Genesis 30:1-43
30 Apa ga mwene Rakera asi kapi ga retera Jakopo muna, ta tameke kufira mfudu mukurwendi Reya, makura ta tantere Jakopo asi: “Pe nge vana ndi ngano tani fu.”
2 Jakopo ta handukire Rakera, ta tanta asi: “Nyame nye Karunga ogu ga kuninka o dire kureta ndi?”
3 Rakera ta tanta asi: “Gusa mukareli gwange Biliha yipo o ligwanekere nage panyama. Vana vendi ngava kara vange. Monkedi ozo, yimo name ngani kara novana kupitira mwendi.”
4 Rakera ta gava mukareli gwendi Biliha kwaJakopo a mu kware, makura Jakopo ta ligwanekere nendi panyama.
5 Biliha ta kara nomarutu gavali makura ta hampurukire Jakopo munona gomumati.
6 Rakera ta tanta asi: “Karunga ana ruganene nge youhunga ntani ana purakene kezwi lyange, yiyo ana penge munona gomumati.” Makura ta mu ruku Dana.*
7 Biliha mukareli gwaRakera ta kara hena nomarutu gavali, makura ta retere Jakopo munona gwauvali gomumati.
8 Rakera ta tanta asi: “Ame kwa likondjesa unene namukurwange, nye ame yiyo na mu funda.” Makura munona ogo ta mu ruku Nafitali.*
9 Apa ga mwene Reya asi kapi ana kureta hena, ta gava mukareli gwendi Silipa kwaJakopo, a kare mukadendi.
10 Makura Silipa mukareli gwaReya ta retere Jakopo munona gomumati.
11 Reya ta tanta asi: “Yininke yina gendi nge po nawa.” Makura ta mu ruku Gada.*
12 Konyima, Silipa mukareli gwaReya ta retere hena Jakopo munona gwauvali gomumati.
13 Reya ta tanta asi: “Ame nina hafa! Ngesi vakadi ngava tanta asi nina hafa.” Makura ta mu ruku Aseli.*
14 Rubena kwa gendere posiruwo sokuteza rukokotwa, ta gwana mezana enyango eli ngava gazara asi lyokureta ruvharo.* Makura ta li twara kozina Reya. Rakera ta tantere Reya asi: “Pe nge ko enyango lyamunoge.”
15 Reya ta limburura asi: “Kapi ya kugwanena po eyi wa gusa mugara gwange? Ngesi ove kuna hara hena kugusa enyango lyamunange?” Rakera ta tanta asi: “Nawa tupu. Nsene no pa nge enyango lyamunoge, Jakopo na ka rara nove masiku ganaina.”
16 Apa ga ka tundire Jakopo komapya kongurova, Reya ta mu simbagwire makura ta tanta asi: “Neina to ka rara name, morwa nina futu Rakera enyango lyamunange.” Makura Jakopo ta rara naReya masiku ogo.
17 Karunga kwa zuvhire ekanderero lyaReya makura ta kara nomarutu gavali. Konyima ta retere Jakopo munona gomumati gwautano.
18 Reya ta tanta asi: “Karunga ana futu nge morwa ame kwa gava mukareli gwange kwa mugara gwange.” Makura ta mu ruku Isasikali.*
19 Ano konyima, Reya ta kara hena nomarutu gavali, makura ta retere Jakopo munona gomumati gwauntazimwe.
20 Reya ta tanta asi: “Karunga ana pe nge uhwi wouwa. Ngesi mugara gwange na tambura nge, morwa na mu retera vana wovagara ntazimwe.” Makura ta mu ruku Seburoni.*
21 Konyima, Reya ta hampuruka munona gomukadona, ta mu ruku Dina.
22 Makura Karunga ta diworoka Rakera nokuzuvha ekanderero lyendi pokumuninka a vhure kureta.*
23 Rakera ta kara nomarutu gavali makura ta hampuruka munona gomumati, ta tanta asi: “Karunga ana gusa nge eswau!”
24 Makura ta mu ruku Josefa* nokutanta asi: “Jehova ana penge ko hena munona gomumati.”
25 Konyima zapa Rakera ga hampurukire Josefa, Jakopo ta tantere Rabani asi: “Pulisira nge ni ze kosirongo setu.
26 Pe nge vakadi vange novana vange ava na ruganena yipo ni ze, morwa ove wa yi diva omu na kuruganena.”
27 Makura Rabani ta tanta asi: “Nsene wa hafera nge, kara kumwe name. Yeeyi ame na kwata egano yidiviso* eyi yina kulikida asi Jehova ga tungika nge morwa nyove.”
