Buke zEhororo 7:1-17
7 Konyima zeyi, tani mono vaengeli vane vana sikama komakovhu gane gouzuni, awo kwa kwaterere nompepo ne depevhu, yipo mpepo zi dire kupepera pevhu ndi mefuta ndi kwankenye sitji.
2 Makura tani mono muengeli gwapeke ana kutundilira koUpumezuva. Age kwa kwaterere yuma eyi ga mu pere Karunga a ture vantu sinongweneso, age makura ta zigire vaengeli vane ava va pere nonkondo dokuzonagura evhu nefuta
3 asi: “Mwa ha zonagura evhu ndi efuta ndi yitji, dogoro ngatu mane kutura yinongweneso poyipara yovakereli vaKarunga.”
4 Makura tani zuvhu sivaro sava va tulire yinongweneso, awo kwa kere 144 000 ntani awo kwa tundire momazimo nagenye goVaisraeli:
5 Mezimo lyaJuda vantu 12 000;mezimo lyaRubena vantu 12 000;mezimo lyaGada vantu 12 000;
6 mezimo lyaAseli vantu 12 000;mezimo lyaNafitali vantu 12 000;mezimo lyaManase vantu 12 000;
7 mezimo lyaSimiyoni vantu 12 000;mezimo lyaRevhi vantu 12 000;mezimo lyaIsasikali vantu 12 000;
8 mezimo lyaSeburoni vantu 12 000;mezimo lyaJosefa vantu 12 000;mezimo lyaMbenyameni vantu 12 000.
9 Konyima zeyi, tani mono emukurumbunga lyovantu, eli ga dilire kuvhura kuvarura muntu. Alyo kwa tundire monomuhoko nadinye nomomarudi nagenye nomomaraka nagenye. Awo kwa sikamene komeho zosipundi souhompa ntani komeho zoNzwigona, awo kwa dwere marwakani gomazera ntani kwa kwaterere makusuvare* momawoko gawo.
10 Awo kwa zigilire unene asi: “Eparu lyetu kwa tunda kwaKarunga gwetu ogu ana hingire posipundi souhompa ntani koNzwigona.”
11 Vaengeli navenye ava va kundurukidire sipundi souhompa novapangeli* noyinamwenyo yine, kwa liganderere komeho zosipundi souhompa va karere Karunga,
12 oku tava tanta asi: “Amen! Ngano Karunga va mu yererepeke nokumufumadeka nokumupandura, ngano unongo nononkondo noupangeli yi kare yendi narunye nanarunye. Amen.”
13 Makura gumwe govapangeli* ta pura nge asi: “Wolye ava vana dwara marwakani gomazera ntani kupi va tundilira?”
14 Makura tani mu limburura asi: “Hompa gwange oyo nyove gokuyidiva.” Age ta tantere nge asi: “Ava yiwo va pita moudigu wounene ntani awo kwa kuhwa marwakani gawo nokuganinka ga zere kohonde zoNzwigona.
15 Eyi yiyo vana karere komeho zosipundi saKarunga souhompa nokumukarera montembeli masiku nomutenya. Ano ogu ga hingira kosipundi souhompa, ngava wapaikira tenta yipo ava popere.
16 Ava kapi hena ngava fa nzara ndi va fe enota; mutenya noupyu kapi ngayi va hwika,
17 morwa Nzwigona ezi za kara pokatji apa sa karera sipundi souhompa, ngazi va takamesa nokuvapitisira komarunone aga ga kara nomema gomwenyo ntani Karunga nga kokota mahodi nagenye komeho gawo.”
