo nomora zomuntu. Ano nomora ozo 666.
Nonkango dokonhi
^ Ndi nampo asi “ogu vana kudipaga norufuro.”
^ MoRugereka asi “va ruganene sikasama efano.”
^ MoRugereka asi “munku.”
