Mbilive kwaFiremoni 1:1-25
1 Mbilive ezi kuna kutunda kwaPaurusa ogu ana kara modorongo morwa Jesus Kristusa ntani kwaTimoteusa mupuli mukwetu, zi ze kwaFiremoni murugani mukwetu ogu twa hara,
2 ntani kwaApuya mupuli mukwetu, noku kwaArekipusa mukwayita mukwetu ntani kombungakriste ezi azi pongere membo lyoge.
3 Ngano mbili nonkenda zonene zaKarunga Guhyetu ntani naHompa Jesus Kristusa zi kare none.
4 Ame kupandura nkenye apa Karunga, apa ani kutumbura momakanderero gange,
5 yeeyi ame kuzuvha kuhamena epuro neharo eli wa kara nalyo kwaHompa Jesus ntani kovapongoki navenye.
6 Ame kuna hara asi ngano epuro lyoge li kutumangede o dimburure yininke nayinye yoyiwa eyi twa gwana kupitira mwaKristusa.
7 Yeeyi ame kwa hefe unene ntani kwa hengagwidire nge apa na zuvhire kuhamena eharo lyoge, morwa nomutjima dovapongoki kwa di tendekere mwaroge, ove mukwetu.
8 Yipo nye, nampili ngomu na kara nononkondo dokukupangera mwaKristusa o rugane yoyiwa,
9 tani kulikwambere meharo, yeeyi ame Paurusa mukondi ntani kwa tura nge modorongo morwa Jesus Kristusa.
10 Ame kuna kulikwamberera po Onesimusa koge ogu ga kara ngwendi munange siruwo esi na kara modorongo.*
11 Nare age kapi ga kere nosikwafo koge, nye ngesi nga ya ku kwafa ntani name ga kwafa nge.
12 Ame kuna kumutuma a tengure koge, ntani ame kwa mu hara unene.
13 Ame kuna hara asi a kare kooku yipo a vatere nge mevango lyoge siruwo esi nina kara modorongo morwa mbudi zongwa.
14 Nye kapi nina hara kuyirugana eyi ove wa hana kuyikwatesa ko, yipo o dire kurugana eyi nina kukupura komusininiko, nye o yi rugane nomutjima nagunye.
15 Eyi yiyo nampo ga tundire ko koge karuwogona,* yipo nga ya kare nove narunye,
16 kapisi ngomupika tupu moomu mwanare nye ngomupuli mukweni, ame kwa mu hara unene ntani nove ngo ya mu hara ngomupika ntani ngomupuli mukweni mwaHompa.
17 Nsene ove kutara nge asi ame kaume koge, mu tambura neharo ngamoomu no tambura nge.
18 Ntani hena, nsene koyili eyi ga kuzonena ndi ga kukorota ngani yi futa.
19 Nyamwange Paurusa nina kuyitjanga eyi nokuwoko kwange asi ngani yi futa, nayene nove wa yi diva asi yinzi na kuruganena.*
20 Ame kuna kukuhundira mwaHompa asi o kwafe nge, tendeka mutjima gwange mwaKristusa.
21 Nina si huguvara asi ngo yi sikisa mo, eyi yiyo nina kukutjangerera, morwa na yi diva asi ngo rugana kupitakana eyi nina kukutantera.
22 Ntani hena, wapaikireni nge oku ngani ya kara yeeyi nina yi huguvara asi kupitira momakanderero geni ngani wiza hena kweni.*
23 Epafurasa mukwetu ogu twa kara nage monomango morwa Jesus Kristusa, ana kukundisire po
24 ntani hena varugani vakwetu, Marukusa naAresitarekusi naDemasa ntani Rukasa vana kukundisire po.
25 Ngano nkenda zonene zaHompa Jesus Kristusa zi kare none morwa nkareso zeni zongwa.
Nonkango dokonhi
^ MoRugereka asi “monomango.”
^ MoRugereka asi “vili zimwe.”
^ Ndi “nove kwa korota nge eparu lyoge.”
^ Ndi “ngava mangurura nge.”
