Genesis 7:1-24
7 Konyima Jehova ta tantere Nowa asi: “Hwilira memuwato kumwe nepata lyoge, yeeyi nyonelike vahungami mokatji kovantu ava.
2 Wa hepa kugusa yikorama ntambali* eyi ya kuhuka yomarudi gokulisiga-siga, sosigara nesi sosikadi, ano eyi yokudira kukuhuka wa hepa kugusa tupu yivali sosigara nesi sosikadi,
3 ntani neyi yokutuka keguru ntambali* sosigara nesi sosikadi, yipo ngayi dire kufa nye yi livhare nokuzwida evhu.
4 Konyima zomazuva ntambali, ame ngani rokesa mvhura masiku nomutenya mazuva 40 ntani ame ngani zonagura pevhu yinamwenyo nayinye eyi na sita.”
5 Makura Nowa ta rugana nayinye eyi ga mu pangerere Jehova.
6 Nowa kwa kere nonomvhura 600 apa rwa wizire ruhanzo pevhu.
7 Nowa yipo ga rondere memuwato kumwe namukadendi novana vendi kumwe novakadi vawo, komeho ru wize ruhanzo.
8 Yikorama nayinye yokukuhuka neyi yokudira kukuhuka noyinamwenyo yokutuka keguru ntani neyi ayi gendi pevhu,
9 kwa zire kumwe naNowa yivali-yivali memuwato, sosigara nesi sosikadi, moomu ga mu pangerere Karunga.
10 Konyima zomazuva ntambali ruhanzo ta ru wiza.
11 Apa ga kere Nowa nonomvhura 600, mokwedi kwauvali mezuva 17, mema nagenye gemeguru kwa tjukumukilire pevhu ntani marungavero gemeguru gomema kwa ga patwilire.
12 Mvhura kwa rokere unene masiku nomutenya mazuva 40.
13 Mezuva lyoolyo yipo Nowa ga hwililire memuwato kumwe namukadendi novana vendi, Sema naHamu naJafeta kumwe novakadi vawo vatatu.
14 Awo kwa hwililire mo kumwe noyikorama yomowiza neyi yokuweka neyi yokuwovana noyinamwenyo yokutuka keguru noyidira ntani neyi yomavava yomarudi gokulisiga-siga.
15 Yinamwenyo yokulisiga-siga kwa zire kwaNowa yivali-yivali, yi ka hwilire memuwato.
16 Yinamwenyo yokulisiga-siga kwa zire memuwato sosigara nesi sosikadi, ngwendi moomu Karunga ga tanterere Nowa. Apa ga hwililire Nowa, Jehova ta zedire evero.
17 Mvhura ta zi twikire kuroka mazuva 40, ano mema taga vhuka dogoro taga yerura emuwato nokulininkisa li fuga-fuge keguru.
18 Mema kwa twikilire kuvhuka pevhu, nye emuwato kwa twikilire kufuga-fuga kontunda zomema.
19 Mema kwa vhukire unene dogoro nondundu nadinye dononde depevhu ta di kara konhi zomema.
20 Mema kwa pitakanene nondundu nonometa 6,5.*
21 Yinamwenyo nayinye yepevhu, yokutuka keguru noyikorama yokuweka neyi yomowiza neyi yoyinunu* ntani novantu ta yi zonauka po.
22 Yinamwenyo nayinye yepevhu eyi ayi hesere kwa fire.
23 Age kwa zonagwire po yinamwenyo nayinye yepevhu kukwatera mo vantu, yikorama yokuwovana ntani noyinamwenyo yokutuka keguru. Nayinye kwa yi zonagwire po, Nowa tupu gelike ga parukire kumwe nava va kere nage memuwato.
24 Mema kwa hanzerere ngorooro pevhu mazuva 150.
Nonkango dokonhi
^ Ndi nampo asi “yoyigara ntambali ano yoyikadi nayo ntambali yokukuhuka.”
^ Ndi nampo asi “yoyigara ntambali ntani neyi yoyikadi ntambali.”
^ MoRuhebeli asi “Nocubit 15.” Cubit zimwe kwa hura ponosentimeta 44,5. Tara App. B14.
^ Kwa tamba koyinamwenyo yoyinunu eyi ya tunga kumwe motumbunga.