28 Ta tanta hena asi: “Tantera nge asi yisinke nani kufuta, ame nani yi ku pa.”
29 Jakopo ta mu tantere asi: “Ove wa diva omu na kuruganena nomu na takamesa nawa yimuna yoge.
30 Komeho ni wize, yimuna yoge kwa kere yoyisesu, nye ngesi yina ligwederere ntani Jehova ga kutungika kutunda apa na wiza. Ngesi name nina hara kuruganena epata lyange.”
31 Rabani ta pura asi: “Yisinke nani ku pa?” Jakopo ta limburura asi: “Kapisi hepero o fute nge. Ame ngani twikira kulisa yimuna yoge nokuyitakamesa nsene o ruganena nge sininke esi.
32 Neina tani ka tara siunda soge nasinye. Horowora mo nonzwi doyindjoto-ndjoto nononzwigona donongara dosinaumbombo ntani noyikombo yoyikadi yoyindjoto-ndjoto. Eyi yiyo ngo futa nge.
33 Apa ngo wiza ezuva limwe o ya tare siunda sange,* ove ngo ya mona asi ame kuna kusikisa mo eyi na ku tanterere. Ano nsene ngo ya gwana mosiunda sange yikombo yoyikadi yokudira yindjoto-ndjoto ntani nononzwigona donongara da hana asi dosinaumbombo, ngoso ame kwa kuvaka.”
34 Makura Rabani ta tanta asi: “Nawa tupu, yi kare moomu ono tanta.”
35 Ezuva olyo, Rabani ta horowora mo yikombo yoyigara yoturuvara neyi yoyikadi yoyindjoto-ndjoto ntani nononzwigona donongara edi da kara noturuvara totuzera ntani nedi dosinaumbombo, makura tadi gava kovana vendi wovagara va di pakere mbili.
36 Rabani makura ta ligaunuka naJakopo sinano sokuhura porugendo romazuva gatatu. Makura Jakopo ta takamesa yimuna yaRabani eyi ya hupire po.
37 Jakopo ta tete nomutayi doyitji yitatu, makura ta zuhura ko mazura gamwe.
38 Makura ta tura nomutayi edi ga zuhwire komeho zoyimuna, momatemba aga ayi nwine yimuna mema, yipo yi lirondwere komeho zonomutayi apa nayi ya nwa mema.
39 Yipo nye, yimuna ngayi lirondwere komeho zonomutayi, makura ta yi reta yikombogona nononzwi doturuvara noyindjoto-ndjoto.
40 Makura Jakopo ta hangura nonzwigona odo donongara, ntani ta ninki nonzwi domosiunda saRabani di pirukire kononzwi doturuvara nedi dosinaumbombo edi da kere mosiunda. Makura ta hangura nonzwi dendi yipo di dire kulivhonga nedi daRabani.
41 Apa yimuna yokuneta nga yi hara kurondwa, Jakopo nga tura nomutayi komeho zoyimuna, momatemba yipo yi lirondwere pepi nonomutayi.
42 Nye apa ngayi hara kurondwa yimuna yokutongama, age kapi nga tura mo nomutayi. Yipo nye, yimuna yokutongama kwa kere yaRabani ano yokuneta kwa kere yaJakopo.
43 Jakopo kwa kere ngawo zonene ntani age kwa kere noyimuna yoyinzi novakareli wovagara nava wovakadi nonongameru ntani noyindongi.
Nonkango dokonhi
^ Kutanta asi “Mupanguli.”
^ Kutanta asi “Kulikondjesa.”
^ Kutanta asi “Kugenda po nawa.”
^ Kutanta asi “Ruhafo.”
^ Kapi pwa kara umbangi ou au likida asi enyango olyo ngali gava ruvharo.
^ Kutanta asi “Age mfeto.”
^ Kutanta asi “Kupulisira.”
^ MoRuhebeli asi “Karunga ta mu purakene, ta paturura mukoga gwendi.”
^ Edina eli kuna kara esupipiko lyedina Josifiya eli ali tanta asi “Jehova ngano a gwederere ko.”
^ Ndi “maumbangi.”
^ MoRuhebeli asi “mfeto zange.”
