Buke zEhororo 20:1-15
20 Makura tani mono muengeli ana kutunda meguru, age ana kwaterere nsapi zekekero lyere unene nouketanga wounene mokuwoko kwendi.
2 Age ta kwata emuzoka, alyo emuzoka lyanare eli ava tumbura asi Muzonaguli ntani Satana, makura ta mu mangerere ure wonomvhura 1 000.
3 Makura ta mu zugumine mekero lyere unene, ta mu zedilire mo nokumupaterera, yipo a dire kupukisa nomuhoko dogoro ngadi pite nomvhura 1 000. Konyima zeyi, ngava mu mangurura pokaruwogona tupu.
4 Makura tani mono yipundi youhompa. Ano ava va hingilire po, kwa va pere nonkondo dokupangura. Makura tani mono nomwenyo dava va dipagere,* morwa kugava umbangi kuhamena Jesus nokuuyunga kuhamena Karunga ntani nava va dilire kukarera sikasama nefano lyaso. Ntani awo kapi vava tulire yidiviso poyipara yawo nokomawoko gawo. Awo kwa ya kere nomwenyo nokupangera ngovahompa kumwe naKristusa ure wonomvhura 1 000.
5 Eli yilyo evhumbuko lyokuhova. Vafe wokuhupa ko kapi vava vhumbwire dogoro paapa da pitire nomvhura 1 000.
6 Vantu woruhafo ntani wokupongoka, vaava va hamena kevhumbuko lyokuhova, yeeyi nomfa dauvali kapi da kara nononkondo kwawo, nye awo ngava kara vapristeli vaKarunga naKristusa ntani ngava pangera nage ngovahompa ure wonomvhura 1 000.
7 Nomvhura 1 000 apa ngadi pita, Satana ngava mu mangurura mo modorongo zendi,
8 makura nga ze aka pukise nomuhoko edi da kara komakovhu gane gouzuni, Gogo ntani Magogo mokukava pongaikira yita. Sivaro sawo kwa hura pomuheke gwemefuta.
9 Awo kwa lihanena uzuni naunye nokukundurukida kamba zovapongoki nositata esi ga hara Karunga. Nye mundiro tagu tundu meguru makura tagu va hwike.
10 Ano Muzonaguli ogu nga va pukisa, tava mu zugumine mediva lyomundiro ogu agu rokota unene, omu sina kara sikasama nomuporofete goyimpempa; awo ngava va hepeka* masiku nomutenya narunye nanarunye.
11 Makura tani mono sipundi souhompa sosinene sosizera ntani nogu ga hingilire po. Eguru nevhu kwa mu duka, yiyo ya dongonoka po.
12 Makura tani mono vafe, ava va fumana nava va dira kufumana vana sikama komeho zosipundi souhompa, makura nobukegango tava di paturura. Nye bukegango zapeke tava zi paturura, azo bukegango zomwenyo. Vafe tava va pangura koyirugana yawo kuliza neyi va tjanga monobukegango odo.
13 Efuta makura tali gava vafe ava va kere mo ntani nomfa noMayendo,* nayo tayi gava vafe vayo, nkenye ogu makura tava mu pangura kuliza noyirugana yendi.
14 Makura nomfa noMayendo* tava yi zugumine mediva lyomundiro. Alyo kwa fanekesa nomfa dauvali.
15 Ano nkenye ogu va dilire kutjanga edina lyendi mobuke zomwenyo, kwa mu zuguminine mediva lyomundiro.
