Buke zEhororo 9:1-21
9 Muengeli gwautano kwa fudire rumbendo rwendi, makura tani mono mbungururu ezi za gwililire pevhu. Azo kwa zi pere nsapi zekekero.*
2 Mbungururu kwa patwilire kekero olyo. Makura tamu tundu musi gomunzi ngwendi googu agu tundu mediko lyenene, makura musi ogu gwa tundire mekero tagu sovaganeke ezuva nompepo.
3 Momusi tamu tundu simbonde, makura ta zi mouzuni, age kwa mu pere nonkondo ngwendi dedi va pange.
4 Age kwa mu pangerere a dire kuzonagura yimeno noyitji yepevhu, nye a korese vantu ava ga dira kutura Karunga yinongweneso poyipara yawo.
5 Ntani simbonde kwa mu pangerere a dire kuvadipaga, nye a va hepeke makwedi gatano. Ehepeko eli kwa va koresere ngwendi moomu muntu a zuvhu kukora apa azi mu humu nge.
6 Momazuva ogo, vantu ngava hara asi va fe, nye awo kapi ngava fa. Ntani awo ngava papara nomfa, nye ngadi va henduka.
7 Simbonde ogo kwa fene ngwendi nonkambe edi dina kuza koyita. Ntani komutwe gwendi kwa kere ko yininke eyi ya monekere ngwendi nonkata dongorodo. Ntani sipara sendi kwa fene ngwendi somuntu.
8 Nohuki dendi kwa fene ngwendi domukadi ntani mazego gendi kwa fene ngwendi mazego ganyime,
9 age kwa dwere sikoverero sosivera ntani mavava gendi kwa hagarere ngwendi turukara otu dina kukoka nonkambe edi dina kuza koyita.
10 Ntani age kwa kara nomusira ngwendi gononge. Ntani komusira gwendi yiko da kara nonkondo dokuhepeka vantu makwedi gatano.
11 Muengeli ogu a takamesa ekero yige hompa gwawo. Edina lyendi moRuhebeli Abadoni,* nye moRugereka Apoliyoni.*
12 Udigu umwe una piti, nye taga wiza maudigu gavali konyima zeyi.
13 Muengeli gwauntazimwe ta fuda rumbendo rwendi. Makura tani zuvhu ezwi eli lina kutundilira konombinga dokosizambero songorodo esi sa kere komeho zaKarunga
14 lina kutantera muengeli gwauntazimwe ogu ga kere norumbendo asi: “Kamangurure vaengeli vane, ava va kara komukuro gomunene gwaEufurata.”
15 Vaengeli owo vane, ava va wapaikire vili ozo nezuva nokwedi nomvhura, kwa va mangwilire yipo va ka dipage siutatu* sovantu.
16 Ame kwa zuvhire sivaro sovantu ava va zire koyita nononkambe, awo vanzi unene va kere.*
17 Ano nonkambe edi na mwene memoneko novantu ava va rondere po ngesi yimo va fene: Yikoverero yosivera eyi va dwere kwa kere po uhenga, ugeha ntani sinauguru ntani nomutwe dononkambe kwa kere ngwendi dovanyime. Ntani mokana kado kwa tundire mo mundiro nomusi ntani musi gouhungu.
18 Mahepeko aga gatatu: Musi, mundiro ntani nomusi gouhungu ogu gwa tundire mokana kononkambe, kwa dipagere siutatu sovantu.
19 Nonkondo dononkambe kwa kara mokana nokonomusira dado. Yeeyi nomusira dado kwa fana ngwendi mazoka aga ga kara nonomutwe ntani ado kuruganesa nomusira yipo di korese vantu.
20 Nye vantu ava ga dilire kudipaga mahepeko ogo, kapi va litezwilire koyirugana yawo. Awo kapi va hagekere kukarera nompepo donondona noyikarunga yoyimpempa, eyi va rugana nongorodo nosiliveli nongoporo nomamanya ntani noyitji, ayo kapi ayi mono ndi yi zuvhe ndi yi gende.
21 Ntani awo kapi va hagekere kudipaga nokulihameka moumpure ndi va hageke ruhonda* nowidi wawo.
Nonkango dokonhi
^ Kutanta asi “Ezonauko.”
^ Kutanta asi “Muzonaguli.”
^ Ndi “1⁄3.”
^ Kutanta asi “200 000 000.”
