Exodus 19:1-25
19 Mokwedi kwautatu kutunda apa va tundire Vaisraeli mosirongo saEgipite, awo kwa ya sikire momburundu zaSinayi mezuva olyo.
2 Apa va tundire moRefidimu tava ya siki momburundu zaSinayi makura tava dike kamba zawo. Awo kwa dikire kamba zawo pepi noNdundu zaSinayi.
3 Makura Mosesa ta rondo kondundu a ka moneke kwaKarunga gousili. Jehova ta mu uyungisa kondundu asi: “Tantera ruvharo rwaJakopo ndi Vaisraeli asi:
4 ‘One mwa mwene eyi na rugene Vaegipite ntani nomu na mu reta kwange ngwendi moomu ekangakodi a li simbire vana valyo pomavava galyo.
5 Nsene ngomu limburukwa eyi ngani mu tantera nokusikisa mo egwanekero* lyange, one ngomu kara ngwendi emona lyange lyokulikarera mokatji kovantu navenye, yeeyi uzuni naunye wange.
6 One ngomu kara muhoko gokupongoka ntani novapristeli ava ngava pangera ngovahompa.’ Eyi yiyo no ka tantera Vaisraeli.”
7 Makura Mosesa ta zi, ta ka zigida masimbi goVaisraeli makura ta va tantere nayinye eyi ga mu tanterere Jehova.
8 Konyima, vantu navenye tava limburura kumwe asi: “Nayinye eyi ana uyunga Jehova ngatu yi rugana.” Makura Mosesa ta twara elimbururo lyovantu kwaJehova.
9 Jehova ta tantere Mosesa asi: “Ame ngani wiza koge kupitira meremo lyesovagani yipo vantu ngava zuvhe nge apa ngani uyunga nove ntani yipo nove ngava ku huguvare nkenye apa.” Makura Mosesa ta tantere Jehova eyi va uyungire vantu.
10 Jehova makura ta tantere Mosesa asi: “Zende kovantu o ka va tantere va lizerese* naina ntani nomungura, va liwapaikire kuyagwanekera kumwe name ntani awo va hepa kukuhwa yikoverero yawo.
11 Awo va hepa kuliwapaikira ezuva lyautatu, morwa mezuva lyautatu Jehova nga wiza koNdundu zaSinayi a ya moneke komeho zovantu navenye.
12 Wa hepa kutura ko yidiviso kondundu nokutantera vantu va dire kuza ko ndi va kwate ko. Nkenye ogu nga kwata ko ngava mu dipaga.
13 Kwato ogu nga kwata muntu ogo, nye va hepa kumudipaga nomamanya ndi kumuponya nouta wonkanza.* Yi kare asi muntu ndi sikorama, va hepa kusidipaga. Nye apa ngomu zuvha muhagaro goruvinga ronzwi mwa hepa kuza kondundu.”
14 Makura Mosesa ta humburuka kondundu a ze kovantu, ta va tantere va lizerese,* makura awo tava kuhu yikoverero yawo.
15 Age ta tantere vantu asi: “Liwapaikireni ezuva lyautatu. Mwa ha ligwanekera panyama novakadi veni.”*
16 Ngurangura mezuva lyautatu, keguru kwa kere ko sindundumo nomaruvadi ano kondundu kwa kere ko eremo lyesovagani ntani nomuhagaro goruvinga, makura vantu tava tameke kukankama mokamba.
17 Makura Mosesa ta ka simba vantu mokamba yipo va ya gwanekere naKarunga gousili, tava sikama pedi lyondundu.
18 KoNdundu zaSinayi kwa kere ko musi gomunzi, morwa Jehova kwa hegumukilire kondundu ozo momundiro. Musi ogo kwa kere gomunzi ngwendi gogu agu tundu mesuga lyenene* ntani ndundu nazinye kwa kankamene unene.
19 Apa gwa twikilire kuhagara unene muhagaro goruvinga, Mosesa ta uyunga, ano Karunga* gousili ta mu limburura.
20 Jehova makura ta hegumukire keguru lyoNdundu zaSinayi. Jehova makura ta zigida Mosesa a ze keguru lyondundu, ano Mosesa ta zi.
21 Jehova makura ta tantere Mosesa asi: “Humburuka o ka rondore vantu va dire kuhedera pepi naJehova yipo va mu tare, nsene nava yi rugana ngano vanzi nava fa.
22 Ntani tantera vapristeli ava ava wiza nkenye apa pepi naJehova va lizerese,* yipo a dire kuvadipaga Jehova.”
23 Makura Mosesa ta tantere Jehova asi: “Vantu kapi nava wiza koNdundu zaSinayi, morwa ove wa tu rondora nare asi tu ture yidiviso kondundu nokudivisa vantu asi azo za pongoka.”
24 Nye Jehova ta mu tantere asi: “Zende o ka wize kumwe naArona, nye wa ha tarerera vapristeli novantu va lisininike kuhedera pepi naJehova. Nsene nava yi rugana ame ngano nani va dipaga.”
25 Mosesa makura ta humburuka, ta ka yi tantera vantu.
Nonkango dokonhi
^ Ndi “elizuvhasano.”
^ MoRuhebeli asi “va lipongore.”
^ Ndi nampo asi “kumuzuguma egonga.”
^ MoRuhebeli asi “va lipongore.”
^ MoRuhebeli asi “Mwa ha hedera vakadi.”
^ Esuga eli ngava kukutikire nondopi nerova.
^ MoRuhebeli asi “ezwi lyaKarunga.”
^ MoRuhebeli asi “va lipongore.”
