Exodus 29:1-46
29 “Eyi yiyo wa hepa kurugana apa ngo va pongora yipo va ruganene nge ngovapristeli: Wa hepa kugusa ntwedugona nononzwi donongara mbali donongwa,
2 nomboroto zokudira yihaheso nonomuhwi domboroto dokuliudinga* dokudira yihaheso edi va vhonga nomagadi ntani noyikuki yokudira yihaheso va kwita nomagadi. Wa hepa kuyirugana nousura wouwa worukokotwa,
3 makura ngo yi ture mosikumba nokuyireta kwange mosikumba kumwe nontwedu ntani nononzwi mbali donongara.
4 “Wa hepa kureta Arona novana vendi wovagara pevero lyonkongoronzugo* noku va tantera va likuhwe.
5 Makura ngo dwareke Arona erwakani, hema zomawoko gomasupi,* sikoverero sopomapepe, sininke soponturo ntani wa hepa kumumanga liva mombunda zendi oru va honzera posikoverero sopomapepe.
6 Wa hepa kumudwareka embare nokutura po sidiviso sokupongoka esi va pongwera Karunga,
7 ntani ngo guse magadi gokugwavekesa noku ga mu tjira pomutwe yipo o mu gwaveke.
8 “Makura ngo rete hena vana vendi yipo ngo va dwareke marwakani,
9 ntani ngo mange Arona novana vendi makehe gomombunda nokuvadwareka yininke yokomutwe. Vagara ava kumwe noruvharo rwawo ngava kara vapristeli. Ezi kuna kara veta zokukarerera. Yimo nye ngesi ngo horowora Arona novana vendi va ruganene nge ngovapristeli.
10 “Makura ngo tware ntwedu komeho zonkongoronzugo, ano Arona novana vendi va hepa kukambeka mawoko gawo pomutwe gontwedu.
11 Ngo dipagere ntwedu ozo komeho zaJehova pevero lyonkongoronzugo.
12 Ngo dove nyara zoge mohonde zontwedu nokuzikwita konombinga dosizambero. Ano honde zokuhupa ko ngo zi tjisire pedi lyosizambero.
13 Ngo guse magadi nagenye aga ga kara koyininke yomonda; magadi gekehuli ntani nonongera mbali nomagadi gako nokuyihwika, yipo musi gwako nga gu tutumukire posizambero.
14 Nye nyama zontwedu nosipapa sazo noyininke yazo yomonda,* ngo yi hwikire ponze zokamba. Azo ngazi kara nzambo zononzo.
15 “Makura ngo guse nzwi zimwe zongara yipo Arona novana vendi ngava kambeke mawoko gawo pomutwe gwazo.
16 Ngo dipage nzwi ozo zongara nokugusa honde zazo o zi nagere komaruha nagenye gosizambero.
17 Ngo tetagure nzwi zongara nokukuhwa yininke yazo yomonda kumwe nomaguru gazo noku yi tura nawa kumwe nomutwe gwazo posizambero.
18 Ngo hwike nzwi nazinye yipo musi gwazo nga gu tutumukire posizambero. Azo kuna kara nzambo zeswakerero kwaJehova, ano edumba lyazo kumuhafesa. Ezi kuna kara nzambo zokuhwika ezi ngava gava kwaJehova.
19 “Ngo guse hena nzwi nkwawo, yipo Arona novana vendi ngava kambeke po mawoko gawo pomutwe gwazo.
20 Ngo dipage nzwi ozo nokugusa honde zimwe o zi kwite kokutwi kwaArona kokorulyo ntani komatwi gokorulyo govana vendi wovagara nokomapumbwara gokomawoko gawo gokorulyo ntani naga gokonompadi dawo dokorulyo, ntani ngo nagere honde komaruha nagenye gosizambero.
21 Makura ngo guse hena honde zimwe ezi zina kara kosizambero ntani nomagadi gokugwavekesa o ga nagere Arona novana vendi ntani nokoyidwara yawo, yipo Arona novana vendi ntani noyidwara yawo nga yi pongoke.
22 “Ngo guse magadi gonzwi nomusira gomagadi nomagadi goyininke yomonda nomagadi gekehuli ntani nonongera mbali nomagadi gako ntani neguru lyazo lyokorulyo, yeeyi azo nzwi ezi ngava zamba apa ngava horowora vapristeli.
23 Ngo guse hena nomuhwi mbali domboroto dokuliudinga,* zimwe zokukwita nomagadi ntani sikuki esi sina kara posikumba sonomboroto dokudira yihaheso esi sa kara komeho zaJehova.
24 Nayinye wa hepa kuyitura momawoko gaArona nomomawoko govana vendi ntani wa hepa kuyizeragura ngonzambo zelikido kwaJehova.
25 Makura to yi gusa momawoko gawo nokuyihwika posizambero peguru lyonzambo zeswakerero. Azo ngazi gava edumba lyewa lyokuhafesa Jehova. Ezi kuna kara nzambo zokuhwika ezi ngava gava kwaJehova.
