Buke zEhororo 21:1-27
21 Makura tani mono eguru lyepe nevhu lyepe, yeeyi eguru lyanare nevhu lyanare ya dongonoka po ntani efuta nalyo lya dongonoka po.
2 Makura tani mono sitata sokupongoka, Jerusarema zompe, zina kutunda kwaKarunga meguru, azo kuna zi wapaike ngwendi moomu ava wapaikire mufuko mugara gwendi.
3 Makura tani zuvhu ezwi lyenene lina kutunda posipundi souhompa, tali tanta asi: “Tara! Tenta zaKarunga pozili povantu. Age ta ya tungu kumwe nawo ntani awo ngava kara vantu vendi. Karunga mwene nga kara nawo.
4 Ntani age nga kokota mahodi nagenye komeho gawo. Nomfa kapi ngadi kara ko hena, ntani kuguva nomalirankali nokukora, kapi ngayi kara ko hena, yeeyi yininke yanare yina dongonoka po.”
5 Makura ogu ga hingilire kosipundi souhompa, ta tantere nge asi: “Tara! Ame kuna kuninka yininke nayinye yi kare yoyipe.” Ta tantere nge hena asi: “Tjanga, yeeyi nonkango edi usili ntani kuvhura kudihuguvara.”
6 Age kwa tanterere nge hena asi: “Yina dongonoka po! Ame nyame etameko nouhura.* Nkenye ogu ana kufa enota ngani mu ninka a nwe morunone romema gomwenyo mawoko-woko.*
7 Nkenye ogu ana kufunda ngani mu ninka a pinge yininke eyi, ano ame ngani kara Karunga gwendi ntani age nga kara munange.
8 Nye ava wowoma nava va dira epuro ntani nava va dira kukuhuka nava ava rugana yokunyata novadipagi ntani novanaruhonda* ntani nava ava rugana youmpure nava ava karere yikarunga yoyimpempa nanavenye ava ava kumbagere, ngava va zugumina mediva lyomundiro ogu agu rokota unene. Eyi kwa fanekesa nomfa dauvali.”
9 Muengeli gumwe povaengeli ntambali, ava va kwaterere marupasa ntambali, aga ga zulire mahepeko ntambali gokuhulilira, ta wiza kwange nokutantera nge asi: “Wiza ni ya ku likide mufuko, mukadaNzwigona.”
10 Makura ta twara nge kondundu zonde kupitira mompepo zokupongoka, ta likida nge sitata sokupongoka, Jerusarema ezi zina kutunda meguru kwaKarunga
11 ntani azo kwa kere nouyerere waKarunga, azo kwa paimine ngwendi emanya lyondiro unene, ngwendi emanya lyojasipesi lina kuvembera.
12 Azo kwa kere nekuma lyere nomarungavero 12, ano pomarungavero nagenye 12 kwa kere po muengeli ntani apo kwa tjenge po madina 12 gomazimo goVaisraeli.*
13 KoUpumezuva kwa kere ko marungavero gatatu, koMuzogo kwa kere ko marungavero gatatu ntani koMbindakano kwa kere ko marungavero gatatu ano koUtokero nako kwa kere ko marungavero gatatu.
14 Ekuma lyositata kwa kere nomamanya 12 getateko lyomamanya murongo nagavali, ntani apo kwa tjenge po madina 12 govapositoli 12 woNzwigona.
15 Ano ogu ga uyungisire nge kwa kwaterere ruu rongorodo yipo a faneke sitata nomarungavero gaso ntani nekuma lyaso.
16 Sitata kwa kere sosikwambando, ntani ure waso kwa hetakanene nounene waso. Age makura ta faneke sitata noruu, ure waso kwa sikire ponokilometa 2 220,* ano unene waso nomusika gwaso kwa hetakanene.
17 Age kwa fanekere hena ekuma lyaso. Alyo kwa sikire koyiha yonometa 64, kuliza nomu a faneke muntu ntani nomu a faneke muengeli.
18 Ekuma kwa li rugene nemanya lyojasipesi ntani sitata kwa kere songorodo zene-zene zokufana ekende.
19 Matateko gositata kwa ga fuwisire nomamanya gokulisiga-siga gondiro. Etateko lyokuhova nemanya lyojasipesi, lyauvali lyosafire, lyautatu lyokalikedoni, lyaune lyoemeralidi,
20 lyautano lyosaredonikisi, lyauntazimwe lyosarediyoni, lyauntambali lyokilisolite, lyauntantatu lyobereli, lyauntane lyotopasi, lyomurongo lyokilisoparasusi, lyomurongo nazimwe lyohiasinte ntani lyomurongo nambali lyoametisi.
21 Ntani hena komarungavero 12 kwa kere ko nombamba 12, nkenye erungavero kwa kere nombamba zimwe. Ntani sitaura sositata kwa si ruganesere nongorodo zene-zene ngwendi ekende lyokumonekesa.
22 Mositata oso kapi na mwene mo ntembeli, yeeyi Jehova Karunga Munankondo nadinye ntani Nzwigona, yiwo ntembeli zaso.
23 Sitata oso kapi sa hepa ezuva ndi kwedi kusiminikire, yeeyi uyerere waKarunga yiwo wa si temenene, ntani Nzwigona yizo ramba zaso.
24 Nomuhoko ngadi genda mouzera waso ntani vahompa vepevhu ngava reta mo uyerere wawo.
25 Marungavero gaso kapi ngava ga pata, morwa mutenya gwelike ngagu kara ko, ano masiku kapi ngaga kara ko.
26 Ano uyerere nefumano lyonomuhoko ngava yi reta mo.
27 Nye nasimwe si sokunyata nankenye ogu a rugana yokunyata ndi ogu a kumbagere, nga hwilira mo, ava ngava hwilira mo, vaava va tjanga mobukegango zomwenyo zoNzwigona.
Nonkango dokonhi
^ MoRugereka asi “Alpha naOmega.” Alpha kuna kara ndanda zokuhova ano Omega kuna kara ndanda zokuhulilira monoalfabeti doRugereka.
^ Ndi “ga hana kufuta.”
^ MoRugereka asi “govana vaIsraeli.”
^ MoRugereka asi “yira yomaudano 12 000.” Sira simwe kwa hulire 185 m.
