Buke zEhororo 16:1-21
16 Makura tani zuvhu ezwi lina kuzigira mevango lyokupongoka, alyo kwa tanterere vaengeli ntambali asi: “Zendeni mu ka tjisire ehandu lyaKarunga pevhu, eli lina kara pomarupasa ntambali.”
2 Muengeli gokuhova makura ta zi, ta ka tjisira pevhu eyi ya kere porupasa rwendi. Makura masina gokukoresa unene, taga kara vantu ava va kere nosidiviso sosikasama, awo hena ngava karere efano lyaso.
3 Muengeli gwauvali makura ta tjisire mefuta eyi ya kere porupasa rwendi. Makura efuta tali lisitunuka ngwendi honde zomuntu gokufa, makura yinamwenyo nayinye yemefuta tayi fu.
4 Muengeli gwautatu makura ta tjisire eyi ya kere porupasa rwendi monomukuro nomomarunone gomema, makura nomukuro nomarunone gomema, tayi lisitunuka honde.
5 Makura tani zuvhu muengeli ogu ga kara nononkondo dokupangera mema kuna kutanta asi: “Ove Karunga gomulimburukwi, ogu ana kara po ntani ogu ga kere po, ove kwa hungama yiyo wa pulisilira yininke eyi yi horoke,
6 awo kwa tjisanga honde zovapongoki nezi zovaporofete, eyi yiyo va va ninkira va nwe honde, morwa vene va yi lipaparera.”
7 Makura tani zuvhu ezwi lina kutunda mosizambero, alyo kwa tente asi: “Jehova Karunga, Munankondo nadinye, yosili ove kupangura pauhunga ntani mousili.”
8 Muengeli gwaune makura ta tjisire pezuva eyi ya kere porupasa rwendi, makura ezuva tava li pulisire li hwike vantu nomundiro.
9 Makura upyu womundiro ogo tau hwike vantu. Nye awo tava swaura edina lyaKarunga, ogu ga kara nononkondo dokupangera mahepeko ogo. Ntani awo kapi va litezwilire va mu yererepeke.
10 Muengeli gwautano makura ta tjisire posipundi souhompa sosikasama eyi ya kere porupasa rwendi. Makura uhompa waso tau sovagana. Ano vantu tava likwetja komazego, morwa kukora oku va zuvhire,
11 nye vantu tava swaura Karunga gemeguru morwa kukora oku va zuvhire ntani morwa masina aga gava kere ntani morwa kapi va litezwilire koyirugana yawo.
12 Makura muengeli gwauntazimwe ta tjisire eyi ya kere porupasa rwendi momukuro gomunene gwaEufurata. Makura mema taga pwire, mokuwapaikira nzira vahompa wokoUpumezuva.
13 Makura tani mono nompepo ntatu dokunyata edi da fene ngwendi mankowowo. Ado kwa tundire mokana kemuzoka nomokana kosikasama ntani mokana komuporofete goyimpempa.
14 Nompepo odo kwa tunda konompepo donondona edi adi rugana yitetu. Ntani ado kuza kovahompa vepevhu nalinye, di ka va pongaikire yita eyi ngayi horoka mezuva lyenene lyaKarunga Munankondo nadinye.
15 “Tara! Ame kuna kuwiza ngwendi muwidi. Muntu goruhafo googu ana kuvangarara nokudira kuhutura yikoverero yendi, yipo nga dire kugendagura muhere-here, makura vantu ngava mone nomuga dendi.”
16 Nompepo makura tadi pongaike vahompa pevega limwe eli ava tumbura moRuhebeli asi Harumagedoni.*
17 Muengeli gwauntambali makura ta tjisire mompepo eyi ya kere porupasa rwendi. Ano mevango lyokupongoka, kosipundi souhompa taku tundu ezwi, alyo kwa zigilire asi: “Yina pu!”
18 Makura tani zuvhu mazwi noyindundumo yomvhura ntani tapa horoka maruvadi nekankamo lyevhu lyenene unene, eli lya dira kukara po rumwe kutunda apa vava sitire vantu pevhu.
19 Sitata sosinene makura tasi gaunuka patatu ntani yitata yonomuhoko tayi gu. Karunga makura ta diworoka Babironi zonene nokuzipa nkinda zovhinyu zehandu lyendi lyenene.
20 Ntani yirudi nayinye nonondundu tayi dongonoka po.
21 Makura kamanya komukumo gokuhura ponokilograma 20,4* ta ka rokere vantu. Vantu makura tava swaura Karunga morwa ehepeko olyo lyokamanya, yeeyi ehepeko olyo lyokamanya enene unene lya kere.
Nonkango dokonhi
^ MoRugereka Har Ma·ge·don. Nkango ezi kwa tunda konkango zoRuhebeli ezi azi tanta asi “Ndundu zaMegido.”
^ MoRugereka asi “mukumo gokusika potalent.”
