Buke zEhororo 3:1-22
3 “Tjangera muengeli gombungakriste zaSaredesa asi: Eyi yiyo ana kutanta ogu ga kara nonompepo daKarunga ntambali ntani nonombungururu ntambali, age kuna kutanta asi: ‘Ame na diva yirugana yoge, ove kumoneka ngwendi o muzuni, nye nare wa fa.
2 Vangarara nokunkondopeka yininke eyi yina karere mokufa, yeeyi kapi ono kusikisa mo nawa-nawa yininke nayinye eyi ana kuharere Karunga asi o yi rugane.
3 Yipo nye, twikira kudiworoka eyi wa gwana neyi wa zuvha ntani twikira kukwaterera kwayo nokulitezurura. Nsene kapi ono kupinduka, ngani wiza ngwendi muwidi, ove kapi ngo diva asi vili musinke ngani kuwizira.
4 “‘Nampili ngoso, ove wa kara novantu wovasesu* moSaredesa ava va dira kunyateka yikoverero yawo. Awo ngava genda kumwe name moyikoverero yoyizera, morwa yiwo sa wapera situmbukira oso.
5 Ogu ana kufunda nga dwara yikoverero yoyizera ntani kapi ngani dongonona edina lyendi mobuke zomwenyo, nye ame ngani ka mu divisa komeho zoTate ntani komeho zovaengeli asi na diva edina lyendi.
6 Ogu ga kara nomatwi a zuvhe eyi zina kutantera mpepo zokupongoka nombungakriste.’
7 “Tjangera muengeli gombungakriste zaFiradelifiya asi: Eyi yiyo ana kutanta ogu ga pongoka, munasili ntani ogu ga kara nonsapi zaNdafita, ogu a zegurura evero eli ava dili kuvhura kuzedira ntani ogu a zedire evero eli ava dili kuvhura kuzegurura:
8 Age kuna kutanta asi ‘ame na diva yirugana yoge. Tara! Ame na ku zegwilira evero eli na dira kuvhura kuzedira muntu. Ame na diva asi ove kwa kara nononkondo dononsesu, nye ove kwa limburukwa kononkango dange ntani wa huguvara mwange.*
9 Tara! Ame ngani ninka vantu ava va hamena kosinagoge zaSatana ava ava lininkisa asi awo Vajuda, nye awo kapisi Vajuda. Tara! Ame ngani va ninka va wize va ya linyongamene* konompadi doge nokuvaninka va dive asi ame kwa kuhara.
10 Morwa ove wa kwama sihonena sedidimiko lyange, ame ngani kupopera posiruwo somaheteko, esi ngasi wiza mokuyaheteka vantu navenye ava va kara pevhu.
11 Ame kuna kugenderera kuwiza, twikira kukwaterera kweyi wa kara nayo yipo ngava dire kukuhakana nkata zoge.
12 “‘Ogu ana kufunda ngani mu ninka a kare ngundi montembeli zaKarunga gwange ntani age kapi nga pwaga mo hena. Ame ngani tjanga posipara sendi edina lyaKarunga gwange ntani nedina lyositata saKarunga gwange, Jerusarema zompe, ezi azi hegumuka zi tunde meguru kwaKarunga gwange ntani ngani mu tjanga hena edina lyange lyepe.
13 Ogu ga kara nomatwi a zuvhe eyi zina kutantera mpepo zokupongoka nombungakriste.’
14 “Tjangera muengeli gombungakriste zaRawodikeya asi: Eyi yiyo ana kutanta ogu ava tumbura asi Amen, mbangi zousili ntani zokuhuguvara, ogu ga hovere kusita Karunga:
15 Age kuna kutanta asi: ‘Ame na diva yirugana yoge, ove kapisi o mutenda ndi o mupyu, ngano wa kere tupu o mutenda ndi o mupyu, ngano hansa.
16 Mokumona asi ove kapisi o mutenda ndi o mupyu, ame ngani kufiza mo mokana kange.
17 Ove kutanta asi: “Ame ngawo ntani ame kwa lipongaikira emona kwato eyi na hepa,” nye ove kapi wa yi dimburura asi ove kapi ono hafa ntani ove ruhepo. Ove hena kwa twika ntani muhere-here.
18 Ame kuna kukukorangeda o rande kwange ngorodo ezi va wapeka momundiro, yipo o ngawope ntani yikoverero yoyizera yipo o kudumike muhere-here goge, ntani mutji gomeho yipo ngo vhure kumona.
19 “‘Ame kuvyukisa nokutengeka navenye ava na hara. Yipo nye, kara nomupampi ntani litezurura.
20 Tara! Ame kuna sikama pevero ntani kuna kungongora. Nkenye ogu ana kuzuvha ezwi lyange nokuzegwilira nge muvero, ngani hwilira membo lyendi ngani lye nage murarero.
21 Ogu ana kufunda ngani mu ninka aka hingire name posipundi sange souhompa, ngwendi moomu name na funda yiyo na ka hingira posipundi souhompa soTate.
22 Ogu ga kara nomatwi a zuvhe eyi zina kutantera mpepo zokupongoka nombungakriste.’”
Nonkango dokonhi
^ MoRugereka asi “madina gomasesu.”
^ MoRugereka asi “edina lyange.”
^ Ndi “tongamene.”
