Buke zEhororo 15:1-8
15 Makura tani mono meguru emoneko lyenene lyokutetukisa. Ame kwa mwene vaengeli ntambali vana kwaterere mahepeko ntambali. Ago yigo mahepeko gokuhulilira, morwa apa ngaga haga, ehandu lyaKarunga nalyo tali pu.
2 Makura tani mono yuma yokufana ngwendi efuta eli lya fana ngwendi ekende eli va vhonga nomundiro. Ano ava va fundire sikasama nefano lyaso ntani nosidiviso saso, kwa sikeme pepi nefuta lyekende, awo vana kwaterere yiumba yaKarunga.
3 Awo kwa dimbire rusumo rwaMosesa, mukareli gwaKarunga ntani norusumo roNzwigona asi:
“Jehova Karunga Munankondo nadinye, yirugana yoge yinene ntani kutetukisa. Nonzira doge kwa hungama ntani kwa vyuka, ove Hompa gwanarunye.
4 Jehova yilye ga dira kukutjira nokuyererepeka edina lyoge? Yeeyi ove nyovelike mulimburukwi. Nomuhoko nadinye ngadi wiza di ya ku karere, morwa va yi dimburura asi ove kupangura pauhunga.”
5 Makura evango lyokupongoka lyomotenta tava li zegurura meguru, motenta ozo kwa kara mo umbangi waKarunga,
6 vaengeli ntambali ava va kwaterere mahepeko ntambali tava tundu mevango olyo, awo kwa dwere yikoverero yokuzera yokuvembera ntani awo kwa limenge makehe gongorodo pononturo dawo.
7 Simwe soyinamwenyo yine tasi gava marupasa ntambali gongorodo kovaengeli ntambali owo. Marupasa ogo kwa zulire ehandu lyaKarunga, ogu a paruka narunye nanarunye.
8 Mevango lyokupongoka makura tamu zura musi, morwa uyerere nononkondo daKarunga. Ntani kwato ogu ga vhulire kuhwilira mevango lyokupongoka, dogoro paapa ga pwire mahepeko ntambali aga va kere nago vaengeli ntambali.
