Genesis 37:1-36
37 Jakopo kwa twikilire kutunga mosirongo saKanani omu va tungire oguhwe ngomunayirongo.
2 Eyi yiyo ya horokerere Jakopo.
Apa ga kere Josefa nonomvhura 17, age kwa ka lisire nonzwi kumwe novana vaBiliha nava vaSilipa. Biliha naSilipa kwa kere vakadi woguhwe. Josefa makura ta tantere oguhwe kuhamena yininke yoyidona eyi ngava rugana vakuru vendi.
3 Israeli kwa here unene Josefa kupitakana vana vendi navenye wovagara, morwa age kwa mu retere moukurupe wendi ntani age hena kwa mu honzerere erwakani* lyewa.
4 Apa vakuru vendi va mwene asi guhyawo kwa here unene Josefa, tava tameke kumunyenga ntani kapi ngava mu uyungisa nombili.
5 Konyima Josefa kwa rotere nzodi, ta zi tantere vakuru vendi makura awo tava mu nyenge unene.
6 Josefa kwa va tanterere asi: “Purakeneni eyi nina roto.
7 Ose kuna manga yitungu yombuto pokatji kepya, makura situngu sange yiyo sina sikama ntani yitungu yeni kuna kundurukida nokunyongamena situngu sange.”
8 Vakuru vendi tava mu tantere asi: “Ngoso ove kuna hara kulitura nyamoge hompa o tu pangere ndi?” Makura awo tava mu nyenge unene morwa nonzodi dendi ntani neyi ga uyungire.
9 Konyima, Josefa ta roto hena nzodi, makura ta tantere vakuru vendi asi: “Nina roto hena nzodi. Sikando esi ezuva nokwedi ntani nonombungururu 11 kuna nyongamene nge.”
10 Konyima, Josefa ta zi tantere hena oguhwe ntani novakuru vendi, makura oguhwe tava mu handukire, tava mu tantere asi: “Nzodi musinke nye ozo? Ngoso name nonane woge novakuru woge ntani namumbyoge ngatu ku nyongamene nye ndi?”
11 Vakuru vendi tava tameke kumufira mfudu, nye oguhwe kapi va divarere eyi ga uyungire.
12 Vakuru vendi kwa zire va ka lise nonzwi noyikombo yaguhyawo pepi naSikemu.
13 Israeli makura ta tantere Josefa asi: “Vakuru woge kuna kulisira nonzwi noyikombo pepi naSikemu. Zende o ka va tare.” Josefa ta limburura asi: “Ewa tate.”
14 Tava mu tantere hena asi: “Zende o ka tare nsene vakuru woge vawaawa ntani ka tare omu dina karere nonzwi noyikombo, o ya tantere nge.” Makura Josefa ta tundu momuramba gwaHeburoni a vyuke koyiha yaSikemu.
15 Konyima, mugara gumwe ta gwana Josefa kuna kugendagura mezana, makura ta mu pura asi: “Yisinke ono kupapara?”
16 Josefa ta limburura asi: “Ame kuna kupapara vakuru vange. Muna diva oku vana kulisira nonzwi noyikombo ndi?”
17 Mugara ogo ta mu tantere asi: “Vana tundu po apa. Nina va zuvhu kuna kutanta asi: ‘Tu zeni koDotani.’” Josefa makura ta sikura vakuru vendi, ta ka va gwana moDotani.
18 Vakuru vendi tava mu mono koure. Komeho a ka sike, awo tava tameke kuliyonga omu nava mu dipaga.
19 Tava litantere asi: “Tareni! Gokurota nonzodi gogo ana kuwiza.
20 Tu zeni tu mu dipage noku mu zugumina metope limwe, tu ka tante asi sikasama sina mu dipaga. Makura ngatu tare nsene nonzodi dendi ngadi sika mo.”
21 Apa ga yi zuvhire Rubena, ta hetekere ko kumupopera, makura ta tanta asi: “Twa ha mu dipaga.”
22 Age tava tantere hena asi: “Mwa ha mu dipaga. Mu zugumineni metope lyomomburundu, nye mwa ha mu remeka.” Age kwa here kumupopera yipo a mu tengwide koguhwe.
23 Tupu ga ya sikire Josefa kovakuru vendi, tava mu hakana erwakani lyendi lyewa eli ga dwere.
24 Makura tava mu kwata noku mu zugumina metope. Metope olyo kapi mwa kere mema.
25 Makura tava hingire va lye. Apa va kankukire tava mono mbunga zoVaisimayeli kuna kutundilira koGiliyata. Nongameru dawo kwa simbire manganganga gedumba lyewa nobalisemu ntani nomazura goyitji* ntani awo kwa zire koEgipite.
26 Juda ta tantere vakuru vendi novamumbya vendi asi: “Yisinke nye ngatu gwanena po nsene tu dipaga mumbyetu nokuhoreka nomfa* dendi?
27 Tu zeni tu mu randese koVaisimayeli. Twa ha mu guma, morwa age mumbyetu ntani honde zetu zimwe tupu.” Makura awo tava mu purakene.
28 Apa va ya pitire po varandesi woVamidiyani, vakuru vaJosefa tava mu koko mo metope noku mu randesa koVaisimayeli noyisiliveli 20. Makura vagara owo tava twara Josefa koEgipite.
29 Konyima, apa ga ka tengwire Rubena ketope, ta mono asi Josefa mwato metope, makura ta taura yikoverero yendi.
30 Age ta zi kovamumbya vendi, makura ta tanta asi: “Munona mwato! Yisinke nani rugana?”
31 Awo tava gusa erwakani lyaJosefa makura tava dipaga sikombo sosigara nokutura erwakani mohonde.
32 Awo makura tava tumu erwakani kwaguhyawo nombudi ezi asi: “Eyi yiyo tuna gwana. Tareni nawa nsene erwakani eli lyamuneni ndi hawe.”
33 Age ta li tara nawa, makura ta tanta asi: “Erwakani lyamunange! Nampo sikasama sina homokere Josefa, yiyo sina mu lipapagwire.”
34 Jakopo ta taura yikoverero yendi, ta limanga nsako mombunda. Age kwa lilire munendi mazuva gomanzi.
35 Vana vendi wovagara nava wovakadi kwa hetekerere ko kumuhengagwida, nye age kwa nyokere, ta tanta asi: “Ame ngani lira munange dogoro ezuva eli ngani fa!”* Oguhwe makura tava twikire kumulira.
36 Vamidiyani tava randesa Josefa moEgipite kwaPotifara erenga lyaFarawo nomukurona govakungi.
Nonkango dokonhi
^ Ndi “sikoverero sosire sosiwa.”
^ Mema gokomazura aga ngava ga rugana yikwaedumba.
^ MoRuhebeli asi “nokuhoreka honde zendi.”
^ Ndi “ngani za moSeyoli.” Tara koMauzera.
