Buke zEhororo 19:1-21
19 Konyima zeyi, tani zuvhu ngwendi ezwi lyombunga zonene zoyinamwenyo meguru, ayo kwa zigilire asi: “Hamberereni Jehova!* Eparu nouyerere nononkondo yaKarunga gwetu,
2 morwa age kupangura mousili ntani pauhunga. Yeeyi age kwa tengekere hondedi zonene, ogu ga pukisire uzuni naunye noruhonda* rwendi, nokumutengwida kuwoko kweyi ga dipagere vakereli vaKarunga.”
3 Poopo ngoso, tayi zigire rwauvali asi: “Hamberereni Jehova!* Makura musi ogu gwa mu tutumukire tagu zi meguru narunye nanarunye.”
4 Makura vapangeli* 24 noyinamwenyo yine tayi ligandere pevhu nokukarera Karunga ogu ga hingira kosipundi souhompa, makura tayi zigire asi: “Amen! Hamberereni Jehova!”*
5 Ntani hena, tani zuvhu ezwi lina kutunda kosipundi souhompa, alyo tali tanta asi: “Hamberereni Karunga gwetu, one vakareli vendi navenye ava va mu tjira, ava va fumana nava va dira kufumana.”
6 Makura tani zuvhu ezwi ngwendi lyoyinamwenyo yoyinzi ntani ngwendi mema gomanzi gana kupupa, ntani ngwendi sindundumo sosinene somvhura. Ayo kwa zigilire asi: “Hamberereni Jehova,* morwa Jehova Karunga gwetu, Munankondo nadinye ntani ana tameke kupangera ngahompa!
7 Tu hafeni unene nokumuyererepeka, yeeyi ekwareko lyoNzwigona lina siki ntani mufuko gwendi ana liwapaike.
8 Age vana mu pulisire va mu dwareke yikoverero yokuvembera yokuzera ntani yoyiwa, yeeyi yikoverero yoyiwa kwa fanekesa yirugana youhungami yovapongoki.”
9 Muengeli makura ta tantere nge asi: “Tjanga, vantu woruhafo vaava va zigida kosipito sekwareko lyoNzwigona.” Ta tantere nge hena asi: “Nonkango odo daKarunga dousili.”
10 Makura tani ligandere komeho zendi ni mu karere. Nye age ta tantere nge asi: “Takamesa! Wa ha yi rugana! Name mukareli ngwendi nyove ntani ngwendi vakweni ava ava gava umbangi kuhamena Jesus. Karera Karunga! Yeeyi mauporofete yigo aga tanta usili kuhamena Jesus.”
11 Makura tani mono eguru lina zeguruka. Na tara ko, nkambe zonzera zina kara mo, ano ogu ga hingilire po yige Mulimburukwi noMunasili. Ntani age kupangura pauhunga nokurwa yita youhungami.
12 Meho gendi kwa fene ngwendi mundiro ntani komutwe gwendi kwa kere ko nonkata dononzi. Age kwa mu tjanga edina eli ga dira kudiva muntu, ntudi mwene,
13 age kwa dwere sikoverero esi sa kere nohonde.* Ntani age kumutumbura asi Nkango zaKarunga.
14 Ntani hena, nombunga dovakwayita vemeguru kwa mu kweme, awo vana rondo pononkambe dononzera ntani awo kwa dwere yikoverero yoyizera, yokuzera ntani yoyiwa.
15 Mokana kendi tamu tundu rufuro rorure rokutwepa, yipo a dipagese ko nomuhoko. Ntani age nga va pangera nomburo zosivera. Age nga lyatanga sikameno sovhinyu saKarunga Munankondo nadinye, esi sa fanekesa ehandu lyendi lyenene.
16 Ntani poyiha yetungi posikoverero sendi, kwa tjanga po edina eli asi Hompa govahompa ntani Mupangeli govapangeli.
17 Makura tani mono hena muengeli ana sikama mezuva. Age kwa zigilire unene nokutantera yidira nayinye eyi ayi tuka meguru asi: “Wizeni oku mu ya ponge kumwe pomurarero gomunene gwaKarunga,
18 yipo mu ya lye nyama zovahompa nezi zovapitisili wovakwayita nezi zovanankondo ntani nezi zononkambe nava vana rondo po nonyama zovantu navenye, zi kare asi nyama zava va manguruka ndi vapika ndi zava va fumana nezi zava va dira kufumana.”
19 Ntani ame kwa mwene sikasama ntani vahompa vepevhu novakwayita vawo, awo vana pongo va ka rwise ogu ga rondere ponkambe novakwayita vendi.
20 Makura sikasama tava si kwata kumwe nomuporofete goyimpempa, ogu nga rugana yitetu komeho zosikasama. Yitetu eyi, kwa pukisire ava va kere nosidiviso sosikasama nokukarera efano lyaso. Ayo simpe yizuni, tava yi zugumine mediva lyomundiro ogu agu rokota unene.
21 Nye wokuhupa ko kwa va dipagere norufuro oru rwa tundire mokana kogu ga rondere ponkambe. Yidira nayinye makura tayi kuta konyama zawo.
Nonkango dokonhi
^ MoRugereka asi “Hallelujah!” Jah kuna kara esupipiko lyedina Jehova.
^ MoRugereka asi “Hallelujah!” Jah kuna kara esupipiko lyedina Jehova.
^ MoRugereka asi “vakurona.”
^ MoRugereka asi “Hallelujah!” Jah kuna kara esupipiko lyedina Jehova.
^ MoRugereka asi “Hallelujah!” Jah kuna kara esupipiko lyedina Jehova.
^ Ndi nampo asi “esi va sansa honde.”
