Exodus 24:1-18
24 Makura Jehova ta tantere Mosesa asi: “Ronda kondundu naArona naNadabu naAbihu ntani nomasimbi 70 goVaisraeli ntani mwa hepa ku ka nyongamena nge koure nokukarera nge.
2 Nyovelike no hedera Jehova, nye vagara owo va ha hedera ko. Ano vantu wokuhupa ko va ha ronda kondundu.”
3 Makura Mosesa ta wiza, ta tantere vantu nayinye eyi ga mu tanterere Jehova nonoveta nadinye, makura vantu navenye tava limburura kumwe asi: “Nayinye eyi ana uyunga Jehova ngatu yi rugana.”
4 Makura Mosesa ta tjanga nayinye eyi ga mu tanterere Jehova. Apa ga pindukire ngurangura zonene, ta tungu sizambero pedi lyondundu nonongundi 12 kuliza nomazimo 12 goVaisraeli.
5 Konyima, Mosesa ta tumu vagara woVaisraeli, makura awo tava ka zamba nonzambo deswakerero ntani tava ka zamba nontwedu ngononzambo dombili kwaJehova.
6 Mosesa ta gusa harufa zohonde, ta zi tjire pomarupasa, ano ezi zokuhupa ko ta zi nagere kosizambero.
7 Makura ta gusa buke, ta resere vantu kuziguruka veta ezi va tjanga mo. Ano awo tava limburura asi: “Nayinye eyi ana uyunga Jehova, ngatu yi rugana ntani ngatu limburukwa.”
8 Makura Mosesa ta gusa honde noku zi nagera vantu, ta tanta asi: “Ezi honde zegwanekero eli ga tura po Jehova kumwe none kuliza nonoveta edi muna zuvhu.”
9 Mosesa ta rondo kondundu kumwe naArona naNadabu naAbihu ntani nomasimbi 70 goVaisraeli,
10 makura tava mono Karunga goVaisraeli. Konhi zonompadi dendi kwa kere ko yuma yokufana ngwendi emanya lyosafire, alyo kwa paimine ngwendi eguru.
11 Karunga kapi ga tengekere vagara owo woVaisraeli. Awo kwa mwene emoneko lyaKarunga gousili apa va lire nokunwa.
12 Makura Jehova ta tantere Mosesa asi: “Ronda kondundu o wize kwange yipo o ya kare kooku. Ame ngani kupa mamanya ntani ngani tjanga po noveta nonompango edi nava kwama vantu.”
13 Mosesa ta katuka kumwe nomukareli gwendi Josuwa va ronde kondundu. Makura Mosesa ta twikire kuronda kondundu zaKarunga gousili.
14 Nye age ta tantere masimbi asi: “One ndindireni paapa dogoro apa natu ka tengura. Arona naHuru tava kara none. Nkenye ogu ana kara noudigu a ze kwawo.”
15 Makura Mosesa ta rondo kondundu alyo eremo lina kudumike ndundu.
16 Uyerere waJehova kwa kere koNdundu zaSinayi, ano eremo kwa kudumikire ndundu ozo mazuva ntazimwe. Mezuva lyauntambali Karunga yipo ga zigidire Mosesa kutundilira meremo.
17 Uyerere waJehova kwa monekere koVaisraeli ngwendi mundiro gomunene ogu guna kutwera keguru lyondundu.
18 Mosesa makura ta zi meremo, ta rondo kondundu, makura ta ka kara kooko mazuva 40 nomasiku 40.
