Buke zEhororo 5:1-14
5 Makura tani mono mokuwoko kokorulyo kogu ana hingire posipundi souhompa bukegango ezi va tjanga komaruha nagenye,* ezi va pata noyininke ntambali.*
2 Makura tani mono muengeli gononkondo ana kuzigira nezwi lyenene asi: “Yilye ogu ga wapera kupaturura bukegango nokuteza yininke eyi va patesa ko?”
3 Nye kwato ogu ga kara meguru ndi pevhu ndi konhi zevhu ga vhulire kupaturura bukegango ozo ndi a rese eyi ya kara mo.
4 Makura tani lili unene, morwa kwato ogu ya waperere mokupaturura bukegango ozo ndi a rese eyi ya kara mo.
5 Nye mupangeli* gumwe ta tantere nge asi: “Hageka kulira. Tara! Nyime gomorudi rwaJuda, ogu ga tundilira moruvharo rwaNdafita, ga funda, yipo nye, age ga wapera kupaturura bukegango ozo noyininke ntambali eyi va patesa ko.”
6 Makura tani mono pepi nosipundi souhompa noyinamwenyo yine ntani pokatji kovapangeli,* Nzwigona ezi za fene ngwendi kuna zi zamba. Azo kwa kere nomeho ntambali nonombinga ntambali, meho gazo kwa fanekesa nompepo ntambali daKarunga edi va tuma mouzuni naunye.
7 Poopo ngoso, azo tazi wiza, tazi ya gusa bukegango mokuwoko kokorulyo kogu ga hingilire posipundi souhompa.
8 Apa za gusire bukegango, yinamwenyo yine ntani vapangeli* 24 tava tongamene Nzwigona ozo. Nkenye mupangeli kwa kwaterere siumba norupasa rongorodo omu mwa zulire yitutumikidiso yedumba lyewa (yitutumikidiso yedumba lyewa kwa fanekesa makanderero govapongoki.)
9 Awo kudimba rusumo rorupe asi: “Ove wa wapera kugusa bukegango nokupaturura yininke eyi va patesa ko, yeeyi ove kwa kuzamba, yiyo wa randa nohonde zoge vantu womomarudi nomomaraka nomonomuhoko nadinye va hamene kwaKarunga,
10 ntani ove kwava ninka va kare vahompa novapristeli vaKarunga gwetu. Awo ngava pangera ngovahompa evhu nalinye.”
11 Makura tani mono nokuzuvha mazwi govaengeli wovanzi ava va kundurukidire sipundi souhompa noyinamwenyo novapangeli,* vaengeli owo kwa kere wovanzi unene* ntani mayovi nomayovi,
12 awo kwa zigilire asi: “Nzwigona ezi va zembe za wapera kugwana upangeli noungawo nounongo nononkondo nefumano nouyerere ntani nokuzihamberera.”
13 Makura tani zuvhu nkenye sinamwenyo semeguru nesi sepevhu nesi sokonhi zevhu ntani nesi semefuta nanayinye eyi ya kara mo yina kutanta asi: “Ogu ana hingire kosipundi souhompa noNzwigona, vava hamberere nokuvafumadeka nokuvayererepeka ntani nonkondo dawo narunye nanarunye.”
14 Yinamwenyo yine kwa tente asi: “Amen!” makura vapangeli* tava tongamene va karere Karunga.
Nonkango dokonhi
^ MoRugereka asi “monda nokonyima.”
^ Ndi “noyipateso ntambali.”
^ MoRugereka asi “mukurona.”
^ MoRugereka asi “vakurona.”
^ MoRugereka asi “vakurona.”
^ MoRugereka asi “vakurona.”
^ Ndi “mamiliyona gomanzi.”
^ MoRugereka asi “vakurona.”
