Buke zEhororo 14:1-20
14 Makura tani mono Nzwigona zina sikama poNdundu zaSiyoni kumwe novantu 144 000, poyipara yawo kwa tjanga po edina lyendi neli lyoGuhwe.
2 Ame kwa zuvhire muhagaro guna kutunda meguru, ago kwa hagarere ngwendi mema gomanzi gana kupupa ntani ngwendi sindundumo somvhura. Ago kwa hagarere hena ngwendi vantu vana kudimba oku tava siki yiumba yawo.
3 Awo kwa dimbire rusumo oru rwa zuvhikire ngwendi rorupe komeho zosipundi souhompa ntani komeho zoyinamwenyo yine novapangeli.* Kwato ogu ga vhulire kulironga rusumo oro ntudi vava tupu 144 000, ava va randa pevhu.
4 Ava vaava va dira kulinyateka vene pokudira kuligwanekera panyama novakadi. Awo hena kukwama Nzwigona nkenye oku zina vyuka. Awo kwa va randa mouzuni ntani awo muzangu gokuhova gwaKarunga noNzwigona.
5 Awo kapi ava kumbagere ntani awo kwato sipo.
6 Makura tani mono muengeli ana kutuka meguru. Age kwa udisire mbudi zongwa zanarunye kovantu ava va kara pevhu, konomuhoko nadinye nokomarudi nagenye ntani nokomaraka nagenye.
7 Age kwa zigilire asi: “Tjireni Karunga nokumufumadeka morwa vili zokupangura vantu zina siki, yipo nye, karereni ogu ga sita eguru nevhu nefuta ntani nomarunone gomema.”
8 Muengeli gwauvali ta zigire asi: “Zina gu, Babironi zonene zina gu, age kwa ninkisa yirongo nayinye yinwe vhinyu zendi, ezi za fanekesa ruhonda* rwendi!”
9 Muengeli gwautatu ta zigire asi: “Nkenye ogu a karere sikasama nefano lyaso nokumutura sidiviso posipara sendi ndi pokuwoko kwendi,
10 age nga nwa vhinyu zaKarunga ezi za fanekesa ehandu lyendi, azo kapi va zi hahura ntani Karunga nga zi tjira monkinda zehandu lyendi. Ntani age ngava mu tengeka momundiro gokutwera unene komeho zovaengeli wokupongoka ntani komeho zoNzwigona.
11 Musi gomundiro ogu agu va tengeke ngagu twikira kuza meguru narunye nanarunye. Ntani nkenye ogu a karere sikasama oso nefano lyaso nogu ga gwana sidiviso saso, ngava mu hepeka masiku nomutenya.
12 Eyi yiyo va hepera kulididimikira vapongoki, ava ava sikisa mo nompango daKarunga nokukwaterera kepuro lyawo mwaJesus.”
13 Makura tani zuvhu ezwi meguru lina kutanta asi: “Tjanga asi: Vantu woruhafo vaava vana kufa mouumwe naHompa kutunda apa.” Mpepo zokupongoka kuna kutanta asi: “Va sigeni va pwizumuke koyirugana yawo, yeeyi Karunga kudiworoka yirugana yawo nayinye.”
14 Makura tani mono eremo lyezera, ano ogu ga hingilire po kwa fene ngwendi MunwaMuntu, komutwe gwendi kwa kere ko nkata zongorodo ntani age kwa kwaterere mbere zokutetesa wayi mokuwoko kwendi.
15 Muengeli gumwe ogu ga tundilire montembeli, kwa zigilire ogu ga hingilire peremo asi: “Gusa mbere* zoge o teze, morwa vili zokuteza zina siki, ano muzangu gwepevhu guna pi.”
16 Makura ogu ga hingilire peremo ta zugumine mbere zendi pevhu, makura evhu tava li zangura.
17 Muengeli gumwe hena ta tundu montembeli ezi za kara meguru, nage kwa kere nombere zokutetesa wayi.
18 Muengeli gumwe hena ta tundu posizambero, age kwa kere nononkondo dokupangera mundiro, makura ta zigire ogu ga kere nombere zokutetesa wayi asi: “Gusa mbere zoge o pongaike yisokombwa yoyindjembere yepevhu, yeeyi mandjembere gana pi.”
19 Muengeli makura ta zugumine mbere zendi pevhu nokupongaika mandjembere gepevhu, makura ta ga zugumine mosikameno sovhinyu esi sa fanekesa ehandu lyaKarunga.
20 Nonkambe kwa di ruganesere mokukama mandjembere ogo ponze zositata. Ano honde ezi za tundire mo kwa ka sikire pepi noyitoma yononkambe, honde ozo kwa pupire ure wonokilometa 300 ngoso.*
Nonkango dokonhi
^ MoRugereka asi “novakurona.”
^ Kwa tamba kombere zokutetesa wayi.
^ MoRugereka asi “yira yomaudano 1 600.”
