Genesis 32:1-32
32 Jakopo ta twikire norugendo rwendi makura ta gwanekere novaengeli vaKarunga.
2 Apa ga va mwene Jakopo, ta tanta asi: “Ezi kamba zovakwayita vaKarunga!” Makura ta ruku evango olyo asi Mahanayimu.*
3 Jakopo makura ta tumu vantu kwa mukurwendi Esau ogu ga kere momukunda gwaSeire, ogu ava tumbura hena asi Edomu,
4 ta va pangere asi: “Ka tantereni hompa gwange Esau asi mukareli goge Jakopo kuna tanta asi: ‘Ame kwa ka tunga* naRabani siruwo sosire dogoro ngesi.
5 Ame nina kara nonontwedu noyindongi nononzwi ntani novakareli wovagara nava wovakadi. Ame kuna kutuma mbudi ezi ni divise hompa gwange yipo a hafere nge.’”
6 Konyima zosiruwo, vantu ava ga tumine Jakopo tava ka tengura, ta va mu tantere asi: “Mukuroge Esau tuna ka mu gwana. Ngesi monzira ana kara kuna kuwiza novagara 400 a ya gwanekere nove.”
7 Jakopo ta tukuka unene ntani ta kara nosinka. Makura ta gaununa vantu ava ga kere nawo monombunga mbali, kukwatera mo nonzwi, yikombo, nongombe ntani nonongameru.
8 Jakopo kwa tente asi: “Nsene Esau na homokera po mbunga zimwe, ezi zimwe nazi henduka.”
9 Konyima Jakopo ta tanta asi: “Jehova Karunga gomama Abirahamu naKarunga gotate Isaka, ove kwa tanterere nge asi: ‘Tengura kosirongo seni ntani kekoro lyoge, ame ngani kutungika.’
10 Ame kapi na fira kulikida nge eharo lyoge lyanarunye ntani nonkenda ezi wa likida mukareli goge, yeeyi ame kwa rutire mukuro gwaJorodana nompango tupu, ano ngesi nina kara nonombunga mbali.
11 Nakanderere popera nge kwa mukurwange Esau, yeeyi ame nina tjira asi kuvhura a ya homokere nge kumwe novakadi ntani novanona.
12 Ove kwa tente asi ngo tungika nge nokuvhukisa ruvharo* rwange ngwendi muheke gwekefuta ogu ava dili kuvhura kuvarura.”
13 Makura Jakopo ta rara poopo. Konyima, age kwa gusire yiweka yendi yimwe a yi gave kwamukurwendi Esau ngouhwi:
14 yikombo yoyikadi 200, yikombo yoyigara 20, nonzwi dononkadi 200, nonzwi donongara 20,
15 ntani nongameru dokuzamweka 30, nongombe dononkadi 40, nontwedu 10, yindongi yoyikadi 20 ntani yindongi yoyigara yoyikondi 10.
16 Makura Jakopo ta gava siunda simwe posikando kovakareli vendi nokuvatantera asi: “Piteni komeho zange ntani mwa hepa kuligaunuka sinano songandi kuliza noyiunda.”
17 Ta tantere mukareli gwendi ogu ga pitire komeho asi: “Nsene no ka gwana mukurwange Esau makura a ka ku pure asi: ‘Yilye hekuroge? Kupi ono kuza ntani yimuna eyi yina kara komeho yalye?’
18 Ka tante asi: ‘Ame mukareli gwaJakopo. Ou uhwi ana tumine hompa gwendi Esau. Nage kuna kuwiza, monyima ana kara.’”
19 Makura ta tantere mukareli gwendi gwauvali nogu gwautatu ntani navenye ava ga pere yiunda asi: “None yiyo nomu ka tantera Esau apa nomu ka mu gwana.
20 Ntani ka mu tantereni hena asi: ‘Mukareli goge Jakopo monyima ana kara kuna kuwiza.’” Jakopo kwa litanterere mwene asi: ‘Nsene nani mu hafesa pokuhova kumutumina mauhwi, kuvhura a ka tambure nge apa na ka mona nge.’
21 Vakareli vendi ava va kere nomauhwi tava piti komeho zendi, nye age kwa rere poopo.
22 Masiku ogo, ta katuka kumwe novakadi vendi vavali novakareli vendi vavali wovakadi ntani novana vendi wovamati 11 makura tava rutu mukuro gwaJaboko.
23 Jakopo ta rutu kumwe nawo ntani noyininke yendi nayinye eyi ga kere nayo.
24 Apa Jakopo ga kere gelike, mugara gumwe ta wiza, makura Jakopo ta likondjesa nomugara ogo dogoro ngurangura zonene.
25 Mugara ogo apa ga mwene asi kapi ana kuvhura kufunda Jakopo, ta mu kwata ponyonga, makura nyonga zaJakopo tazi songonyoka apa ga likondjesere nage.
26 Konyima mugara ogo ta tanta asi: “Siga nge ni ze, yeeyi ntaantani lise ezuva.” Makura Jakopo ta tanta asi: “Kapi tani ku sigi ntudi dogoro o tungike nge.”
27 Makura ta mu pura asi: “Nyove yilye edina lyoge?” Age ta limburura asi: “Nyame Jakopo.”
28 Mugara ta mu tantere asi: “Ove kapi ngava kutumbura hena asi Jakopo nye Israeli,* yeeyi ove kwa likondjesa naKarunga ntani novantu, makura yiyo ono fundu.”
29 Jakopo ta pura asi: “Tantera nge edina lyoge? Nye age ta limburura asi: “Morwasinke ono harere kudiva edina lyange?” Makura mugara ogo ta tungike Jakopo.
30 Jakopo ta ruku evango olyo asi Penieli,* yeeyi age kwa tente asi: “Nina mono sipara saKarunga, nye ame simpe kuna kuparuka.”
31 Ezuva kwa mu sililire apa ga pitire poPenueli,* ntani age kwa hunyangerere morwa nyonga zendi.
32 Eyi yiyo ava dilire kulya Vaisraeli egava eli lya kara apa ya ligwanekerera yisupa yoponyonga, morwa mugara ogo kwa kwete egava lyaJakopo eli lya kara apa ya ligwanekerera yisupa yoponyonga.
Nonkango dokonhi
^ Kutanta asi “Nokamba mbali.”
^ Ndi “kwa ka tunga ngomunayirongo.”
^ MoRuhebeli asi “mbuto.”
^ Kutanta asi “Kulikondjesa naKarunga” ndi “Karunga kukondjesa.”
^ Kutanta asi “Sipara saKarunga.”
^ Ndi “Penieli.”
