Exodus 25:1-40
25 Makura Jehova ta tantere Mosesa asi:
2 “Tantera Vaisraeli va pongaike yigava nokuyipa nge; mwa hepa kutambura yigava kwankenye ogu ana hara kugava kutundilira komutjima.
3 Eyi yiyo yigava nomu tambura kovantu: ngorodo, sisiliveli, ngoporo,
4 nongodi dosineguru, wanda wopurupuli, ekehe lyegeha, ekehe lyewa, nohuki doyikombo,
5 yipapa yononzwi* eyi va kwita ruvara rorugeha, yipapa yoyikorama,* yitji yomusu,
6 magadi gomonoramba, magadi gokugwavekesa gobalisemu ntani noyitutumikidiso yedumba lyewa,
7 mamanya goonikisi nomamanya gamwe gokutura posikoverero sopomapepe ntani naga gokutura posininke soponturo.
8 Awo va hepa kutungira nge evango lyokupongoka yipo ngani tunge mokatji kawo.
9 Wa hepa kudika nkongoronzugo noyininke yamo kuliza nefano eli nina kukulikida.
10 “Va hepa kurugana sikesa noyitji yomusu, monaure sa hepa kukara nometa 1,1* monompatji nosentimeta 66,7* ano musika gwaso nosentimeta 66,7.*
11 Makura ngo si kwite ngorodo zene-zene monda nokontunda ntani ngo rugane rugodi rongorodo nokurudingira keguru lyosikesa oso.
12 Ngo rugane nolinga ne dongorodo nokuditura keguru lyomaguru gane gosikesa. Wa hepa kutura nolinga mbali komaruha gaso gavali.
13 Wa hepa kuhonga yitji yomusu nokuyikwita ngorodo.
14 Makura ngo zweke yitji oyo monolinga edi da kara konontere dosikesa, yipo vantu ngava kwatere ko pokusidamuna.
15 Yitji oyo ya hepa kukara monolinga dokosikesa. Ayo nokuyigusa mo si.
16 Mosikesa ngo ture mo madiworokeso aga ngani ku pa.
17 “Ngo ruganene ko sikudumikiso songorodo zene-zene, monaure sa hepa kukara nometa 1,1* ntani monompatji nosentimeta 66,7.*
18 Wa hepa kuhambura vakerubi vavali nongorodo nokuvatura kouhura wosikudumikiso sosikesa.
19 Komaruha nagenye gavali gosikesa, tomu tura ko mukerubi gumwe.
20 Vakerubi va hepa kuzerura mavava gawo gavali meguru, yipo va kudumike sikesa nomavava gawo ntani yipara yawo ya hepa kulipirukira nokunyongamena posikudumikiso.
21 Makura ngo ture sikudumikiso kosikesa ntani mosikesa wa hepa kutura mo madiworokeso aga ngani ku pa.
22 Ame ngani kumonekera nokuuyunga nove kutundilira peguru lyosikudumikiso sosikesa. Ame ngani kudivisa nayinye eyi ngo tantera Vaisraeli kutundilira pokatji kovakerubi vavali ava va kara posikesa somadiworokeso.
23 “Wa hepa kurugana sitafura nositji somusu, monaure sa hepa kukara nosentimeta 89* ntani monompatji nosentimeta 44,5* ano musika gwaso nosentimeta 66,7.*
24 Wa hepa kusikwita ngorodo zene-zene nokusidingira norugodi rongorodo.
25 Wa hepa kutura sipirangi sokusika pounene wewoko* keguru lyositafura komaruha gaso gane. Ano kosipirangi wa hepa kudingira ko rugodi rongorodo.
26 Wa hepa kusiruganena nolinga ne dongorodo nokuditura komakovhu gaso gane, apa ga tamekera maguru gaso.
27 Nolinga odo wa hepa kuditura pepi nosipirangi, yipo ngava zweke mo yitji yokusidamwisa.
28 Wa hepa kuhonga yitji yomusu nokuyikwita ngorodo, makura ngayi kare yokudamwisa sitafura.
29 “Ngo ruganene positafura marupasa, nonkinda, nonkinda dononene ntani marupasa yononzambo doyikunwa. Ngo yi rugane nongorodo zene-zene.
30 Wa hepa kutura nkenye apa nomboroto delikido komeho zange positafura.
31 “Wa hepa kurugana uzweko woramba nongorodo zene-zene. Awo wa hepa kuuhambura. Edi lyako nomutayi gwako gopokatji nonomutayi dako nononkinda dako nonombya dako dokudumata nedi dokutemuna, va hepa kuyirugana kosininke simwe.
32 Awo wa hepa kukara nonomutayi ntazimwe monontere douzweko woramba; korumoho nomutayi ntatu, ano korulyo nomutayi ntatu.
33 Konomutayi dokorulyo ku kare nonkinda ntatu dokufana ngwendi nombya ntani nombya dokudumata nedi dokutemuna. Ano nomutayi dokorumoho nado yimo nadi fana ngorooro. Yimo ngesi nadi fana nomutayi ntazimwe edi nadi tunda pomutayi gopokatji.
34 Mutayi gopokatji gouzweko woramba gwa hepa kukara nononkinda ne dokufana ngwendi nombya ntani nombya dokudumata nedi dokutemuna.
35 Konhi zonomutayi mbali dokuhova edi nadi tunda pomutayi gopokatji, kwa hepa kukara mbya zokudumata, konhi zonomutayi mbali dokukwama ko nako kwa hepa kukara mbya zokudumata, ano konhi zonomutayi hena mbali dokukwama ko nado ngosikwawo. Ngesi yimo nadi fana nomutayi nadinye ntazimwe edi nadi tunda komutayi gopokatji.
36 Nombya dokudumata nonomutayi ntani nouzweko naunye woramba va hepa kuyirugana kosininke simwe songorodo ezi va hambura.
37 Wa hepa kuruganena ko noramba ntambali, ano pokuditemesa ado ngadi temena evango eli ngali kara komeho.
38 Yininke yako yokudimisisa mundiro ntani noyipana yomundiro, va hepa kuyirugana nongorodo zene-zene.
39 Wa hepa kurugana uzweko woramba kumwe noyiruganeso eyi kongorodo zene-zene zonokilograma 34.*
40 Yi rugana kuliza nefano eli va ku likidire kondundu.
Nonkango dokonhi
^ MoRuhebeli asi “nonzwi donongara.”
^ Kwa tamba yikorama yemefuta.
^ MoRuhebeli asi “nocubit mbali noharufa.” Cubit zimwe kwa hura ponosentimeta 44,5. Tara App. B14.
^ MoRuhebeli asi “cubit noharufa.”
^ MoRuhebeli asi “cubit noharufa.”
^ MoRuhebeli asi “nocubit mbali noharufa.”
^ MoRuhebeli asi “cubit noharufa.”
^ MoRuhebeli asi “nocubit mbali.”
^ MoRuhebeli asi “cubit zimwe.”
^ MoRuhebeli asi “cubit zimwe noharufa.”
^ Kwa hura koyiha yonosentimeta 7,4. Tara App. B14.
^ MoRuhebeli asi “talent.” Tara App. B14.
