Exodus 5:1-23
5 Konyima, Mosesa naArona tava zi kwaFarawo, tava ka mu tantera asi: “Jehova Karunga gwaIsraeli kuna tanta asi: ‘Siga vantu vange va ze yipo va ka danene nge sipito momburundu.’”
2 Nye Farawo ta tanta asi: “Yilye nye Jehova ni mu limburukwe nokusiga Israeli a ze? Ame kapi na diva Jehova ntani hena kapi nani siga Israeli a ze.”
3 Nye awo tava tanta asi: “Karunga goVahebeli kuna uyunga nose. Tuna hara kuza morugendo romazuva gatatu momburundu yipo tu ka zambere Karunga gwetu Jehova. Nsene kapi tuna kuyirugana, age nga tu tengeka nehamba ndi norufuro.”
4 Hompa gwaEgipite ta va limburura asi: “Ove Mosesa naArona, morwasinke muna kuhagekesera vantu yirugana yawo? Tengureni koyirugana yeni!”
5 Farawo ta twikire ko asi: “Tareni si varugani kounzi, one ngoso kuna hara kuvahagekesa yirugana yawo ndi?”
6 Ezuva olyo, Farawo kwa pangerere vagavi yirugana novatareli woyirugana asi:
7 “Hagekeni kuvapa yihatji yorukokotwa va foromese ko nondopi. Va sigeni va ka yi pongaike vene.
8 Nye va hepa kuforoma sivaro sonondopi dokusika pwedi ngava rugana nare. Mwa ha sesupika sivaro, morwa awo udwa. Eyi yiyo vana kusivanena asi: ‘Tuna hara ku za tu ka zambere Karunga gwetu!’
9 Va peni yirugana yoyinzi yipo va rugane unene, va dire kupurakena koyimpempa.”
10 Makura vagavi yirugana novatareli woyirugana tava zi, tava ka tantera vantu asi: “Farawo kuna tanta asi kapi na mu pa hena yihatji yorukokotwa.
11 Zendeni mu ka yi papare nyamweni nkenye oku nomu ka yi gwanena, nye mwa hepa kurugana sivaro sonondopi ngwendi nare.”
12 Makura vantu tava lihanene mosirongo nasinye saEgipite yipo va ka pongaike yihatji yorukokotwa.
13 Vagavi yirugana kwa va tanterere asi: “Namuvenye mwa hepa kumana yirugana yeni nkenye ezuva, ngwendi moomu ngomu yi rugana apa ngava mu pe yihatji yorukokotwa.”
14 Vatareli woyirugana woVaisraeli, ava va horowere vagavi yirugana vaFarawo, kwa va toonene noku va pura asi: “Morwasinke muna dilire kurugana sivaro sonondopi dokusika pwanare? Kapi komu yi sikisire mo nkera nanaina.”
15 Makura vatareli woyirugana woVaisraeli tava zi kwaFarawo, tava ka mu sivanena asi: “Morwasinke ono kutekwira vakareli woge monkedi ezi?
16 Ose kapi ava tu pe yihatji yorukokotwa, nye awo kutupura tu forome nondopi. Ose kututoona, nye vantu woge yiwo vana kara mepuko.”
17 Nye Farawo ta tanta asi: “One udwa! One udwa! Eyi yiyo muna kuuyungira asi: ‘Tuna hara kuza tu ka zambere Jehova.’
18 Tengureni mu ka rugane! Kwato ogu na mu pa yihatji yorukokotwa, nye simpe mwa hepa kurugana sivaro sonondopi dokusika pwanare.”
19 Makura vatareli woyirugana woVaisraeli tava dimburura asi moudigu vana kara morwa mpangera ezi va gwene zokudira kusesupika sivaro sonondopi.
20 Konyima apa va tundire kwaFarawo, tava ligwana naMosesa naArona ava vava ndindilire.
21 Vatareli woyirugana tava tantere Mosesa naArona asi: “Jehova ngano a tare eyi mwa rugana nokumupangura morwa muna ninkisa Farawo novakareli vendi va tu nyenge ntani muna tura rufuro mokuwoko kwawo yipo va tu dipage.”
22 Makura Mosesa ta likwambere kwaJehova nokutanta asi: “Jehova, morwasinke ono kuhepekera vantu ava? Morwasinke wa tumina nge?
23 Kutunda tupu apa wa tuma nge ni ka uyunge naFarawo, age kwa hepeka unene vantu ava ntani ove kapi ono kuvazowora.”
