Genesis 39:1-23
39 Josefa kwa mu twere koEgipite, makura mugara goMuegipite gedina Potifara ogu ga kere erenga lyaFarawo nomukurona govakungi, ta mu randa koVaisimayeli ava va mu twere ko.
2 Nye Jehova kwa kere kumwe naJosefa ntani yininke kwa mu tompokere, makura tava mu tura a kare mugendesi gembo lyahekurwendi goMuegipite.
3 Hekurwendi ga mwene asi Jehova kwa kere kumwe naJosefa ntani Jehova kwa mu vaterere yipo nayinye eyi nga rugana yi mu tompoke.
4 Josefa kwa twikilire kuhafesa hekurwendi, dogoro hekurwendi ta mu huguvara unene makura ta mu tura a kare mugendesi gembo lyendi ntani noyininke yendi nayinye.
5 Kutunda apa va mu tulire Josefa a kare mugendesi gembo lyaPotifara noyininke yendi nayinye, Jehova kwa twikilire kutungika embo lyaPotifara morwa Josefa. Jehova kwa tungikire nayinye eyi ya kere membo lyendi neyi ya kere mepya.
6 Konyima, age kwa geve nayinye momawoko gaJosefa, kugusa ko kutokora asi nondya musinke edi na lya. Rutu rwaJosefa kwa peme ntani age kwa kere muwa unene.
7 Kutunda opo, mukadahekurwendi ta tameke kuhara Josefa, makura ta mu tantere asi: “Rara kumwe name.”
8 Nye age ta nyoka nokutantera mukadahekurwendi asi: “Hekurwange kapi ga diva eyi ayi horoka membo ntani age kwa gava nayinye momawoko gange.
9 Ame nyame va pa nonkondo membo eli ntani kwato eyi ga silika nge kugusa ko ove, morwa ove mukadendi. Ngapi nye nani rugana udona wa hura opo ni zone kwaKarunga gwange?”
10 MukadaPotifara nga sininike Josefa nkenye ezuva, nye Josefa kapi ga pulire a rare nage ndi a kare nage.
11 Nye ezuva limwe apa ga zire Josefa membo a ka rugane yirugana yendi, kwato mukareli ga kere mo membo.
12 MukadaPotifara ta kwata Josefa kosikoverero, ta tanta asi: “Rara name!” Nye age ta mu sigire sikoverero sendi, makura ta dukire ponze.
13 Apa ga mwene asi Josefa ana mu sigire sikoverero sendi ntani ana dukire ponze,
14 ta zigire vagara vemembo asi: “Tareni! Potifara kwa tu retera mugara ogu goMuhebeli a ya tu swaukise. Age kuna wiza a ya rare name, ame yiyo nina takuma.
15 Nye apa ana zuvhu nge kuna kutakuma, yiyo ana sigire nge sikoverero sendi a dukire ponze.”
16 Makura ta tulike sikoverero oso dogoro apa ga wizire Potifara hekurwaJosefa.
17 Age makura ta tantere Potifara yininke yokulifana asi: “Mukareli goge goMuhebeli ogu wa tu retera, kwa wiza a ya swaukise nge.
18 Nye apa nina takuma yiyo ana sigire nge sikoverero sendi a dukire ponze.”
19 Apa ga zuvhire Potifara nonkango edi ga mu tanterere mukadendi asi: “Eyi yiyo ana rugana nge mukareli goge.” Makura ta handuka unene.
20 HekurwaJosefa makura ta mu gusa, ta mu gava va ka mu ture modorongo ezi ngava tura vantu ava ga kwata hompa. Makura Josefa ta kara modorongo.
21 Nye Jehova kwa twikilire kukara naJosefa nokumulikida eharo lyanarunye ntani age kwa ninkire mukurona godorongo a mu hafere.
22 Mukurona godorongo makura ta tura Josefa a kare mukurona govanadorongo vakwawo. Nayinye eyi ngava rugana vanadorongo, yige nga divilisa asi kuna kuyisikisa mo.
23 Mukurona godorongo kapi ga kere nosinka kuhamena yininke eyi ga tulire momawoko gaJosefa, morwa Jehova kwa kere naJosefa ntani Jehova kwa tungikire nayinye eyi nga rugana.
