Exodus 15:1-27
15 Makura Mosesa noVaisraeli tava dimbire Jehova rusumo oru asi:
“Tani dimbire Jehova, yeeyi age ana fundu.
Age ana zugumine nkambe nomurondi gwazo mefuta.
2 Jehova* yige nonkondo dange, yeeyi yige ana kuzowora nge.
Age Karunga gwange ntani Karunga gozinyakurwetu. Ame ngani mu hamberera nokumufumadeka.
3 Jehova mukwayita gononkondo ntani Jehova yilyo edina lyendi.
4 Age kwa zugumina matemba gaFarawo novakwayita vendi mefuta,ntani vakwayita vendi wononkondo kwa va divida mEfuta lyEgeha.
5 Mankupi kwa va kudumikire nokuvadivida konhi ngwendi emanya.
6 Kuwoko koge korulyo, nonkondo unene Jehova;kuwoko koge korulyo kuvhura kuzonagura nonkore doge Jehova.
7 Nonkondo doge dononene kuvhura kuganda ava ava ku rwanesa;ehandu lyoge kwa fana ngwendi mundiro ntani alyo kuvahwika ngwendi rwenge.
8 Munku goge gomomazuru kwa ninkire mema ga lipongeke;ago kwa sikeme ndjikiti yipo ga kondere mema gemefuta;mema gokupupa kwa likwete pokatji kefuta.
9 Nonkore detu kwa tente asi: ‘Ose tatu va sikura dogoro tu ka va gwane!
Ose ngatu gavera emona lyawo nokugusa eyi tuna hara!
Ose ngatu va zonagura po nonomfuro detu!’
10 Ove kwa fudire munku goge, makura efuta tali va kudumike;awo kwa deme ngwendi sivera soudigu mefuta lyenene.
11 Kwato karunga ogu ga kufana ove Jehova;ove wa pongoka unene ntani kwato karunga ga kufana;ove wa wapera kukufumadeka unene* nokukuhamberera nononsumo ove ogu o rugana yitetu.
12 Ove kwa gonwene ewoko lyoge lyokorulyo, makura evhu tali va mini.
13 Ove kwa pitisilire vantu ava wa poperere neharo lyoge lyanarunye;ove ngo va twara kevango eli wa kara lyokupongoka nononkondo doge.
14 Vantu va hepa kuzuvha yininke eyi; awo ngava kankama;udigu* ngau gwana vantu ava va tunga moFilisiti.
15 Posiruwo oso, masimbi gomoEdomu ngaga tukuka,ntani vapangeli wovanene womoMowaba ngava kankama.
Vantu navenye ava va tunga moKanani ngava dompa mutjima.
16 Awo ngava tukuka nokukankama.
Awo ngava sikama ndjikiti ngwendi emanya morwa nonkondo doge dononenedogoro vantu woge ngava pite Jehova,dogoro vantu ava wa horowora* ngava pite.
17 Ove ngo va twara kondundu ezi wa weka noku ka va tapeka,alyo evango eli wa liwapaikira nyamoge Jehova,alyo evega lyokupongoka eli ga dika mawoko goge Jehova.
18 Jehova nga pangera ngahompa narunye nanarunye.
19 Apa nonkambe daFarawo nomatemba gendi goyita ntani novakwayita vendi va zire mefuta,Jehova ta ninki mankupi gomanene ga va kudumike,nye Vaisraeli kwa gendere pokatji kefuta pevhu lyekukutu.”
20 Makura Miliyama mpanzaArona ogu ga kere muporofete, ta gusa kangomagona, makura vakadi navenye tava mu kwama notungomagona twawo oku tava dana.
21 Miliyama ta tambura vagara pokudimba asi:
“Dimbireni Jehova, yeeyi age ana fundu.
Age ana zugumine nkambe nomurondi gwazo mefuta.”
22 Konyima, Mosesa ta pitisire Vaisraeli va tunde kEfuta lyEgeha va ze momburundu zaSuru. Awo kwa gendere mazuva gatatu momburundu, nye kapi va gwene mema.
23 Apa va ya sikire poMara,* kapi va vhulire kunwa mema gamo morwa ago kwa kere ururu. Eyi yiyo ga rukilire evango olyo asi Mara.
24 Makura Vaisraeli tava tameke kusivanena Mosesa asi: “Yisinke natu nwa?”
25 Mosesa makura ta likwambere kwaJehova, makura Jehova ta mu likida sitji. Apa ga si zugumine momema, mema taga tovara.
Makura Karunga tava tulire po veta nokuvalikida eyi nava rugana yipo a tare nsene nava mu limburukwa.
26 Karunga ta tanta asi: “Nsene nomu purakena kezwi lyaKarunga gweni Jehova nokurugana eyi ya hungama kosipara sendi ntani nokulimburukwa nompangera dendi nadinye, ame kapi ngani mu retera mahamba aga na reterere Vaegipite, yeeyi ame nyame Jehova ogu ana kumuverura.”
27 Konyima, awo tava ya siki moElimi omu mwa kere marunone gomema 12 ntani noyitji yonongone 70. Makura tava dike notende dawo pepi nomema.
Nonkango dokonhi
^ MoRuhebeli asi “Jah.” Jah kuna kara esupipiko lyedina Jehova.
^ MoRuhebeli asi “kukutjira.”
^ MoRuhebeli asi “kuhumisa.”
^ MoRuhebeli asi “sita.”
^ Kutanta asi “Ururu.”
