Exodus 33:1-23
33 Jehova ta tantere hena Mosesa asi: “Katuka kumwe novantu ava wa gusa mosirongo saEgipite mu ze kosirongo esi na tumbwidilire Abirahamu naIsaka naJakopo asi ngani si gava koruvharo* rwawo.
2 Ame ngani tuma muengeli komeho zeni ntani ngani tjida mo Vakanani, Vaamoli, Vaheti, Vaperesi, Vahevhi ntani noVajebusi.
3 Zendeni kosirongo oku kwa zura masini nousi, nye ame kapi nani za none yeeyi one kapi omu zuvhu, kuvhura ngani mu zonagure po monzira.”
4 Vantu kwa guvire unene apa va zuvhire nonkango edi dokuguvisa ntani kwato ogu ga dwere yininke yoyiwa.*
5 Jehova ta tantere Mosesa asi: “Ka tantere Vaisraeli asi: ‘One kapi omu zuvhu. Sikando simwe tupu kuvhura ni wize kweni ni ya mu zonagure po. Yipo nye, mwa ha dwara yininke yoyiwa siruwo esi nina kugazara eyi nani mu rugana.’”
6 Yipo nye, kutundilira poNdundu zaHoreba, Vaisraeli kapi va dwere* yininke yoyiwa.
7 Makura Mosesa ta gusa tende zendi, ta ka zi dikira ponze zokamba sinano songandi, makura ta zi ruku asi tende zokupongera. Nkenye ogu ga here kupapara mavyukiso gaJehova nga zi kotende ozo. Azo kwa kere ponze zokamba.
8 Apa nga zi Mosesa kotende ozo, vantu ngava sikama pomavero gonotende dawo nokutarera Mosesa dogoro ta ka hwilira motende.
9 Apa nga hwilire Mosesa motende ozo, ngundi zeremo ngazi hegumuka noku ya sikama pevero lyotende siruwo esi nga uyunga Karunga naMosesa.
10 Apa vantu navenye va mwene ngundi zeremo zina sikama pevero lyotende, navenye tava linyongamene pomavero gonotende dawo.
11 Jehova kwa uyungire naMosesa awo kuna kulitara ngwendi moomu a uyunga muntu namukwawo. Apa ga tengwire Mosesa kokamba, mukareli gwendi Josuwa zaNunu kapi nga tundu motende ozo.
12 Makura Mosesa ta tantere Jehova asi: “Tara, ove kuna kutantera nge asi: ‘Pitisira vantu ava,’ nye ove kapi ono tantere nge asi nalye no tuma nge ntani hena ove kwa tanta asi ove wa diva nge* nawa ntani ame kukuhafesa.
13 Yipo nye, nsene asi ame kukuhafesa, ninka nge ni dive nonzira doge yipo ni ku dive ntani yipo ni twikire kukuhafesa. Diworoka hena asi vantu ava muhoko goge.”
14 Makura Karunga* ta tanta asi: “Ame* ngani za kumwe nove ntani ngani kupwizumukisa.”
15 Makura Mosesa ta mu tantere asi: “Nsene kapi ono kuza nose, wa ha tu ninka tu tunde po apa.
16 Ngapi omu ngava yi diva asi name novantu woge kukuhafesa? Nani kapisi pokuza kumwe nose, yipo vantu ngava yi dimburure asi ose twa lisiga nonomuhoko dapeke edi da kara pevhu ndi?”
17 Jehova ta tantere Mosesa asi: “Ame nani rugana yininke eyi ono pura nge, yeeyi ove kuhafesa nge ntani na kudiva nawa.”*
18 Makura Mosesa ta tantere Karunga asi: “Likida nge uyerere woge.”
19 Nye Karunga ta mu tantere asi: “Ame ngani kuninka o mone uwa wange naunye ntani ngani kudivisa edina lyange Jehova. Ame ngani hafera nokulikida nkenda nkenye ogu ngani horowora.”
20 Nye ta tanta hena asi: “Kapi to vhuru kumona sipara sange, yeeyi kwato muntu ogu a mono nge a twikire kuparuka.”
21 Jehova ta tanta hena asi: “Zende pevango lyopopepi name o ka sikame pemanya.
22 Apa na u pita uyerere wange, ame nani kutura mekero lyememanya ntani nani kukudumika newoko lyange dogoro ni pite.
23 Konyima, nani gusa ko ewoko lyange ntani no mona mugongo gwange, nye sipara sange kapi no si mona.”
Nonkango dokonhi
^ MoRuhebeli asi “mbuto.”
^ Ndi “maurenga.”
^ MoRuhebeli asi “kwa yi hutwire.”
^ MoRuhebeli asi “wa diva nge kedina.”
^ MoRuhebeli asi “age.”
^ MoRuhebeli asi “Sipara sange.”
^ MoRuhebeli asi “ame na kudiva kedina.”
