Buke zEhororo 2:1-29
2 “Tjangera muengeli gombungakriste zomoEfeso asi: Eyi yiyo ana kutanta ogu ga kwaterera nombungururu ntambali mokuwoko kwendi kokorulyo, ogu a gendagura mokatji komauzweko gonoramba ntambali gongorodo:
2 ‘Ame na diva yirugana yeni nelididimiko lyeni ntani asi one kapi mwa hara vantu wovadona ntani one kuheteka vantu ava ava tanta asi awo vapositoli nokudimburura asi awo kulininkisa.
3 One hena kuna kutwikira kulididimika, morwa edina lyange ntani kapi mwa roroka.
4 Nampili ngoso, ame kuna kukupa usima, morwa kapi ono hara nge hena ngwendi moomu wa here nge pomuhowo.
5 “‘Diworokeni eharo eli mwa kere nalyo pomuhowo eli mwa zumbanesa ntani litezurureni mu rugane eyi ngomu rugana nare. Nsene kapi muna kuyirugana, ngani wiza ni ya guse uzweko woramba zeni pevega lyazo.
6 Nampili ngoso, one kuna kurugana sininke sosiwa, pokunyenga eyi azi rugana mbunga zoVanikorayite, eyi na nyenga name.
7 Ogu ga kara nomatwi a zuvhe eyi zina kututantera mpepo zokupongoka nombungakriste asi: Ogu ana kufunda ngani mu ninka a lye kositji somwenyo, esi sa kara moparadisa zaKarunga.’
8 “Tjangera muengeli gombungakriste zaSimerena asi: Eyi yiyo ana kutanta ‘gokuhova, age hena gokuhulilira,’ ogu ga fire yiyo ana kuparuka:
9 Age kuna kutanta asi ‘ame na diva maudigu noruhepo rweni nye ame kumutara asi one nongawo. Ame na diva hena vantu ava ava tanta asi awo Vajuda, nye awo kumuswaura, awo kapisi Vajuda, nye awo kwa hamena kosinagoge* zaSatana.
10 Mwa ha tjira maudigu aga gana kumundindira. Tareni! Muzonaguli nga tura vamwe veni modorongo, yipo a mu heteke nawa-nawa ntani one ngomu ligwanekera nomaudigu mazuva murongo. Limburukweni nampili dogoro konomfa, yipo ngani mu pe nkata zomwenyo.
11 Ogu ga kara nomatwi a zuvhe eyi zina kutantera mpepo zokupongoka nombungakriste asi: Ogu ana kufunda kapi nga ligwanekera nonomfa dauvali.’
12 “Tjangera muengeli gombungakriste zaPeregamu asi: Eyi yiyo ana kutanta ogu ga kwaterera rufuro rorure rokutwepa ronomemo mbali.
13 Age kuna kutanta asi ‘ame na diva oku wa tunga, ove kwa tunga oku sa kara sipundi souhompa saSatana, nye ove kwa twikira kulimburukwa nge nokukara nepuro mwange, nampili momazuva gaAntipasi, mukareli gwange gomulimburukwi ogu va dipagere oku ga tunga Satana, ove kuna kutara.
14 “‘Nampili ngoso, ame kuna kukupa usima, morwa wa kara nava ava kwama marongo gaBaramu, ogu ga rongere Baraka a ninkise Vaisraeli va lye nyama ezi va zamberere koyikarunga yoyimpempa nokuhondera.*
15 Mokulifana, nove kwa kara nava ava kwama marongo gokambunga koVanikorayite.
16 Yipo nye, litezurura. Nsene kapi ono kuyirugana, ame kuna kugenderera kuwiza koge, ntani ngani va rwisa norufuro rorure romokana kange.
17 “‘Ogu ga kara nomatwi a zuvhe eyi zina kutantera mpepo zokupongoka nombungakriste asi: Ogu ana kufunda ngani mu pa mana ezi va horeka ntani nemanya lyezera, pemanya olyo kwa tjanga po edina lyepe eli ga dira kudiva nkenye ogu, ntudi googu vana kulipa ntani.’
18 “Tjangera muengeli gombungakriste zaTiyatira asi: Eyi yiyo ana kutanta MunwaKarunga, ogu ga kara nomeho aga aga twera ngwendi mundiro ntani ogu ga kara nonompadi edi da fana ngwendi ngoporo.
19 Age kuna kutanta asi: ‘Ame na diva yirugana yoge neharo lyoge nepuro lyoge ntani nedidimiko lyoge ntani na yi diva asi eyi ono kurugana ngesi ya pitakana eyi ngo rugana nare.
20 “‘Nampili ngoso, ame kuna kukupa usima, morwa ove kutarerera Jesebeli mukadi ogu a tanta asi age muporofete ntani age kuronga nokupukisa vakareli vange va lihameke moruhonda* nokulya nyama ezi va zamba koyikarunga yoyimpempa.
21 Ame kwa mu pa siruwo a litezurure, nye age kapi ga hara kulitezurura a sige ruhonda* rwendi.
22 Tara! Ame ntaantani ni mu zugume uvera wounene, ano ava ava hondere nage, ngani va zugumina moudigu wounene, nsene kapi vana kulitezurura koyirugana yendi.
23 Ntani ame ngani dipaga vana vendi nouvera womukagu, yipo nombungakriste nadinye ngadi dive asi ame nyame ani konakona magazaro* gokonhi-nhi nonomutjima dovantu ntani ove ngani kufuta kuliza noyirugana yoge.
24 “‘Nampili ngoso, ame kuna kutantera ava va kara moTiyatira, ava ava dili kukwama erongo lyaJesebeli ntani nava va dira kudiva marongo goyimpempa* gaSatana asi: Ame kapi nina kumupa mudigo gwapeke.
25 Nye ngwendi mwanare, kwaterereni koyininke yoyiwa eyi mwa kara nayo dogoro paapa ngani wiza.
26 Nye ogu ana kufunda nokurugana eyi na mu pangera dogoro kouhura, ngani mu pa nonkondo dokupangera nomuhoko nadinye,
27 ngwendi moomu va di pange Otate ntani age nga pitisira nomburo zosivera, yipo ava zonagure po ngwendi yipako yerova,
28 ntani ame ngani mu pa ntunguru.*
29 Ogu ga kara nomatwi a zuvhe eyi zina kutantera mpepo zokupongoka nombungakriste.’
Nonkango dokonhi
^ Ndi “malizuvho gokonhi-nhi.” MoRugereka asi “nongera.”
^ MoRugereka asi “marongo gaSatana gokonhi-nhi.”
^ Ndi “mbungururu zongurangura.”
