Buke zEhororo 18:1-24
18 Konyima zeyi, makura tani mono hena muengeli ana kutunda meguru. Age kwa kere nononkondo dononene ntani uyerere wendi kwa temenene pevhu.
2 Age kwa zigilire nezwi lyenene asi: “Zina gu! Babironi zonene zina gu! Ntani zina kara evango omu da tunga nompepo donondona noyidira yokunyata nonompepo* dokunyata!
3 Morwa vhinyu ezi za fanekesa ruhonda rwendi, kwa ninkisa nomuhoko dononzi di korwe. Vahompa vepevhu kwa hondera nage ntani varandesi vepevhu kwa ya ngawopa, morwa yininke eyi ga lipongaikira ntani age kapi a lifu nomuga koyininke oyo.”
4 Makura tani zuvhu ezwi lina kutunda meguru lina kutanta asi: “Pwageni mo vantu vange, yipo ngomu dire kuzona ngwendi yige ntani yipo ngava dire kumutengeka ngwendi yige.
5 Yeeyi nonzo dendi nonzi unene ntani Karunga nga mu pangura, morwa yirugana yendi yoyidona.
6 Mu futiseni koyininke yoyidona eyi ga rugana wopeke. Mu futiseni pwaruvali koyininke yoyidona eyi ga rugana, monkinda ezi ga rungira yikunwa, mu rungireni mo yikunwa yononkondo unene.
7 A hepe nokuguva unene ngwendi moomu ga linenepeka, nokukara noungawo ou a dili kulifa nomuga, yeeyi age kulitantera mwene asi: ‘Ame hompa gomukadi! Ame kapisi mufisayendi ntani kapi ngani guva.’
8 Eyi yiyo ngaga mu gwanena maudigu mezuva limwe tupu, nomfa noruguwo nerumbu ntani age ngava mu hwika momundiro, morwa Jehova Karunga ogu ga mu pangura, ga kara nononkondo.
9 “Ano vahompa vepevhu ava va hondera nage nokugwanena mo uwa moungawo wendi, ou ga dilira kulifa nomuga ngava lira nokuguva unene, apa ngava mu mona kuna kututumuka musi.
10 Awo ngava sikama koure, morwa kutjira asi nawo ngava va hepeka nage ntani ngava zigira asi: ‘Nane woo, nane woo, sitata ove sosinene, Babironi, sitata sononkondo, yeeyi ove kuna kuzonagura po movili zimwe tupu!’
11 “Ntani varandesi womouzuni ngava mu lira ntani ngava guva, morwa kwato ogu ana kuranda hena yininke yawo nayinye eyi,
12 ngorodo, sisiliveli, tumanya tondiro, nombamba, makehe gomawa, makehe gopurupuli, makehe goureru ntani makehe gomageha nanayinye eyi va rugana koyitji nanayinye eyi va rugana konombinga danzovhu noyitji yoyiwa nongoporo nosivera ntani mamanya gomawa;
13 ntani yitoveseso yosinamoni, yitoveseso yokoIndia, yitutumikidiso yedumba lyewa, magadi gedumba lyewa, manganganga gokututumikidisa, vhinyu, magadi gononzwe, usura, rukokotwa, nongombe, nonzwi, nonkambe, turukara, vapika ntani novantu.
14 Yininke nayinye yoyiwa eyi wa hara vana yi ku hakana ntani nondya donontovara noyininke yoyiwa yina ku dongonoka, kapi ngo yi gwana hena.
15 “Varandesi ava va randesa yininke oyo nokungawopera mwendi, ngava sikama koure, morwa kutjira asi nawo ngava va hepeka nage ntani ngava lira nokuguva,
16 awo ngava zigira asi: ‘Nane woo, nane woo, sitata sosinene esi sa dwara yikoverero yoyiwa yopurupuli neyi yoyigeha ntani noyiranda yongorodo notumanya tondiro nonombamba,
17 yeeyi ungawo wendi vana u zonagura po movili zimwe tupu!’
“Vakurona woyikepa novarugani vawo ntani vasingi woyikepa nava ava randesere kefuta kwa sikeme koure
18 nokuzigira ngomu va tere omu ana kututumuka musi asi: ‘Kwato sitata esi sa fana ngwendi sitata esi sosinene.’
19 Tava lirafagwire evhu konomutwe nokulira oku tava zigire asi: ‘Nane woo, nane woo, sitata sosinene esi sa ngawopeka vanayikepa navenye, vana si zonagura po movili zimwe tupu!’
20 “Hafeni one ava mwa kara meguru none vapongoki novapositoli ntani novaporofete, yeeyi age vana mu pangura koyininke ga mu rugana!”
21 Muengeli gononkondo ta damuna emumanya* makura tali zugumine mefuta, ta tanta asi: “Babironi, sitata sosinene, ngava si zuguma usimbu-simbu ntani kapi ngasi kara po hena.
22 Ntani mositata oso kapi nga mu zuvhika hena mazwi govadimbi woyiumba ndi gonombimbi ndi nonsiva ndi vantu ava vana kufuda marumbendo. Ntani kwato ogu nga rugana mo ndi asi a goge rukokotwa nemumanya.
23 Amo kapi nga mu temena hena site soramba ntani kapi nga mu zuvhika hena mazwi govantu vana kukwara; yeeyi varandesi woge yiwo va kere vantu womulyo pevhu ntani yirugana yoge youmpure kwa pukisa nomuhoko nadinye.
24 Mositata esi, yimo va gwana honde zovaporofete nezi zovapongoki ntani nava navenye va dipaga pevhu.”
Nonkango dokonhi
^ Ndi nampo asi “munku; marongo goyimpempa.”
^ Ndi “emanya lyokufana ngwendi emanya lyenene eli ngava ruganesa mokukweya rukokotwa.”
