Exodus 40:1-38
40 Makura Jehova ta tantere Mosesa asi:
2 “Mezuva lyokuhova lyokwedi kokuhova, wa hepa kudika nkongoronzugo ndi tende zokupongera.
3 Wa hepa kutura mo sikesa somadiworokeso makura o vive ko nekehe.
4 Wa hepa kuhwilida mo sitafura nokutura nawa yiruganeso yapo ntani ngo hwilide uzweko woramba nokutemesa noramba dako.
5 Makura ngo ture mo sizambero songorodo soyitutumikidiso yedumba lyewa komeho zosikesa somadiworokeso ntani nokutura ko ekehe lyepevero lyonkongoronzugo.
6 “Ngo ture sizambero sononzambo deswakerero komeho zevero lyonkongoronzugo ndi tende zokupongera,
7 ntani ngo ture siyaha pokatji konkongoronzugo nosizambero nokutura po mema.
8 Ngo ture ko makehe keharango ntani nokutura pevero lyekeharango ekehe.
9 Ngo guse magadi gokugwavekesa o gwaveke nkongoronzugo nanayinye eyi ya kara mo ntani nokuzipongora noyiruganeso yamo nayinye, yipo zi pongoke.
10 Ngo gwaveke sizambero sononzambo deswakerero noyiruganeso yapo ntani nokupongora sizambero, yipo ngasi kare sizambero sokupongokerera.
11 Ntani ngo gwaveke siyaha nosininke sako sokusitentekera ntani nokusipongora.
12 “Konyima, ngo rete Arona novana vendi wovagara pepi nevero lyonkongoronzugo, yipo ngo va kuhwe nomema.
13 Makura ngo dwareke Arona yidwara yokupongoka ntani ngo mu gwaveke nokumupongora, yipo a ruganene nge ngomupristeli.
14 Konyima, ngo rete vana vendi pepi nokuvadwareka marwakani.
15 Ngo va gwaveke ngwendi moomu ngo gwaveka guhyawo yipo ngava ruganene nge ngovapristeli. Awo ngava twikira kukara vapristeli noruvharo rwawo rokomeho, morwa wa va gwaveka.”
16 Mosesa ta rugana nayinye eyi ga mu pangerere Jehova kuliza nomu ga yi mu pangerere.
17 Nkongoronzugo kwa zi dikire momvhura zauvali mokwedi kokuhova mezuva lyokuhova.
18 Apa ga dikire Mosesa nkongoronzugo, age kwa tulire tuvera tomakero pevhu, ta dike yipirangi yokuvyukilira nokuzweka nompigetji monolinga ntani ta dike nongundi.
19 Age kwa tulire makehe keguru lyonkongoronzugo nokutura ko yikudumikiso ngwendi moomu ga yi mu pangerere Jehova.
20 Konyima, ta gusa mamanya aga va tjanga madiworokeso, taga tura mosikesa makura ta tura ko sikudumikiso kosikesa.
21 Ta hwilida sikesa monkongoronzugo makura ta tura ko ekehe lyokuviva sikesa somadiworokeso ngwendi moomu Jehova ga yi pangerere Mosesa.
22 Makura ta hwilida sitafura monkongoronzugo koruha rokoMuzogo pepi nekehe,*
23 ta tura nawa nomboroto positafura komeho zaJehova ngwendi moomu Jehova ga yi pangerere Mosesa.
24 Makura ta hwilida uzweko woramba monkongoronzugo nokuutura komeho zositafura koMbindakano zonkongoronzugo.
25 Age ta temesa noramba komeho zaJehova ngwendi moomu Jehova ga yi pangerere Mosesa.
26 Ntani ta tura hena sizambero songorodo monkongoronzugo komeho zekehe,*
27 yipo va hwikire po yitutumikidiso yedumba lyewa ngwendi moomu Jehova ga yi pangerere Mosesa.
28 Makura age ta tura ko ekehe lyepevero lyonkongoronzugo.
29 Makura ta tura sizambero sononzambo deswakerero komeho zevero lyonkongoronzugo ndi tende zokupongera, yipo a zambere po nonzambo deswakerero nedi dombuto ngwendi moomu Jehova ga yi pangerere Mosesa.
30 Makura ta tura siyaha pokatji konkongoronzugo nosizambero nokutura po mema gokulikuhwisa.
31 Mosesa naArona novana vendi wovagara yipo ngava likuhwire mawoko nonompadi dawo posiyaha oso.
32 Nkenye apa ngava hwilire monkongoronzugo ndi tava hedere pepi nosizambero, awo ngava likuhu ngwendi moomu Jehova ga yi pangerere Mosesa.
33 Ntani ta tura ko makehe keharango lyonkongoronzugo nosizambero nokutura ko ekehe lyepevero lyekeharango.
Makura Mosesa ta mana kurugana nayinye.
34 Makura eremo tali kudumike nkongoronzugo, ano uyerere waJehova tau zwida nkongoronzugo.
35 Mosesa kapi ga vhulire kuza monkongoronzugo, morwa eremo kwa twikilire kukara kooko ntani uyerere waJehova kwa zwidire nkongoronzugo.
36 Apa ngali tundu eremo keguru lyonkongoronzugo, Vaisraeli ngava dirura kamba zawo morugendo rwawo.
37 Nye apa eremo ngali dili kutunda ko keguru lyonkongoronzugo, awo kapi ngava dirura kamba zawo dogoro ezuva eli ngali tundu ko eremo.
38 Eremo lyaJehova kwa kere konkongoronzugo mutenya, ano masiku kwa lisintunukire mundiro. Vaisraeli kwa mwene eremo eli morugendo rwawo narunye.
Nonkango dokonhi
^ Kwa tamba mevango lyokupongoka.
^ Kwa tamba kekehe eli lya vivire sikesa somadiworokeso.
