Buke zEhororo 8:1-13
8 Apa ga kakwire sipateso sauntambali, meguru ta mu mwena unene ure woharufa zovili.
2 Makura tani mono vaengeli ntambali, ava va sikama komeho zaKarunga, awo kwa va pere marumbendo ntambali.
3 Muengeli gumwe ta wiza, age ana kwaterere sipana songorodo sokututumikidisa, ta sikama kosizambero. Age kwa mu pere yitutumikidiso yedumba lyewa yoyinzi, yipo a yi zambe kumwe nomakanderero govapongoki posizambero songorodo esi sa kere komeho zosipundi souhompa.
4 Musi goyitutumikidiso eyi ga hwikire muengeli tagu zi kwaKarunga kumwe nomakanderero govapongoki.
5 Muengeli ta gusa mundiro goposizambero nokugutura posipana soyitutumikidiso, makura ta yi tjisire pevhu. Makura tapa horoka sindundumo somvhura nomazwi nomaruvadi ntani nekankamo lyevhu.
6 Vaengeli ntambali ava va kere nomarumbendo ntambali tava liwapaikire va ga fude.
7 Muengeli gokuhova ta fuda rumbendo rwendi. Makura tapa horoka mvhura zakamanya nomundiro, ayo kwa yi vhongere nohonde, makura tava yi tjisire pevhu. Siutatu* sevhu noyitji kwa pire ntani yimeno nayinye kwa pire.
8 Muengeli gwauvali kwa fudire rumbendo rwendi. Makura sininke simwe tasi gwire mefuta, aso kwa kere sosinene ngwendi ndundu ntani aso kwa si hwikire nomundiro. Makura siutatu sefuta tasi litjindji honde,
9 ntani siutatu soyinamwenyo yemefuta kwa fire ntani siutatu soyikepa kwa tekaukire.
10 Muengeli gwautatu kwa fudire rumbendo rwendi. Makura mbungururu zonene ezi za temene ngwendi ramba tazi gu meguru, azo kwa gwililire posiutatu sonomukuro ntani nomarunone.
11 Mbungururu ozo edina lyazo sitji soururu. Siutatu somema kwa rurupire ntani ago kwa dipagere vantu wovanzi, morwa ago kwa kere ururu.
12 Muengeli gwaune kwa fudire rumbendo rwendi. Siutatu sezuva nokwedi nonombungururu kwa sovaganene, yipo mutenya gu dire kukara nouzera nawa-nawa, masiku nago ngosikwawo.
13 Makura tani mono ekangakodi lina kutuka keguru-guru, alyo kwa zigilire asi: “Ani nane vakwetu, ani nane vakwetu, ani nane vakwetu ava mwa kara pevhu, morwa eyi yina kuza yi ka horoke apa vaengeli vatatu ava vana hupu ko nava fuda marumbendo gawo!”
Nonkango dokonhi
^ Ndi “1⁄3.”
