Buke zEhororo 22:1-21
22 Age makura ta likida nge mukuro gomema gomwenyo gokuvembera ngwendi emanya lyokilisitara. Ago kwa pupire gu tunde posipundi souhompa saKarunga nesi soNzwigona
2 dogoro pokatji kositata. Kwankenye ruha romukuro kwa kere yitji yomwenyo, eyi ngayi yimi manyango 12, kutanta asi nkenye kwedi ngayi yimi enyango. Ano yihako yoyitji oyo yokuverwisa nomuhoko.
3 Karunga kapi nga finga sitata. Sipundi souhompa saKarunga nesi soNzwigona ngayi kara mo mositata ntani vakareli vendi ngava mu karera.
4 Awo ngava mona sipara sendi ntani edina lyendi ngava li tjanga poyipara yawo.
5 Ntani hena, masiku kapi ngaga kara ko ntani awo kapi ngava hepa site soramba ndi site sezuva, yeeyi Jehova Karunga nga va minikira, ntani awo ngava pangera ngovahompa narunye nanarunye.
6 Age ta tantere nge asi: “Nonkango edi usili ntani kuvhura kudihuguvara. Yosili, Jehova Karunga ogu a uyunga kupitira movaporofete, kuna tumu muengeli gwendi a ya likide vakareli vendi yininke eyi nayi horoka ntaantani.
7 Tara! Ame kuna kugenderera kuwiza. Muntu goruhafo googu ana kusikisa mo nonkango douporofete womobukegango ezi.”
8 Ame Johanesa, kwa mwene nokuzuvha yininke eyi. Apa nayi mwene nokuyizuvha, tani ligandere konompadi domuengeli ogu ga likidire nge yininke eyi, yipo ni mu karere.
9 Nye age ta tantere nge asi: “Takamesa! Wa ha yi rugana! Name mukareli ngwendi nyove ntani novaporofete vakweni ava ava sikisa mo nonkango domobukegango ezi. Karera Karunga.”
10 Ta tantere nge hena asi: “Wa ha horeka nonkango douporofete womobukegango ezi, yeeyi siruwo pepi sina kara, yipo di sike mo.
11 Ogu a rugana yokudira kuhungama, a twikire kurugana yokudira kuhungama, ogu a rugana yokunyata, a twikire kurugana yokunyata, nye ogu a rugana yokuhungama, a twikire kurugana yokuhungama ntani ogu ga pongoka a twikire kukara mupongoki.
12 “‘Tara! Ame kuna kugenderera kuwiza ntani ame kuna kara nomfuto, yipo ni ya fute nkenye ogu kuliza noyirugana yendi.
13 Ame nyame gokuhova ntani gokuhulilira, etameko nouhura.*
14 Vantu woruhafo vaava ava kuhu marwakani gawo, yipo ngava va pulisire va lye koyitji yomwenyo nokupita pomarungavero va hwilire mositata.
15 Ponze zositata yipo da kara nombwa* nava ava rugana youmpure nava ava hondere* novadipagi nava ava karere yikarunga yoyimpempa ntani nkenye ogu ga hara kukumbagera nkenye apa.’
16 “‘Ame Jesus kwa tuma muengeli a ya ku pe umbangi kuhamena yininke eyi, morwa nombungakriste. Ame nyame ndandani zaNdafita ntani ame gomoruvharo rwendi, ame nyame ntunguru* ezi azi paima.’”
17 Mpepo zokupongoka nomufuko tava tanta asi: “Wiza!” ntani nkenye ogu ana kuyizuvha eyi, a tante asi: “Wiza!” ano nkenye ogu ana fu enota, a wize. Nkenye ogu ana hara, a wize a ya guse mema gomwenyo mawoko-woko.
18 “Ame kuna kugavera umbangi nkenye ogu ana kuzuvha nonkango douporofete domobukegango ezi asi: Nkenye ogu ana kugwederera ko koyininke eyi, Karunga nga mu gwederera komahepeko aga va tjanga mobukegango ezi;
19 ano ogu ana kugusa ko yuma kononkango douporofete domobukegango ezi, Karunga nga mu gusa ruha rwendi oru va tjanga mobukegango ezi, eyi kutanta asi Karunga kapi nga mu pulisira a lye enyango lyokoyitji yomwenyo ntani kapi nga mu pulisira aze mositata sokupongoka.
20 “Ogu ana kugava umbangi kuhamena yininke eyi kuna kutanta asi: ‘Yosili, ame kuna kugenderera kuwiza.’”
“Amen! Wiza, Hompa Jesus.”
21 Nkenda zonene zaHompa Jesus, ngano zi kare novapongoki.
Nonkango dokonhi
^ MoRugereka asi “Alpha naOmega.” Alpha kuna kara ndanda zokuhova ano Omega kuna kara ndanda zokuhulilira monoalfabeti doRugereka.
^ Kwa tamba ava ava rugana yininke yokunyata kosipara saKarunga.
^ Ndi “mbungururu zongurangura.”