26 “Ngo guse nturo zonzwi ezi ngava zamba apa ngava horowora Arona a kare mupristeli nokuzizeragura komeho zaJehova ngonzambo zelikido. Azo ngazi kara ruha roge.
27 Ngo pongore nturo nokuguru konzwi ezi ngo gava ngonzambo zelikido apa ngava horowora Arona novana vendi va kare vapristeli.
28 Aro kuna kara ruha rokupongoka ntani aro ngava ru gave kwaArona novana vendi. Vaisraeli ngava limburukwe veta ozo dogoro narunye ntani ngava gave ruha oro rokupongoka kwaJehova pononzambo dawo dombili.
29 “Apa nga dogoroka Arona, yidwara yendi yokupongoka ngava yi ruganesa vana vendi wovagara apa ngava va gwaveka noku va horowora va kare vapristeli.
30 Gumwe govana vendi wovagara yige nga mu kwama moupristeli ntani yige nga yi dwara mazuva ntambali apa nga za monkongoronzugo a ka rugane mevango lyokupongoka.
31 “Ngo guse nzwi zongara ezi ngava ruganesa apa ngava horowora Arona a kare mupristeli nokuterekera nyama zazo mevango lyokupongoka.
32 Arona novana vendi ngava lya nyama ozo zonzwi nomboroto ezi nga zi kara mosikumba pevero lyonkongoronzugo.
33 Yininke eyi kwa yi geve yipo va va gusire po nonzo dawo apa vava horowere va kare vapristeli noku va pongora. Awo va hepa kulya yininke eyi. Nye muntu* ogu ga dira kukara mupristeli ga ha lya ko, yeeyi ayo yininke yokupongoka.
34 Nsene zina hupu po nyama ozo nomboroto dogoro ngurangura, va hepa kuyihwika nomundiro. Ayo kapisi va yi lye, morwa ayo yininke yokupongoka.
35 “Ngesi yimo ngo rugana Arona novana vendi kuliza nanayinye eyi nina ku tantere. Ove ngo gusa mazuva ntambali mokuvaninka va kare vapristeli.
36 Ngo gave ntwedu ngonzambo zononzo nkenye ezuva zi kare zokugusira po nonzo. Monkedi ezi yimo ngo kuhura sizambero kononzo ntani wa hepa kupongora sizambero pokusitjisira magadi.
37 Ove ngo kuhura sizambero kononzo mazuva ntambali nokusipongora yipo si pongokerere. Nkenye ogu nga kwata kosizambero ga hepa kupongoka.
38 “Eyi yiyo ngo zamba posizambero: nonzwi donongara mbali domvhura zimwe nkenye ezuva.
39 Ngo zambe nzwigona zimwe kongurangura, ano zimwe ngo zi zambe komeho li ka toke ezuva.
40 Kilograma zimwe* zousura wouwa ou va vhonga nomagadi gokusika koyiha yolita zimwe* ntani nonzambo zoyikunwa yovhinyu zokusika koyiha yolita zimwe,* va hepa kuyizamba kumwe nonzwi zokuhova zongara.
41 Ngo zambe nzwigona zauvali komeho li ka toke ezuva kumwe nousura ntani nonzambo zoyikunwa ngwendi eyi ono gava kongurangura. Ove ngo zi hwika yipo zi gave edumba lyewa lyokuhafesa Jehova.
42 Ezi kuna kara nzambo zeswakerero ezi ngava gava nkenye ezuva womoruvharo roge pevero lyonkongoronzugo komeho zaJehova, oku ngani mu monekera ni mu uyungise.
43 “Oko yiko ngani monekera Vaisraeli, ano uyerere wange ngau pongora evango olyo.
44 Ame ngani pongora nkongoronzugo nosizambero ntani naArona kumwe novana vendi, yipo ngava ruganene nge ngovapristeli.
45 Ame ngani tunga mokatji koVaisraeli nokukara Karunga gwawo.
46 Awo ngava diva asi ame nyame Jehova Karunga gwawo ogu ga va gusa mosirongo saEgipite yipo ni tunge mokatji kawo. Ame nyame Jehova Karunga gwawo.
Nonkango dokonhi
^ Nomboroto edi kwa kere nekero pokatji kado.
^ MoRuhebeli asi “tende zokupongera.”
^ Ndi “hema zomawoko gomasupi zokudwara konhi zosikoverero sopomapepe.”
^ Ndi “fwati.”
^ Mboroto zimwe kwa kere nekero pokatji kazo.
^ MoRuhebeli asi “mugeni.” Kwa tamba komuntu ogu ga dira kutunda moruvharo rwaArona.
^ Ndi “siumurongo (1/10) soephah.” Tara App. B14.
^ MoRuhebeli asi “siune (1/4) sohin.” Hin zimwe kwa hura ponolita 3,62. Tara App. B14.
^ MoRuhebeli asi “siune (1/4) sohin.”
